شىعىس قازاقستان وبلىسىندا 1979 جىلى دۇنيەگە كەلگەن ەر ادام قار كوشكىنىنەن قازا تاپتى، دەپ حابارلايدى «ادىرنا» ءتىلشىسى تجم-عا سىلتەمە جاساپ.
2021 جىلعى 10 اقپاندا وبلىس ورتالىعىنان كەلگەن التى ساياحاتشى ريددەر قالاسىندا ءۇلبى وزەنىنىڭ ماڭايىنداعى سەرجيحا تاۋىندا قاردا سىرعاناپ جۇرگەن. كەنەتتەن تاۋدان كوشكىن ءجۇرىپ كەتكەندىكتەن دەمالۋشىلاردىڭ ءبىرىن قار باسىپ قالعان.
«دەرەۋ كومەككە شقو تجد جەدەل قۇتقارۋ جاساعىنىڭ قۇتقارۋشىلار توبى كينولوگيالىق ەسەپپەن بىرگە ەۆروكوپتەر-145 تىكۇشاعىمەن شىقتى، قۇرامىندا 5 ادام بار ەكىنشى توپ جول تالعامايتىن كولىكپەن وسكەمەننەن شىقتى، وعان قوسا ريددەر قالاسىنان قۇتقارۋشىلار مەن 4 ۆولونتەر قاردا جۇرگىشپەن قوسىمشا جۇمىلدىرىلدى»، - دەدى قازاقستان رەسپۋبليكاسى توتەنشە جاعدايلار مينيسترلىگىنىڭ رەسمي وكىلى تالعات ءۋالي.
16.23 ساعاتتا تىكۇشاق كۇننىڭ بۇلتتى بولۋى مەن كوزگە تۇرتكىسىز تۇتەك بوراننان قونۋىنا ءماجبۇر بولعان. وسى ۋاقىتتا ساياحاتشىلار بايلانىسقا شىعىپ جانە زارداپ شەككەنگە دەيىن جەتىپ، قار استىندا قالعان 1979 جىلى تۋعان ەركەكتىڭ دەنەسىن الىپ شىققانىن حابارلادى.
ساياحاتشىلار تۇرعان ورىندارىنىڭ ناقتى كوورديناتتارىن بەرىپ، ول جەرگە قۇتقارۋشىلار مەن ۆولونتەرلار قاردا جۇرەتىن تەحنيكامەن جەتكەن.
بۇگىن 8 ۆولونتەر، 2 قۇتقارۋشى جانە 1 كريميناللىق پوليتسيا ساراپشىدان تۇراتىن توپ، سونىمەن قاتار 3 ساياحاتشى قازا بولعان ادامنىڭ دەنەسىن ءتۇسىرۋ ءۇشىن تاۋعا كەتتى.
«ادىرنا» ۇلتتىق پورتالى
