ماڭعىستاۋ وبلىسىنداعى ءۇستىرت شەكارا قىزمەتىندە اسكەري بورىشىن وتەۋ كەىزندە قازا تاپقان 20 جاستاعى ەركەبۇلان ساعىندىقتىڭ اناسى ۇلىنىڭ جانارمايعا ۋلانعانىنا سەنبەيدى، دەپ حابارلايدى "ادىرنا" ءتىلشىسى ينفورمبيۋروعا سىلتەپ.
ماڭعىستاۋ وبلىستىق اسكەري ءبولىم ساربازدىڭ جانارماي يىسىنە ۋلانىپ كوز جۇمعانىن حابارلاعان. ۇقك-دا اقپاراتتى راستادى.
الايدا مارقۇمنىڭ تۋىستارى بۇل نۇسقاعا سەنبەيتىنىن ايتتى.
ەركەبۇلاننىڭ اناسى جۋرناليستەرگە بەرگەن سۇحباتىندا سوڭعى كۇندەرى بالاسىنان اۋىسۋ تۋرالى حابارلاما العانىن جەتكىزدى.
“سەنبى كۇنى سويلەسكەندە، "ماما، باسقا بولىمگە اۋىسۋعا مۇمكىندىك بار ما؟" دەدى. "بەنزيننەن ۋلاندى" دەيدى، ول قالاي ۋلانادى؟ دەنى ساۋ، سپورتشى بالا ەدى. تۇسىنبەيمىن”، – دەيدى اناسى.
مارقۇمنىڭ قىزى دا جىگىتتىڭ كوزى ءتىرى كەزدە اقشا سۇراي باستاعانىن حابارلادى. اقنيەت مۇقان:
“موتوردى جوندەتۋ ءۇشىن اقشا سۇراپ جۇرەتىن. بىردە 15 مىڭ، بىردە 20 مىڭ تەڭگە. "قينالىپ كەتتىم، دۇكەن دە جوق، ايدالادا وتىرمىز" دەپ ءجيى جازاتىن”، – دەيدى بويجەتكەن.
ايتا كەتەيىك، ەركەبۇلان ساعىندىق – وتباسىنىڭ كەنجە بالاسى. مەديتسينالىق كوللەدجدە ءبىلىم العان ول اسكەردەن كەيىن ۇيلەنۋدى ارمانداعان.
بۇل - ەلىمىزدە ءبىر اپتا ىشىندە شەكارا قىزمەتىندە بولعان ەكىنشى سارباز ءولىمى. بۇعان دەيىن 5 قازاندا الماتىداعى اسكەري بولىمدە 18 جاستاعى جاۋىنگەر قازا تاپقان ەدى.
