قازاقستان مەن قىتاي ۋنيۆەرسيتەتتەرى بىرلەسىپ، ميكروسپۋتنيك ارقىلى زەرتتەۋ جۇرگىزبەك، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
ءال-فارابي اتىنداعى قازاق ۇلتتىق ۋنيۆەرسيتەتى مەن قىتاي حالىق رەسپۋبليكاسىنىڭ سولتۇستىك-باتىس پوليتەحنيكالىق ۋنيۆەرسيتەتى ميكروسپۋتنيك ارقىلى عىلىمي زەرتتەۋ جۇرگىزۋ بويىنشا كەلىسىمگە كەلدى. ءال-فارابي اتىنداعى قازاق ۇلتتىق ۋنيۆەرسيتەتتىڭ رەكتورى جانسەيىت تۇيمەباەۆ اتالعان كەلىسىمگە مەملەكەت باسشىسى قاسىم-جومارت توقاەۆ پەن قازاقستانعا رەسمي ساپارمەن كەلگەن قحر توراعاسى سي ءتسزينپيننىڭ بىرلەسكەن مالىمدەمە جاساۋ بارىسىندا قول جەتكەنىن ايتادى.
«ورتاق جۇمىس ءوز كەزەگىندە عارىشتى زەرتتەۋگە، بىلىكتى مامانداردى دايارلاۋعا جانە ورتاق سپۋتنيكتەردى ازىرلەۋگە جول اشادى. سونىمەن قاتار ميكروسپۋتنيك ارقىلى جەردى قاشىقتىقتان زەرتتەۋ جۇمىستارىن جۇرگىزۋگە مول مۇمكىندىك بەرەدى»، — دەدى جانسەيىت تۇيمەباەۆ شىۇ جيىنى كەزىندەگى «جوعارى ءبىلىم بەرۋ جانە ءوندىرىستى ينتەگراتسيالاۋ سالاسىنداعى ىنتىماقتاستىق» اتتى حالىقارالىق سيمپوزيۋمدا.
قازۇۋ ءباسپاسوز قىزمەتى قىتايدىڭ سولتۇستىك-باتىس پوليتەحنيكالىق ۋنيۆەرسيتەتى عارىشقا نانوسپۋتنيكتەردى ۇشىرۋ بويىنشا كوشباسشى وقۋ ورنى ەكەنىن اتادى.
ەكى جوو كەلىسىمىنىڭ باستى ماقساتى — جەر قىرتىسى مەن مانتياداعى تىعىزدىق گەتەروگەندىلىگىن انىقتاۋ ءۇشىن سپۋتنيكتىڭ ارنايى جەر ستانتسياسى مەن تاراتقىشتى قامتيتىن گراۆيمەتريالىق ولشەۋ جابدىقتارىن ازىرلەۋ.
«جىلدان جىلعا شىۇ-عا مۇشە ەلدەر اراسىندا بارلىق سالا بويىنشا ىنتىماقتاستىق ارتىپ كەلەدى. بۇل تۇرعىدا ۋنيۆەرسيتەتتەر بىلىكتى مامانداردى دايارلاۋدا شەشۋشى ءرول اتقارادى. قازىر عىلىمي زەرتتەۋ جۇرگىزۋ، حالىقارالىق دەڭگەيدە ءبىلىم بەرۋ جانە ىسكەرلىك بايلانىستى دامىتۋدىڭ ماڭىزى وراسان زور. ءال-فارابي اتىنداعى قازۇۋ قازاقستاندىق جوعارى وقۋ ورىندارىنىڭ اراسىندا العاشقىلاردىڭ ءبىرى بولىپ شىۇ-عا مۇشە مەملەكەتتەردىڭ جوعارى وقۋ ورىندارى مەن شىۇ ۋنيۆەرسيتەتىنىڭ حارتياسى اراسىنداعى ىنتىماقتاستىق تۋرالى مەموراندۋمعا قول قويدى. ماقسات — الەمدىك ءبىلىم كەڭىستىگىنە ىقپالداسۋ جانە وتاندىق جوعارى ءبىلىمنىڭ باسەكەگە قابىلەتىن ارتتىرۋ»، — دەپ تولىقتىردى جانسەيىت تۇيمەباەۆ.
