ۇلتتىق بانك باسشىسى تيمۋر سۇلەيمەنوۆ پارلامەنت پالاتالارىنىڭ بىرلەسكەن وتىرىسىنان كەيىن جۋرناليستەردىڭ سۇراقتارىنا جاۋاپ بەردى، دەپ حابارلايدى “ادىرنا” ۇلتتىق پورتالى.
ارىپتەستەردىڭ ءبىرى «اقش-تىڭ ماسكەۋ قور بيرجاسىنا سالعان سانكتسياسى ءرۋبلدى السىرەتتى. بۇل جاعداي تەڭگەگە قالاي اسەر ەتەدى؟» دەپ ۇلتتىق بانك باسشىسىنان سۇرادى. تيمۋر سۇلەيمەنوۆ كەرىسىنشە رۋبل كۇشەيگەنىن ەسكەرتتى.
«مىسالى سانكتسيا سالىنعان كەزدە وتكەن سارسەنبىدە ءرۋبلدىڭ باعامى 90-عا جۋىق بولدى. قازىر رۋبل 85-تە. كەرىسىنشە رۋبل كۇشەيدى. سوندىقتان ول رەسەيدىڭ ۆاليۋتاسىنا تەرىس اسەر ەتكەن جوق. تاڭەرتەڭ رەسەيدە ۆاليۋتالىق تۇسىمدەردى مىندەتتى ساتۋ 90 پايىز بولدى. ولار بۇل كورسەتكىشتى 60 پايىزعا دەيىن تومەندەتتى. تەڭگەگە ەشقانداي كەرى اسەرى جوق»، – دەدى ول.
ءجۋرناليستىڭ «رەسەي ۇكىمەتى ءرۋبلدى جاساندى تۇردە كوتەرىپ وتىرعان جوق پا؟» دەگەن سۇراعىنا ۇلتتىق بانك باسشىسى «جوق» دەپ جاۋاپ بەردى. سونداي-اق سۇلەيمەنوۆكە «رەسەي ازاماتتارى ءرۋبلدى دوللارعا ايىرباستاۋعا جاپپاي كەزەككە تۇرىپ جاتىر. ولار قازاقستانعا اعىلىپ ءبىزدىڭ دوللارىمىزدى ساتىپ السا ەكونوميكامىزعا زيان كەلتىرمەي مە؟» دەگەن سۇراق قويىلدى.
«ەشقانداي قازاقستاندا كەزەك جوق. ءرۋبلدىڭ باعامى دوللارعا دەيىن كۇشەيدى. سوندىقتان رۋبل رەسەيدە كۇشەيسە، ولاردىڭ ءبىزدىڭ ەلگە كەلىپ اقشا ايىرباستاۋ ورىندارىنان دوللار ىزدەۋگە قاجەتى جوق. مۇنداي اقپارات دالەلدەنبەگەن، سوندىقتان بۇل اقپاراتقا سەنبەڭىزدەر» – دەدى ول.
