رەتتەۋشى ورگاننىڭ مالىمەتىنشە، 2026 جىلدىڭ تامىز ايىنىڭ سوڭىندا قازاقستاننىڭ حالىقارالىق رەزەرۆتەرى 70,57 ملرد دوللارعا جەتتى. ءبىر اي ىشىندە رەزەرۆ كولەمى 7,25 ملرد دوللارعا نەمەسە 11,4%-عا ارتقان.
بۇل – جىل باسىنان بەرگى ەڭ جوعارى ايلىق ءوسىم.
2026 جىلدىڭ مامىر ايىندا قازاقستاننىڭ حالىقارالىق رەزەرۆتەرى 67,35 ملرد دوللاردى قۇراعان. ال ماۋسىمدا بۇل كورسەتكىش 61,83 ملرد دوللارعا دەيىن تومەندەدى. بۇل جىل باسىنان بەرگى ەڭ تومەنگى دەڭگەي بولدى.
تومەندەۋدىڭ نەگىزگى سەبەبى التىن اكتيۆتەرىنىڭ قۇنسىزدانۋى بولدى. ونىڭ كولەمى 52,55 ملرد دوللاردان 47,57 ملرد دوللارعا دەيىن، ياعني شامامەن 5 ملرد دوللارعا ازايدى. ال ۆاليۋتالىق اكتيۆتەر 14,79 ملرد دوللاردان 14,26 ملرد دوللارعا دەيىن تومەندەدى.
بۇعان ماۋسىم ايىندا الەمدىك نارىقتا التىن باعاسىنىڭ كۇرت ارزانداۋى اسەر ەتتى. دۇنيەجۇزىلىك التىن كەڭەسىنىڭ مالىمەتىنشە، ءبىر اي ىشىندە باعالى مەتالدىڭ باعاسى شامامەن 11%-عا تومەندەگەن.
الايدا التىن قۇنىنىڭ تومەندەۋى قازاقستان ۇلتتىق بانكىنىڭ التىن ساتقانى دەگەندى بىلدىرمەيدى. مونەتارلىق التىن حالىقارالىق رەزەرۆتەر قۇرامىندا قۇندىق كورسەتكىشپەن ەسەپكە الىنادى.
شىلدە ايىندا رەزەرۆتەر قايتا قالپىنا كەلە باستاسا، تامىزدا ءوسىم ايتارلىقتاي جەدەلدەدى. قازاقستاننىڭ حالىقارالىق رەزەرۆتەرىندەگى التىننىڭ قۇنى 48,17 ملرد دوللاردان 55,80 ملرد دوللارعا دەيىن ءوستى. ءبىر ايداعى ءوسىم 7,62 ملرد دوللاردى نەمەسە 15,8%-دى قۇرادى.
وسىلايشا ەكى اي ىشىندە ماۋسىمداعى تومەندەۋدىڭ باسىم بولىگى وتەلدى. سالىستىرۋ ءۇشىن، قاڭتاردا التىن اكتيۆتەرىنىڭ قۇنى 55,34 ملرد دوللار بولعان. دەمەك، تامىزدا بۇل كورسەتكىش جىل باسىنداعى دەڭگەيدەن دە ءسال جوعارى بولدى.
ۆاليۋتالىق اكتيۆتەر بويىنشا جاعداي كەرىسىنشە قالىپتاستى. تامىزدا ولاردىڭ كولەمى 15,15 ملرد دوللاردان 14,78 ملرد دوللارعا دەيىن تومەندەدى.
ءبىر ايداعى تومەندەۋ شامامەن 377 ملن دوللار نەمەسە 2,5% بولدى.
وسىلايشا تامىزداعى حالىقارالىق رەزەرۆتەردىڭ جالپى ءوسىمى ۆاليۋتالىق اكتيۆتەردىڭ ۇلعايۋىنا بايلانىستى ەمەس. التىن اكتيۆتەرى 7,62 ملرد دوللارعا وسسە، ۆاليۋتالىق بولىگى 0,38 ملرد دوللارعا ازايعان. ناتيجەسىندە حالىقارالىق رەزەرۆتەردىڭ جالپى كولەمى 7,25 ملرد دوللارعا ارتتى.
جىل باسىنان بەرى ۆاليۋتالىق اكتيۆتەر شامامەن 18,7%-عا قىسقارعان، ال التىننىڭ قۇنى 18,1%-عا وسكەن. تامىز ايىنىڭ سوڭىندا التىن ۇلتتىق بانكتىڭ حالىقارالىق رەزەرۆتەرىنىڭ شامامەن 79%-ىن قۇرادى.
سونىمەن قاتار ۇلتتىق قوردىڭ ۆاليۋتالىق اكتيۆتەرى دە ارتقان.
شىلدەدە ولاردىڭ كولەمى 66,12 ملرد دوللار بولسا، تامىزدا 68,24 ملرد دوللارعا جەتتى. ءبىر ايداعى ءوسىم شامامەن 2,12 ملرد دوللاردى قۇرادى.
جىل باسىنان بەرى ۇلتتىق قور اكتيۆتەرى شامامەن 6,8%-عا وسكەن.
ۇلتتىق بانك 2024 جىلعى اقپاننان باستاپ ۇلتتىق قوردىڭ ۆاليۋتالىق اكتيۆتەرى – شەتەل ۆاليۋتاسىنداعى اكتيۆتەر مەن التىن – «ۇلتتىق قور – بالالارعا» باعدارلاماسى اياسىنداعى نىسانالى تالاپتار بويىنشا مىندەتتەمەلەر شەگەرىلگەننەن كەيىن كورسەتىلەتىنىن اتاپ ءوتتى.
ۇلتتىق بانكتىڭ حالىقارالىق رەزەرۆتەرى مەن ۇلتتىق قوردىڭ ۆاليۋتالىق اكتيۆتەرىن قوسقاندا، تامىز ايىنىڭ سوڭىنداعى جيىنتىق كولەم 138,81 ملرد دوللاردى قۇرادى.
شىلدە ايىنىڭ سوڭىندا بۇل كورسەتكىش 129,45 ملرد دوللار بولعان. وسىلايشا ءبىر اي ىشىندە قازاقستاننىڭ جيىنتىق رەزەرۆتەرى شامامەن 9,4 ملرد دوللارعا وسكەن.
بۇعان دەيىن قازاقستان ۇكىمەتى ۇلتتىق قوردىڭ ۆاليۋتالىق اكتيۆتەرى 2029 جىلعا قاراي 70,6 ملرد دوللارعا دەيىن وسەدى دەپ بولجام جاساعان بولاتىن.
سونىمەن قاتار قورعا تۇسەتىن تازا ءتۇسىم كولەمىن 0,5 ترلن تەڭگەدەن 2 ترلن تەڭگەگە دەيىن ارتتىرۋ جوسپارلانىپ وتىر.
قر ۇلتتىق ەكونوميكا مينيسترلىگىنىڭ بولجامىنا سايكەس، ۇلتتىق قورعا تۇسەتىن جالپى ءتۇسىم 2027 جىلى 5,1 ترلن تەڭگە، 2028 جىلى 5,5 ترلن تەڭگە، ال 2029 جىلى 5,7 ترلن تەڭگە بولادى دەپ كۇتىلۋدە.
