قۇلسارىدا 23 جاستاعى قۇتقارۋشى كوز جۇمدى

1802
Adyrna.kz Telegram

اتىراۋ وبلىسى قۇلسارى قالاسىندا سۋدى تەحنيكامەن سورۋ ارقىلى اۆاريالىق-قۇتقارۋ جۇمىستارىن جۇرگىزۋ بارىسىندا 2001 جىلعى قۇتقارۋشى كوز جۇمدى. بۇل تۋرالى توتەنشە  جاعداي مينيسرلىگى مالىمدەدى، دەپ حابارلايدى “ادىرنا” ۇلتتىق پورتالى.

اقپاراتقا سايكەس، 2024 جىلى 29 مامىردا اتىراۋ قالاسى №1 مامانداندىرىلعان ءورت ءسوندىرۋ ءبولىمىنىڭ بولىمشە كومانديرى ازاماتتىق قورعاۋ سەرجانتى راقىم بەيبارىس جالعاسبايۇلى قۇلسارىدا سۋ سورۋ بويىنشا اۆاريالىق-قۇتقارۋ جۇمىستارىن جۇرگىزۋ بارىسىندا قايتىس بولعان. وقيعانىڭ ءمان-جايى انىقتالۋدا.

ايتا كەتسەك، راقىم بەيبارىس 2001 جىلى اتىراۋ قالاسىندا تۋعان. ازاماتتىق قورعاۋ ورگاندارىندا 2021 جىلدان باستاپ قىزمەت ەتكەن. وسى قىسقا ۋاقىت ىشىندە بىرنەشە ءىرى، كۇردەلى ورتتەرگە قاتىسىپ، ادام ءومىرىن، مۇلكىن قۇتقارۋدا، قورعاۋدا بار كۇش-جىگەرىن سالىپ، حالىق العىسىنا دا بولەنگەنى حابارلانادى.

«بەيبارىستىڭ ارتىندا اتا-اناسى، باۋىرلارى مەن جارى قالدى. وتباسىنا، تۋعان-تۋىستارىنا قايعىرىپ كوڭىل ايتامىز.ول ءوز ءىسىنىڭ كاسىبي مامانى رەتىندە جۇرەگىمىزدە ماڭگى قالادى. ارىپتەسىمىزدىڭ يمانى سالامات بولىپ، پەيىشتە نۇرى شالقىعاي»، – دەپ كوڭىل ايتادى دەپارتامەنت.

ەسكە سالا كەتەيىك، بيىل بىرنەشە ءوڭىردى سۋ تاسىپ، ونداعان اۋداندا توتەنشە جاعداي جاريالاندى. سۋ تاسقىنى ەڭ ۇلكەن قاۋىپ تۋعىزىپ وتىرعان وڭىرلەر قاتارىندا اتىراۋ، باتىس قازاقستان، سولتۇستىك قازاقستان، قوستاناي وبلىستارى بار. قۇلسارى قالاسىندا ەڭ كۇردەلى جاعداي تىركەلىپ، ادام شىعىنى تىركەلدى.

 

پىكىرلەر