استانالىق پوليتسەي ايەل سۋعا باتىپ بارا جاتقان بالانى باسسەيننەن الىپ شىعىپ، ءومىرىن قۇتقاردى، دەپ حابارلايدى “ادىرنا” ءتىلشىسى ىشكى ىستەر مينيسترلىگىنە سىلتەمە جاساپ.
«وقيعا ەلورداداعى قوعامدىق باسسەيندەردىڭ بىرىندە بولدى. بەينەباقىلاۋ كامەراسىنا ادام ءومىرىن ساقتاپ قالعان اسەرلى وقيعا ءتۇسىپ قالدى. كادردا قۇتقارۋشىنىڭ سۋ استىندا ەس-ءتۇسسىز جاتقان بالانى قالاي الىپ شىققانى كورسەتىلگەن. قۇتقارۋشى ايەل ادام شەبەر قيمىلدارىمەن جۇرەك-وكپە رەانيماتسياسىن جاساپ، بالاعا قايتا تىنىس الۋعا كومەكتەسەدى. جەدەل جاردەم كەلگەننەن كەيىن باسسەين قىزمەتكەرلەرى كامەلەتكە تولماعان بالانى دارىگەرلەرگە تاپسىردى»، - دەلىنگەن تاراتقان حابارلامادا.
سونداي-اق كامەلەت جاسىنا جەتپەگەن بالانىڭ ءومىرىن ساقتاپ قالۋعا ات سالىسقاندارعا اتا-اناسى العىستارىن ءبىلدىردى.
«بەلگىلى بولعانداي، بىردەن العاشقى مەديتسينالىق كومەك كورسەتكەن ايەل ەسىل اۋداندىق ىشكى ىستەر بولىمىندە انىقتاۋشى بولىپ جۇمىس ىستەيتىن نازىم ءشارىپوۆا ەكەن. سول كۇنى ول وتباسىمەن دەمالىستا بولعان. ونىڭ ايتۋىنشا، قۇتقارىلۋ ءساتى بالاعا زيان كەلتىرمەۋ ءۇشىن ەرەكشە كۇتىمدى قاجەت ەتەدى. بۇل وقيعا توتەنشە جاعدايدىڭ الدىن الۋ مەن ادامداردىڭ ءومىرىن ساقتاپ قالۋ ارەكەتى ەكەنىن ەسكە سالاتىن ماڭىزدى وقيعا بولدى. نازىم ءشارىپوۆا قازاقستاندىق پوليتسەيلەردىڭ جاقسى دايىندىعىن جانە قيىن جاعدايلاردا ارەكەت ەتۋ قابىلەتىن كورسەتتى»، - دەلىنگەن حابارلامادا.
اتاپ وتكەندەي، قازىر بالانىڭ ءومىرى مەن دەنساۋلىعىنا ەشقانداي قاۋىپ ءتونىپ تۇرعان جوق.
ۇقساس جاڭالىقتار
