Creative Aimaq جوباسى 200 ملن تەڭگە ساۋدا اينالىمىمەن قورىتىندىلاندى

50
Adyrna.kz Telegram
https://adyrna.kz/storage/uploads/v4PDYYs1oM6Ci17l7x9GUC2bfDjcLkax8yOdDRe2.jpg

كرەاتيۆتى يندۋستريالاردى دامىتۋ قورى بيىل العاش رەت ىسكە اسىرىلعان Creative Aimaq رەسپۋبليكالىق جوباسىن قورىتىندىلادى.

13 ماۋسىم مەن 1 قاراشا ارالىعىندا ەلىمىزدىڭ 18 وڭىرىنەن 1000 كرەاتور قاتىسقان جارمەڭكەلەرگە 85 مىڭ ادام كەلىپ، جالپى ساۋدا اينالىمى 200 ملن تەڭگەگە جەتتى.

اقمولا وبلىسىنان باستالىپ، ماڭعىستاۋ وبلىسىنىڭ شىعارماشىلىق باعدارلاماسىمەن اياقتالعان جوبا بەس ايعا جۋىق ۋاقىت بويى Qazaq Creative Hub الاڭىندا ەلىمىزدىڭ ءار وڭىرىنەن كەلگەن ديزاينەرلەردى، سۋرەتشىلەردى، زەرگەرلەردى، قولونەرشىلەردى، انيماتورلار مەن تسيفرلىق كونتەنت ازىرلەۋشىلەردى بىرىكتىردى. Creative Aimaq وڭىرلىك شىعارماشىلىق كاسىپكەرلىكتى دامىتۋعا، كرەاتيۆتى ونىمدەردى كوممەرتسيالاندىرۋعا، وتاندىق برەندتەردى ىلگەرىلەتۋگە جانە وتكىزۋ نارىعىن كەڭەيتۋگە باعىتتالعان.

ساۋدا كولەمى بويىنشا ۇزدىك بەس ءوڭىر

ماڭعىستاۋ وبلىسى – 33 ملن 260 مىڭ تەڭگە

31 قازان مەن 1 قاراشا كۇندەرى وتكەن «ماڭعىستاۋ: تامىر. تالعام. كرەاتيۆ» جارمەڭكەسىنە 40 كرەاتور قاتىسىپ، 1800-دەن استام اۆتورلىق بۇيىم ۇسىندى. ەكى كۇندە جارمەڭكەگە 13 مىڭ ادام كەلدى. ماڭعىستاۋلىق شەبەرلەر كۇمىس اشەكەيلەر، ۇلتتىق كيىمدەر، ءداستۇرلى جاداعايلار، بىلعارى اياق كيىمدەر مەن اكسەسسۋارلار ۇسىندى. مادەني باعدارلاما اياسىندا «اقشاعىل»، «دومبىرا سازى»، «جورعا» انسامبلدەرى مەن تامارا اسار ونەر كورسەتىپ، ءسان كورسەتىلىمدەرى، شەبەرلىك ساباقتارى جانە ءابىش كەكىلبايۇلىنىڭ «ۇركەر» رومانىنا ارنالعان ادەبي كەزدەسۋ ۇيىمداستىرىلدى.

اقتوبە وبلىسى – 23 ملن 850 مىڭ تەڭگە

10–11 قازاندا وتكەن جارمەڭكەگە 100 كرەاتور قاتىسىپ، 9500 ادام كەلدى. اقتوبەلىك كاسىپكەرلەر ديزاينەرلىك كيىمدەر، زەرگەرلىك اشەكەيلەر، بىلعارىدان، اعاشتان، سۇيەك پەن كيىزدەن جاسالعان بۇيىمدار، ۇلتتىق اكسەسسۋارلار مەن كادەسىيلار ۇسىنسا، جەرگىلىكتى سۋرەتشىلەر ءوز تۋىندىلارى مەن اۆتورلىق ديزاين جوبالارىن تانىستىردى.

تۇركىستان وبلىسى – 21 ملن تەڭگە

29–30 تامىزدا ۇيىمداستىرىلعان جارمەڭكەگە 50 كرەاتور قاتىسىپ، 5200 ادام كەلدى. تۇركىستاندىق شەبەرلەر ۇلتتىق كىلەمدەر، زەرگەرلىك اشەكەيلەر، ديزاينەرلىك كيىمدەر، دومبىرالار، ات ابزەلدەرى، كيىزدەن، اعاشتان جانە قىشتان جاسالعان بۇيىمدار، ساندىك پاننولار، جىبەك ورامالدار مەن ۇلتتىق اكسەسسۋارلار ۇسىندى.

جەتىسۋ وبلىسى – 16 ملن تەڭگە

15–16 تامىزدا وتكەن جارمەڭكەگە 30 كرەاتور قاتىسىپ، 5 مىڭ ادام كەلدى. ءوڭىر شەبەرلەرى كارتينالار، زەرگەرلىك اشەكەيلەر، ۇلتتىق ويىنشىقتار، باسكيىمدەر، اعاش بۇيىمدار مەن كيىزدەن جاسالعان اياق كيىمدەردى تانىستىردى. بەينەلەۋ ونەرى تۋىندىلارىنا ەرەكشە سۇرانىس بايقالىپ، ولاردىڭ ساتىلىمى شامامەن 10 ملن تەڭگەنى قۇرادى. سونىمەن قاتار قىش جاساۋ ونەرى تانىستىرىلىپ، ءسان كورسەتىلىمدەرى مەن شىعارماشىلىق باعدارلامالار ۇيىمداستىرىلدى.

جامبىل وبلىسى – 15 ملن 200 مىڭ تەڭگە

5–6 قىركۇيەكتە وتكەن «اسقاق رۋحتى اۋليەاتا» جارمەڭكەسىنە 50 كرەاتور قاتىسىپ، 6 مىڭ ادام كەلدى. جامبىلدىق شەبەرلەر ۇلتتىق كيىمدەر، زەرگەرلىك اشەكەيلەر، اعاشتان، بىلعارى مەن كيىزدەن جاسالعان بۇيىمدار جانە اۆتورلىق كادەسىيلار ۇسىندى. باعدارلاما اياسىندا ASPARA برەندىنىڭ ديزاينەرلىك توپتامالارى، جاساندى ينتەللەكت كومەگىمەن ازىرلەنگەن قازاق ەرتەگىلەرى مەن انيماتسيالىق تۋىندىلار، سونداي-اق اۋدانى 200 شارشى مەتر بولاتىن كيىزدەن جاسالعان ونەر تۋىندىسى كوپشىلىك نازارىنا ۇسىنىلدى.

ۇلتتىق قولونەردەن تسيفرلىق تەحنولوگيالارعا دەيىن

Creative Aimaq ەلىمىزدىڭ مادەني مۇراسى مەن كرەاتيۆتى يندۋستريالاردىڭ زاماناۋي باعىتتارىن ءبىر الاڭعا توعىستىردى. ءسان جانە ديزاين سالاسىندا وتاندىق ديزاينەرلەر ۇلتتىق ناقىشتاعى كيىمدەردى، اۆتورلىق توپتامالاردى، اياق كيىمدەر مەن اكسەسسۋارلاردى تانىستىرىپ، ءداستۇرلى ويۋ-ورنەكتەردى زاماناۋي ءسان ۇلگىلەرىمەن ۇيلەستىردى. زەرگەرلىك ونەر مەن قولونەر باعىتىندا كۇمىس اشەكەيلەر، اعاشتان ويىلعان بۇيىمدار، قىش ىدىستار، بىلعارى اكسەسسۋارلار، كيىزدەن جاسالعان تۇرمىستىق زاتتار مەن ساندىك-قولدانبالى ونەر تۋىندىلارى ۇسىنىلدى.

بەينەلەۋ ونەرى سالاسىندا كارتينالار، مۇسىندەر، ينتەرەرگە ارنالعان اۆتورلىق تۋىندىلار مەن ساندىك پاننولار قويىلدى. قاراعاندى وبلىسىنىڭ كرەاتورلارى كومىردەن جاسالعان ونەر تۋىندىلارىن، بالقاش شەبەرلەرىنىڭ ميكرومينياتيۋرالارىن جانە 3D باسىپ شىعارۋ تەحنولوگيالارىن تانىستىرسا، شىمكەنت قالاسى مەن جامبىل وبلىسىنىڭ قاتىسۋشىلارى وتاندىق انيماتسيالىق جوبالاردى، جاساندى ينتەللەكت نەگىزىندەگى ازىرلەمەلەر مەن يننوۆاتسيالىق تەحنولوگيالىق شەشىمدەردى كوپشىلىك نازارىنا ۇسىندى.

ءار ءوڭىردىڭ مادەني ەرەكشەلىگىن تانىتقان باعدارلامالار ۇلتتىق مۋزىكا، تەاتر قويىلىمدارى، ءسان كورسەتىلىمدەرى، كىتاپ تانىستىرىلىمدارى، ادەبي كەزدەسۋلەر مەن شەبەرلىك ساباقتارىن قامتىپ، كەلۋشىلەرگە ەلىمىزدىڭ شىعارماشىلىق جەتىستىكتەرىمەن كەڭىنەن تانىسۋعا مۇمكىندىك بەردى.

وڭىرلىك كرەاتورلاردىڭ ەكونوميكالىق الەۋەتى

Creative Aimaq جوباسى اۋدان ورتالىقتارى مەن اۋىلداردا ەڭبەك ەتەتىن شىعارماشىلىق كاسىپكەرلەرگە ءوز ونىمدەرىن ءىرى نارىققا ۇسىنۋعا، تۇتىنۋشىلاردىڭ سۇرانىسىن باعالاۋعا، جاڭا كليەنتتەر تابۋعا جانە ىسكەرلىك بايلانىس ورناتۋعا مۇمكىندىك بەردى. كرەاتيۆتى يندۋستريالاردى دامىتۋ قورىنىڭ باسقارما توراعاسى ەرلان كاناليموۆ جوبانىڭ ناتيجەلەرىنە توقتالىپ، وڭىرلىك شىعارماشىلىق كاسىپكەرلىكتى دامىتۋدىڭ باسىم مىندەتتەرىن اتاپ ءوتتى.

«Creative Aimaq جوباسىن باستاعاندا ءبىز وڭىرلەردەگى كرەاتورلاردىڭ الدىندا تۇرعان ناقتى ماسەلەلەردى نەگىزگە الدىق. ەلىمىزدىڭ اۋدان، اۋىلدارىندا ساپالى ءارى باسەكەگە قابىلەتتى ءونىم شىعاراتىن تالانتتى ازاماتتار كوپ. الايدا ولاردىڭ بارلىعىندا ءوز ءونىمىن كەڭ نارىققا ۇسىنۋعا، ساتىپ الۋشىلار تابۋعا جانە كاسىبىن دامىتۋعا مۇمكىندىك بىردەي ەمەس.

ءبىز وسى كەدەرگىلەردى ازايتىپ، شىعارماشىلىق ءونىمنىڭ ناقتى ەكونوميكالىق اينالىمعا تۇسۋىنە جاعداي جاساۋدى ماقسات ەتتىك. جوبا اياسىندا 1000 كرەاتوردىڭ 200 ملن تەڭگەنىڭ ءونىمىن ساتۋى وڭىرلىك شىعارماشىلىق كاسىپكەرلىكتىڭ الەۋەتىن كورسەتتى. بۇل تەك قولونەرگە قاتىستى ەمەس. ديزاين، ءسان، بەينەلەۋ ونەرى، انيماتسيا، تسيفرلىق تەحنولوگيالار جانە باسقا دا سالالاردا تابىس تابۋعا، جاڭا جۇمىس ورىندارىن قۇرۋعا مۇمكىندىك بار.

ەندىگى مىندەت – جارمەڭكەدە تانىستىرىلعان ونىمدەردىڭ تۇراقتى نارىققا شىعۋىنا ىقپال ەتۋ. كرەاتورلار ءوز كاسىبىن ءبىر رەتتىك ءىس-شاراعا تاۋەلدى ەتپەي، تۇراقتى تاپسىرىسپەن جۇمىس ىستەيتىن دەڭگەيگە جەتۋى كەرەك. ءبىز ءۇشىن جوبانىڭ ۇزاق مەرزىمدى ناتيجەسى وسى بولماق»، – دەدى ەرلان كاناليموۆ.

Creative Aimaq جوباسىنىڭ قورىتىندىسى وڭىرلىك كرەاتيۆتى يندۋستريالاردىڭ ەكونوميكالىق الەۋەتىن جانە وتاندىق اۆتورلىق ونىمدەرگە دەگەن سۇرانىستى كورسەتتى. Qazaq Creative الداعى ۋاقىتتا وڭىرلىك كرەاتورلاردىڭ تۇراقتى تاپسىرىس الۋىنا، كاسىبىن كەڭەيتۋىنە، وتكىزۋ نارىعىن ۇلعايتۋىنا جانە باسەكەگە قابىلەتتى وتاندىق برەندتەر قالىپتاستىرۋىنا قولداۋ كورسەتۋدى جالعاستىرادى.

پىكىرلەر