شەندىلەردەن تاركىلەنگەن پاتەرلەر باعاسى ءبىرشاما ارزاندادى

286
Adyrna.kz Telegram
https://adyrna.kz/storage/uploads/2mPO64QjVlmyRVaVUR2joxwKhPvE70eHHEly1c6Y.webp

استانادا مەملەكەت مەنشىگىنە قايتارىلعان ءۇش ەليتالىق پاتەر قايتادان ساۋداعا شىعارىلدى، دەپ حابارلايدى “ادىرنا”. 

E-qazyna.kz دەرەگىنشە، ساتىپ الۋشى تابىلماعان جىلجىمايتىن مۇلىك نىساندارىنىڭ باستاپقى باعاسى ايتارلىقتاي تومەندەتىلگەن. 

ەندى ولاردىڭ جالپى قۇنى بۇرىنعىدان 207 ميلليون تەڭگەگە ازايدى.

ءبىرىنشى لوت – ەلوردانىڭ نۇرا اۋدانىنداعى Green Village تۇرعىن ءۇي كەشەنىندە ورنالاسقان 231 شارشى مەترلىك پاتەر. ول قاراشاش انا كوشەسى، 23/1 مەكەنجايىندا ورنالاسقان.

پاتەردىڭ ينتەرەرى ءسان-سالتاناتىمەن ەرەكشەلەنەدى. بولمەلەردە ءمارمار كامين، التىن جالاتىلعان اشەكەيلەر، ساندىك باعانالار مەن توبەدەگى فرەسكالار بار. جۋىناتىن بولمەلەردىڭ بىرىندە دە ەرەكشە موزايكالىق پاننو ورناتىلعان.

قىركۇيەك ايىندا بۇل پاتەر 214 ميلليون تەڭگەگە ساۋداعا شىعارىلعانىمەن، ساتىپ الۋشى تابىلماعان. قايتا وتكىزىلەتىن ساۋدا-ساتتىقتا ونىڭ باستاپقى باعاسى 65 ميلليون تەڭگەگە تومەندەپ، 149 ميلليون تەڭگە بولىپ بەلگىلەندى.

قالعان ەكى پاتەر ەلوردانىڭ الماتى اۋدانىنداعى «پاريج ورامى» تۇرعىن ءۇي كەشەنىندە ورنالاسقان.

اۋدانى 309,5 شارشى مەتر بولاتىن ەكى دەڭگەيلى پاتەر بۇعان دەيىن 363 ميلليون تەڭگەگە باعالانعان. الايدا ساۋدا-ساتتىق ناتيجەسىز اياقتالعان. قازىر ونىڭ باستاپقى باعاسى 254 ميلليون تەڭگەگە دەيىن تومەندەتىلگەن. پاتەردىڭ ينتەرەرىندە ساندىك كەسكىندەمە، كامين جانە التىن تۇستەس سانتەحنيكالىق جابدىقتار بار.

ال وسى كەشەندەگى اۋدانى 93 شارشى مەتر بولاتىن ءۇشىنشى پاتەردىڭ باعاسى 112 ميلليون تەڭگەدەن 79 ميلليون تەڭگەگە دەيىن ارزانداعان.

ءۇش جىلجىمايتىن مۇلىك نىسانى بويىنشا ساۋدا-ساتتىق 25 قاراشا كۇنى ساعات 12:00-دە باعانى كوتەرۋ ادىسىمەن وتەدى.

پاتەرلەر كىمگە تيەسىلى بولعان؟

جىلجىمايتىن مۇلىكتى قايتارىلعان اكتيۆتەردى باسقارۋ كومپانياسى (قابك) ساتىلىمعا شىعارعان. بۇل – زاڭسىز جولمەن الىنعان قاراجاتقا ساتىپ الىنىپ، كەيىن مەملەكەتكە قايتارىلعان اكتيۆتەر.

Tengri Home رەداكتسياسىنىڭ بۇرىنعى مەنشىك يەلەرى تۋرالى ساۋالىنا كومپانيا ولاردىڭ ەسىمدەرى مەن مۇلىكتىڭ تاركىلەنۋىنە قاتىستى مالىمەتتەردى جاريالاي المايتىنىن حابارلاعان. زاڭ تالاپتارىنا سايكەس، قابك بۇرىنعى يەلەرىنىڭ قۇپيالىلىعىن ساقتاۋعا مىندەتتى. كومپانيانىڭ نەگىزگى مىندەتى – مەملەكەتكە قايتارىلعان اكتيۆتەردى ەسەپكە الۋ، ساقتاۋ جانە ءتيىمدى وتكىزۋ.

قابك وكىلدەرىنىڭ تۇسىندىرۋىنشە، ساۋدا-ساتتىقتىڭ وتپەي قالۋى مۇلىكتى ساتۋ پروتسەسىنىڭ توقتاتىلعانىن بىلدىرمەيدى. مۇنداي جاعدايدا كومپانيا بەلگىلەنگەن تارتىپپەن نىسانداردى قايتا ساتۋعا شىعارادى.

ال پاتەرلەردى مەملەكەتتىك ورگانداردىڭ بالانسىنا بەرۋ تۋرالى رەسمي ءوتىنىش تۇسسە، ول قاراستىرىلۋى مۇمكىن. دەگەنمەن مۇنداي شەشىمدى قابك قابىلدامايدى.

جىلجىمايتىن مۇلىكتى ساتۋدان تۇسكەن قاراجات ارنايى مەملەكەتتىك قورعا اۋدارىلادى. قور قارجىسى ەلدەگى الەۋمەتتىك جانە ەكونوميكالىق جوبالاردى جۇزەگە اسىرۋعا باعىتتالادى.

پىكىرلەر