رەسەي مەملەكەتتىك دۋماسىنىڭ ۆيتسە-سپيكەرى پەتر تولستوي «كومسومولسكايا پراۆدا» راديوسىندا قازاق قالالارىنىڭ اۋەل باستان ورىستىكى بولعانىن، سوندىقتان رەسەي فەدەراتسياسىنىڭ ولارعا تاريحي قۇقىعى بار ەكەنىن ايتتى، دەپ حابارلايدى “ادىرنا” ۇلتتىق پورتالى.
رەسەيلىك ساياساتكەردىڭ ايتۋىنشا، ماسكەۋ ۋكراينا تاقىرىبىن اياقتاماسا، وندا قازاقستانمەن، ارمەنيامەن جانە رەسەي فەدەراتسياسىن قورشاپ تۇرعان باسقا ەلدەرمەن ماسەلەلەر تۋىندايدى.
«بۇگىنگى تاڭدا قازاقستاندا تاۋەلسىزدىككە، لاتىن الىپبيىنە كوشۋگە قاتىستى ۇلتتىق ميفولوگيا دامىپ كەلە جاتقان قانداي دا ءبىر قازاق مەملەكەتىن قالپىنا كەلتىرۋ تۇرعىسىنان نە بولىپ جاتقانىن قاراڭىزشى»، دەدى پەتر تولستوي.
ول قازاقتار الماتى قالاسىنىڭ 1867-1921 جىلدار ارالىعىندا ۆەرنىي اتاۋىمەن بولعانىن ۇمىتپاۋى كەرەگىن ايتتى.
«ءبىزدىڭ ورىس كازاكتارىنىڭ بەكىنىسى. ال بۇل وقيعانىڭ ۇلتتىق بولمىس ءۇشىن ماڭىزى زور. باسقا اڭگىمە ويلاپ تابۋدىڭ قاجەتى جوق»، – دەيدى پەتر تولستوي.
ونىڭ ايتۋىنشا، جەردىڭ ءبارى قىتايعا، قازبا بايلىعى اعىلشىندارعا ساتىلىپ كەتكەننىڭ وزىندە دە رەسەيدەن ءبولىنۋدىڭ قاجەتى جوق. ول كورشىلەرمەن «جاقسى قارىم-قاتىناستا» بولۋى كەرەك دەپ قوستى.
”قازاقستان - ءبىزدىڭ جەرىمىز! ءبىز ونى ءالى دە ەسكە سالامىز”، دەپ قوستى ول.
پەتر تولستويدىڭ بۇل مالىمدەمەسى تۋرالى ۋكراينالىق جۋرناليست دەنيس كازانسكي تەلەگرام ارناسىندا پىكىر ءبىلدىردى.
«بۇل رەسەيلىك شوۆينيستەر، رەسەيلىك رەجيم ەسىنەن تانىپ قالدى، ول اينالاسىنداعى بارلىق مەملەكەتتەردى جەك كورەدى، ول بارىنە بىردەي قاۋىپ توندىرەدى، ول ءبارىن تومەن سانايدى»، - دەپ اتاپ ءوتتى ۋكراينالىق جۋرناليست.
ول رەسەي «تاريحي جەرلەرىن» باسىپ الۋعا قۇقىعى بار دەپ سانايتىنىن ايتتى.
«كوردىڭىز بە، رەسەيلىكتەر قازاقستان مەن ۋكرايناعا قاتىستى جوسپارلارى بىردەي ەكەنىن ءتىپتى جاسىرمايدى»، - دەپ تۇيىندەدى دەنيس كازانسكي.
ەسكە سالايىق، بۇعان دەيىن پەتر تولستوي وزبەكستان تۋرالى مالىمدەمە جاساپ، ولاردىڭ شابىنا تيگەن بولاتىن.
مەملەكەتتىك دۋما دەپۋتاتى ورىس ءتىلى – مەملەكەتتىك ءتىل بولىپ تابىلمايتىن ەلدەردىڭ ازاماتتارىنا قوعامدىق ورىنداردا، مىسالى، جۇرگىزۋشى، ساتۋشى نەمەسە كۋرەر بولىپ جۇمىس ىستەۋگە تىيىم سالۋ تۋرالى باستاما كوتەردى. بۇل رەتتە تولستوي ورىس ءتىلى بۇرىنعى كسرو قۇرامىنداعى بارلىق رەسپۋبليكالاردا ۇلتارالىق قاتىناس ءتىلى بولۋى كەرەك دەپ اتاپ كورسەتتى. پارلامەنتاريدىڭ ايتۋىنشا، قازاقستان، بەلارۋس جانە قىرعىزستان بۇل نورمانى ۇستانادى، بىراق ارمەنيا، تاجىكستان جانە وزبەكستان جوق.
وسى مالىمدەمەلەرگە جاۋاپ رەتىندە وزبەكستان دەپۋتاتى بەكمۋرودوۆ رەسەيلىك ارىپتەسىنە «ءوز ازاماتتارى مەن ءوز ەلىنىڭ ماسەلەلەرىمەن اينالىسۋعا» كەڭەس بەردى.
