ۇلتتىق قوردىڭ اقشاسىن "وڭدى-cولدى" شاشۋعا شەكتەۋلەر ەنگىزىلەتىن بولدى. بۇل جايدى مينيستر قۋانتىروۆ مالىمدەدى. ناقتىراق ايتساق، جاڭا بيۋدجەت كودەكسىنىڭ جوباسىندا ۇلتتىق قوردان بەرىلەتىن نىسانالى ترانسفەرتتەردى تەك ماڭىزدى ينفراقۇرىلىمعا عانا پايدالانۋعا شەكتەۋ ەنگىزىلدى، دەپ حابارلايدى "ادىرنا" ۇلتتىق پورتالى.
جاڭا بيۋدجەت كودەكسىنىڭ جوباسى تۋرالى ۇلتتىق ەكونوميكا ءمينيسترى الىبەك قۋانتىروۆ ايتتى. ول مەملەكەتتىك قارجىنى باسقارۋ بولىمىندە ۇلتتىق قور جانە بيۋدجەتتەن تىس قورلار تۋرالى تاراۋلار بار ەكەنىن ەسكەرتتى.
"ۇلتتىق قوردان بەرىلەتىن نىسانالى ترانسفەرتتەردى تەك اسا ماڭىزدى ينفراقۇرىلىمعا عانا پايدالانۋعا شەكتەۋ ەنگىزىلدى جانە وعان ءتيىستى كريتەريلەر ەنگىزىلدى. تەك ماڭىزدى نىساندارعا، مىسالى، جۇمىس ورىندارىن جانە قوسىمشا سالىقتاردى قامتاماسىز ەتەتىن زاۋىت قۇرىلىسىن سالۋ نەمەسە تۇرمىستى قامتاماسىز ەتەتىن ينفراقۇرىلىمدار. بۇكىل ەل بويىنشا ۇيىمداستىرىلاتىن "جايلى مەكتەپتەر" جوباسى سياقتى، ءبىر مەزگىلدە بىرنەشە وڭىردە بىردەي نىساندار سالىنعاندا (...) ۇلتتىق قوردان قاراجات الۋ كولەمى ماقساتتى تالاپتاردىڭ كولەمىمەن شەكتەلگەن" - دەدى الىبەك قۋانتىروۆ.اتاۋلى كودەكس جوباسىندا "بالالارعا ارنالعان ۇلتتىق قور" تۋرالى ەرەجەلەر دە بار. اتاپ ايتقاندا، 2030 جىلعا دەيىنگى مەملەكەتتىك قارجىنى باسقارۋ تۇجىرىمداماسىنا سايكەس، 18 جاسقا تولعانعا دەيىنگى بالالارعا قاراجات بەرۋ ماسەلەسى قاراستىرىلادى.
قازىرگى ۋاقىتتا اتالمىش كودەكس جوباسى ماجىلىسكە جىبەرىلدى.
ەستەرىڭىزگە سالا كەتەيىك، 11 قىركۇيەك كۇنى ءماجىلىس دەپۋتاتى بەرىك بەيسەنعاليەۆ ۇلتتىق قورعا قاتىستى ءۋاج ايتقان ەدى. دەپۋتات ءۇش جىلدىق بيۋدجەتتى تانىستىرۋ بارىسىندا ۇلتتىق قوردىڭ ازايىپ، تابىسى كەمىگەندىگىن ەسكە سالعان.
"ادىرنا" ۇلتتىق پورتالى
ۇقساس جاڭالىقتار
