اقش اسكەرى يران اۋماعىنداعى نىساندارعا جاڭا سوققىلار سەرياسىن جاسادى. بۇل تۋرالى 10 ماۋسىمدا اقش-تىڭ ورتالىق قولباسشىلىعى (CENTCOM) ايتتى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
«اقش ورتالىق قولباسشىلىعىنىڭ كۇشتەرى جوعارعى باس قولباسشىنىڭ بۇيرىعىمەن يرانداعى بىرنەشە نىسانعا ءوزىن-ءوزى قورعاۋ ماقساتىندا قوسىمشا سوققىلار جاسادى. بۇل – يراننىڭ نەگىزسىز ءارى جالعاسىپ جاتقان اگرەسسياسىنا قارسى جاۋاپ»، – دەپ مالىمدەدى قولباسشىلىق.
بۇقارالىق اقپارات قۇرالدارىنىڭ حابارلاۋىنشا، يراننىڭ كەمىندە التى اۋدانىندا جارىلىستار بولعان.
اسكەري دەرەككوزدەرگە سىلتەمە جاساعان Axios پورتالىنىڭ مالىمەتىنشە، شابۋىل جاسالعان بارلىق نىسان يراننىڭ وڭتۇستىگىندە ورنالاسقان. ولاردىڭ قاتارىندا اۋە شابۋىلىنا قارسى قورعانىس جۇيەلەرى، راديولوكاتسيالىق ستانتسيالار، سونداي-اق ۇشقىشسىز ۇشۋ اپپاراتتارىن باسقارۋ جانە باقىلاۋ بولىمشەلەرى بولعان.
كەيىنىرەك CENTCOM يرانداعى نىساندارعا جاسالعان جاڭا سوققىلاردىڭ اياقتالعانىن حابارلادى.
بۇعان جاۋاپ رەتىندە يران باحرەين مەن كۋۆەيتتەگى امەريكالىق اسكەري بازالارعا شابۋىل جاساعانىن مالىمدەدى. بۇل – ءبىر كۇن بۇرىن يراننىڭ جاۋاپ سوققىلارىنىڭ نىساناسىنا اينالعان ەكى بازا.
«يسلام رەۆوليۋتسياسى ساقشىلار كورپۋسىنىڭ اۋە-عارىش كۇشتەرى مەن اسكەري-تەڭىز كۇشتەرى ەكى كەزەڭنەن تۇراتىن وپەراتسيا جۇرگىزىپ، ء«ال-سالەم»، «احماد ءال-جابەر» جانە «شەيح يسا» اۋە بازالارىنداعى اقش-تىڭ 18 ماڭىزدى اسكەري نىسانىن سوققىعا جويدى»، – دەپ حابارلادى Press TV تەلەارناسى.
