ورمۇز بۇعازى ماڭىندا امەريكالىق AH-64 Apache اسكەري تىكۇشاعى اپاتقا ۇشىرادى. بۇل تۋرالى The New York Times جازدى، دەپ حابارلايدى «ادىرنا» ءتىلشىسى.
باسىلىم مالىمەتىنشە، وقيعا 8 ماۋسىمدا بولعان. ەكيپاج مۇشەلەرى امان قالعان. بۇل — قاقتىعىس باستالعالى بەرى Apache تىكۇشاعىنىڭ العاش رەت جوعالۋى.
تىكۇشاقتىڭ يران كۇشتەرى تاراپىنان اتىپ تۇسىرىلگەنى نەمەسە تەحنيكالىق اقاۋدىڭ سالدارىنان قۇلاعانى ازىرگە بەلگىسىز. قازىر وقيعاعا قاتىستى تەرگەۋ ءجۇرىپ جاتىر.
اقش پرەزيدەنتى دونالد ترامپ بۇل جاعدايعا قاتىستى پىكىر ءبىلدىرىپ، ۇشقىشتاردىڭ جاعدايى «جاقسى» ەكەنىن ايتتى جانە وقيعا جونىندەگى ەسەپ 9 ماۋسىمدا ۇسىنىلاتىنىن جەتكىزدى.
AH-64 Apache — اقش ارمياسى مەن ناتو ەلدەرىنىڭ نەگىزگى سوققى بەرۋشى تىكۇشاعى. شەتەلدىك باق مالىمەتىنشە، Apache تىكۇشاقتارى، MQ-9 «Reaper» دروندارى، سونداي-اق F/A-18 جانە F-35 جويعىش ۇشاقتارى اقش قارۋلى كۇشتەرىنىڭ يراننىڭ ورمۇز بۇعازىن جابۋىنا جول بەرمەۋگە باعىتتالعان وپەراتسياسى اياسىندا قولدانىلعان.
بۇعان دەيىن ترامپ يرانمەن كەلىسىم الداعى ەكى اپتا ىشىندە جاسالۋى مۇمكىن ەكەنىن ايتقان ەدى. ونىڭ سوزىنشە، اقش بۇل قاقتىعىستا «جەڭىپ كەلەدى» جانە جاقىن ۋاقىتتا جەڭىس تۋرالى اقپارات جاريالانۋى مۇمكىن.
اقش كونگرەسىنىڭ زەرتتەۋ قىزمەتى مامىر ايىندا يرانعا قارسى وپەراتسيا بارىسىندا اقش اسكەرى جالپى 42 اۋە تەحنيكاسىنان (ۇشاقتار، تىكۇشاقتار، دروندار) ايىرىلعانىن حابارلاعان.
پەنتاگوننىڭ دەرەگىنشە، ءساۋىر ايىنىڭ سوڭىنا قاراي اقش يرانعا قارسى اسكەري وپەراتسياعا شامامەن 25 ملرد دوللار جۇمساعان، ونىڭ باسىم بولىگى وق-دارىلەرگە كەتكەن.
