Microsoft كومپانياسىنىڭ نەگىزىن قالاۋشى، امەريكالىق فيلانتروپ ءارى ميللياردەر بيلل گەيتس اقش كونگرەسى وكىلدەر پالاتاسىنىڭ باقىلاۋ كوميتەتىندە دجەففري ەپشتەين ءىسى بويىنشا كۋالىك بەردى، دەپ حابارلايدى «ادىرنا» ءتىلشىسى.
«ەپشتەيننىڭ قىلمىستىق ارەكەتتەرمەن اينالىسقانىن كورگەن ەمەسپىن، وعان كۋا بولماعانمىن. مەن ونىڭ ارالىنا نەمەسە فلوريداداعى ۇيىنە ەشقاشان بارعان ەمەسپىن. مەنىڭ ارەكەتتەرىمنەن ەشكىم زارداپ شەككەن جوق. ول جەكە قارىم-قاتىناس ورناتۋعا تىرىسقان بولۋى مۇمكىن، بىراق بۇل مەنى ەشقاشان قىزىقتىرعان جوق جانە مەن وعان جاۋاپ بەرگەن ەمەسپىن. سونداي-اق مەن ەپشتەيننىڭ مەنىڭ جەكە ومىرىمە قاتىستى قۇپيا اقپاراتقا قول جەتكىزگەنىن، سونىڭ ىشىندە نەكەدە ادال بولماعانىم تۋرالى دەرەكتەردى بىلگەنىن كەيىن ءبىلدىم. بۇل بايلانىستار ەپشتەينمەن قارىم-قاتىناسىممەن بايلانىستى ەمەس، بىراق ولار مەنىڭ وتباسىما اۋىر ءتيدى»، – دەدى گەيتس كونگرەستە.
ايتۋىنشا، ول ەپشتەينمەن 2011 جىلى تانىسقان جانە ول گەيتس قورىنىڭ دەنساۋلىق ساقتاۋ جوبالارىنا ميللياردتاعان دوللار تارتا الاتىنىن ايتقان.
«مەن ونىڭ بۇرىن زاڭمەن بايلانىستى ماسەلەلەرى بولعانىن بىلەتىنمىن، بىراق ونىڭ جاساعان قىلمىستارىنىڭ اۋقىمىن تولىق تۇسىنبەدىم. مەن جەتكىلىكتى تەكسەرىس جۇرگىزبەي، ونىڭ ۇسىنىسىن قابىلدادىم»، – دەدى ميللياردەر زاڭ شىعارۋشىلارعا.
گەيتس ەپشتەينمەن قارىم-قاتىناسى 2014 جىلدىڭ جەلتوقسانىندا تولىق توقتاعانىن ايتتى. ول ەپشتەينگە قاتىستى بارلىق تەرگەۋ ماتەريالدارىنىڭ جاريالانۋىن قولداپ، ونىڭ قىلمىستارىنان زارداپ شەككەندەردىڭ ادىلدىككە قول جەتكىزەتىنىنە ءۇمىت ءبىلدىردى.
ەسكە سالساق، امەريكالىق قارجىگەر جانە مەتسەنات دجەففري ەپشتەين پەدوفيليا مەن ءجاسوسپىرىم قىزداردى جىنىستىق ماقساتتا پايدالانعانى ءۇشىن سوتتالعان. 2008 جىلى ول فلوريدا شتاتىنداعى ىستەردىڭ ءبىرى بويىنشا كىناسىن مويىنداعان. 2019 جىلدىڭ شىلدەسىندە ادام ساۋداسى جانە سەكسۋالدىق قاناۋ ماقساتىنداعى ارەكەتتەرگە بايلانىستى فەدەرالدىق ايىپتارمەن قايتا قاماۋعا الىنعان. بىرنەشە اپتادان كەيىن ەپشتەين نيۋ-يورك تۇرمەسىندە ءولى كۇيىندە تابىلعان. رەسمي نۇسقا بويىنشا، ول وزىنە قول جۇمساعان. ونىڭ ىسىنە قاتىستى ميلليونداعان قۇجات جاريالانىپ، وندا ەپشتەيننىڭ ىقپالدى ادامدارمەن بايلانىسى كورسەتىلگەن.
