ماۋسىم ايىنىڭ ءۇشىنشى جەكسەنبىسى - اكەلەر كۇنى، دەپ حابارلايدى "ادىرنا" ۇلتتىق پورتالى.
بۇل ەرەكشە كۇن 2023 جىلى "قازاقستان رەسپۋبليكاسىنداعى مەرەكەلەر تۋرالى" زاڭعا رەسمي تۇردە ەنگىزىلىپ، ۇلتتىق مەرەكەلەر تىزىمىنە قوسىلعان بولاتىن.
اكەلەر كۇنى – وتباسىنىڭ تىرەگى سانالاتىن اكەلەردىڭ قوعامداعى، جانۇياداعى ءرولىن ايشىقتاپ، ولاردىڭ ەڭبەگىن باعالاۋعا ارنالعان ماڭىزدى كۇن. وسىعان وراي، مادەنيەت جانە اقپارات مينيسترلىگى قازاقستاندىقتاردى مەرەكەمەن قۇتتىقتاپ، اكەلەرگە جۇرەكجاردى تىلەگىن ارنادى.
«اكە – وتباسىنىڭ ارقا سۇيەر تىرەگى، بالا ءۇشىن ومىرلىك باعىت بەرەتىن تۇلعا. وسى ەرەكشە كۇنى بارشا اكەلەرىمىزگە قامقورلىعى مەن قولداۋى، ماحابباتى مەن مەيىرىمى ءۇشىن شىن جۇرەكتەن العىس ايتقىمىز كەلەدى. سىزدەرگە مىقتى دەنساۋلىق، سارقىلماس كۇش-قۋات تىلەيمىز. ەڭبەكتەرىڭىز ءاردايىم لايىقتى باعالانىپ، قۋانىش اكەلسىن. جانۇيالارىڭىزدا شاتتىق پەن ماحاببات، بەرەكە مەن بىرلىك ورناسىن! بالارىڭىزدىڭ قىزىق-قۋانىشىنا كەنەلىپ، مەرەيلەرىڭىز ارتا بەرسىن. مەرەكەلەرىڭىز قۇتتى بولسىن!»، – دەلىنگەن مينيسترلىك جولداعان قۇتتىقتاۋدا.
ەسكە سالا كەتەيىك، 2023 جىلى قازاقستاندا انالار كۇنى مەن اكەلەر كۇنى العاش رەت رەسمي تۇردە بەكىتىلدى. انالار كۇنى مامىر ايىنىڭ ەكىنشى جەكسەنبىسىندە، ال اكەلەر كۇنى ماۋسىمنىڭ ءۇشىنشى جەكسەنبىسىندە تويلانادى.
