رەسەي مۇناي وڭدەۋ زاۋىتتارىنا جاسالعان شابۋىل سالدارىنان تاپشىلىق تۋىنداعان جاعدايدا قازاقستاننان 100 مىڭ توننا بەنزين جەتكىزۋگە دايىن تۇرۋىن سۇرادى، دەپ حابارلايدى “ادىرنا” ۇلتتىق پورتالى Reuters اگەنتتىگىنە سىلتەپ.
Reuters اگەنتتىگى بۇل تۋرالى 8 ساۋىردە ءوزىنىڭ اتى-ءجونىن اتاعىسى كەلمەگەن دەرەككوزدەرىنە سىلتەمە جاساپ، ەكسكليۋزيۆتى اقپارات جاريالاعان.
قازاقستاندا «راستالماي» قالعان اقپارات
Reuters اگەنتتىگى دەرەككوزدەرىنىڭ ءبىرى قازىردىڭ وزىندە بۇل تۋرالى كەلىسىلگەنىن حابارلادى. ال قازاقستان رەسپۋبليكاسىنىڭ ەنەرگەتيكا ءمينيسترىنىڭ كەڭەسشىسى شىڭعىس ءىلياسوۆ ەنەرگەتيكا مينيسترلىگىنە رەسەيلىك ارىپتەسىنەن مۇنداي سۇرانىس تۇسپەگەنىن ايتتى.
«قازىرگى ۋاقىتتا رەسەي فەدەراتسياسىنىڭ ەنەرگەتيكا مينيسترلىگىنەن مۇنداي سۇرانىس تۇسكەن جوق، سوندىقتان اقپارات راستالمادى»، - دەگەن ەنەرگەتيكا ءمينيسترىنىڭ كەڭەسشىسى شىڭعىس ءىلياسوۆ.
ال رەسەي ەنەرگەتيكا مينيسترلىگى تۇسىنىكتەمە بەرۋ تۋرالى سۇراققا ازىرگە جاۋاپ بەرمەگەن. ۇندەمەگەنى ء“يا” دەگەنى مە؟
بەنزين جەتكىزۋدىڭ شارتى
Reuters اگەنتتىگىنىڭ حابارلاۋىنشا، رەسەي بۇل تۋرالى بەلارۋستان دا وتىنگەن. بەلارۋس قازىردىڭ وزىندە رەسەيگە بەنزين جەتكىزۋگە كومەكتەسۋگە كەلىسكەن.
وسى مالىمەت جاريا بولعاننان كەيىن رەسەي مەملەكەتتىك دۋماسىنىڭ ەنەرگەتيكا جونىندەگى كوميتەتىنىڭ باسشىسى پاۆەل زاۆالنىي «جەتكىزىلىمدەر تۋرالى شىنىمەن دە كەلىسىلگەن، بىراق كۇتپەگەن جەردەن تاپشىلىق بولعان جاعدايدا عانا»، - دەپ ونىڭ شارتىن اتاعان سىڭاي تانىتقان.
ناۋرىز ايىنىڭ اياعىنداعى جاعداي بويىنشا رەسەي مۇناي وڭدەۋ زاۋىتتارىنا ء(موز) ۋكراينا دروندارى شابۋىلى مۇنايدى باستاپقى وڭدەۋ قۋاتتىلىعىنىڭ شامامەن 14 پايىزىن جويعان. ازىرگە رەسەي بيلىگى ىشكى جانارماي نارىعىنداعى جاعداي تۇراقتى جانە قور جەتكىلىكتى دەپ وتىر.
«100 مىڭ توننالىق توتەنشە رەزەرۆ»
رەسەي ادەتتە جانارمايدىڭ نەتتو – ەكسپورتەرى (ياعني، ەكسپورت كولەمى يمپورتىنان ارتىق) جانە حالىقارالىق نارىقتارعا جەتكىزۋشى بولىپ تابىلادى. بىراق مۇناي وڭدەۋ زاۋىتارىنىڭ دروندار شابۋىلىنا ۇشىراۋى رەسەي مۇناي كومپانيالارىن يمپورت جاساۋعا ءماجبۇر ەتكەن سياقتى.
دەرەككوزدىڭ ايتۋىنشا، ماسكەۋ قازاقستاننان رەسەيگە جەتكىزۋگە ءازىر تۇراتىن 100 مىڭ توننا بەنزيننىڭ توتەنشە رەزەرۆىن قۇرۋدى سۇراعان.
سونداي-اق، ماسكەۋ 1 ناۋرىزدان باستاپ جانارماي تاپشىلىعىنىڭ الدىن الۋ ءۇشىن التى ايعا بەنزين ەكسپورتىنا تىيىم سالعان. دەگەنمەن بۇل ماسكەۋ باسقاراتىن ەۋرازيالىق ەكونوميكالىق وداققا، ونىڭ ىشىندە قازاقستانعا، سونداي-اق موڭعوليا سياقتى كەيبىر ەلدەرگە قاتىسى جوق.
ال ترەيدەرلەر رەسەيدەگى جاعداي ۋشىعىپ كەتسە، تىيىمدى كەڭەيتۋ مۇمكىن ەكەنىن ايتادى.
قازاقستانداعى قازىرگى قور
وتكەن اپتادا ورالداعى ورسك مۇناي وڭدەۋ زاۋىتى جاپپاي سۋ تاسقىنى سالدارىنان جۇمىسىن توقتاتتى، بۇل قازاقستانعا دا اسەر ەتتى.
الەمدەگى تەڭىزگە شىعا المايتىن ەڭ ۇلكەن مەملەكەت قازاقستان دا گۋمانيتارلىق ماقساتتان بولەك، جىل سوڭىنا دەيىن جانارماي ەكسپورتىنا شەكتەۋ قويدى.
Reuters اگەنتتىگىنىڭ مالىمەتىنشە، قازاقستاندا 5 ساۋىردەگى جاعداي بويىنشا اي-92 بەنزينىنىڭ قورى – 307,7 مىڭ توننا، اي-95 بەنزينى 58 مىڭ توننا دەڭگەيىندە بولدى. قازاقستاندا قازىر 435,3 مىڭ توننا ديزەل وتىنى، 101 مىڭ توننا اۆياكەروسين قورى بار.
ايتا كەتەيىك، «قازمۇنايگاز» كومپانياسىنىڭ ءباسپاسوز قىزمەتىنىڭ مالىمەتىنشە، قازاقستاندا ناۋرىز ايىندا ءۇش مۇناي وڭدەۋ زاۋىتى توقتاۋسىز جۇمىس ىستەگەن. سونىڭ ناتيجەسىندە ەلدە بەنزين مەن ديزەل وتىنىنىڭ رەكوردتىق قورى جيناقتالعان.
«ديزەل وتىنى مەن بەنزين قورى ەلدىڭ 1,5 ايلىق تۇتىنۋ كولەمىنە تەڭ، بۇل – شامامەن 1,2 ملن توننا. قازىر 670 مىڭ توننا ديزەل وتىنى، 530 مىڭ توننا بەنزين قورى بار»، - دەپ حابارلاعان كومپانيانىڭ ءباسپاسوز قىزمەتى.
دانا نۇرمۇحانبەت
«ادىرنا» ۇلتتىق پورتالى
