ەنەرگەتيكا مينيسترلىگى تاۋار ەسەبىندە جۇرەتىن [تاۋارلىق گاز] گازدى كوتەرمە ساۋدادا وتكىزۋدىڭ شەكتى باعالارىن بەلگىلەيتىن بۇيرىق جوباسىن دايىندادى. بۇيرىق ىشكى نارىق زاڭدىلىقتارىنا ساي نەگىزدەلگەن. وعان سايكەس، گازدىڭ شەكتى كوتەرمە باعاسى 15 پايىزعا ارتادى، دەپ حابارلايدى "ادىرنا" ۇلتتىق پورتالى.
ەنەرگەتيكا مينيسترلىگىنىڭ حابارلاۋىنشا، قازىرگى ۋاقىتتا قازاقستاندا تاۋارلىق گازدىڭ ورتاشا بولشەك ساۋدا باعاسى - 22,06 تەڭگە/م3. تاۋارلىق گازعا تۇرعىندارعا ارنالعان شەكتى كوتەرمە باعالار 15%-عا وسكەن كەزدە قازاقستانداعى بولشەك ساۋدا باعالار وڭىرگە بايلانىستى 1,1-دەن 3,87 تەڭگە/م3-گە دەيىن (ققس-تى ەسەپتەمەگەندە) وسەدى، ورتاشا ءوسىم شامامەن 2,7 تەڭگە/م3 بولادى (ققس ەسەپتەمەگەندە).
تاۋارلىق گاز باعاسىنىڭ قىمباتتاۋىنا اسەر ەتۋشى بىرنەشە فاكتورلار اتالدى. ولاردىڭ ىشىندە تاۋارلىق گاز جەتكىزۋ قۇنىنىڭ كوتەرىلۋى، گاز ءوندىرىسىنىڭ تومەندەۋى مەن تۇتىنىمنىڭ ارتۋى سىندى سەبەپتەر بار.
Zakon.kz-نىڭ كورسەتۋىنشە، بۇيرىقتىڭ جوباسى قازاقستان وڭىرلەرىن گازبەن جابدىقتاۋدىڭ ەكونوميكالىق جانە الەۋمەتتىك جاعدايلارىن ەسكەرە وتىرىپ، ءاربىر وبلىس، رەسپۋبليكالىق ماڭىزى بار قالا، استانا ءۇشىن جىلدارعا بولە وتىرىپ، 2023 جىلعى 1 شىلدەدەن باستاپ 2028 جىلعى 30 ماۋسىمدى قوسا العان كەزەڭگە ىشكى نارىقتا تاۋارلىق گازدى كوتەرمە ساۋدادا وتكىزۋدىڭ شەكتى باعالارىن بەلگىلەۋدى كوزدەيدى. قازاقستان رەسپۋبليكاسىنىڭ زاڭناماسىنا سايكەس شەكتى كوتەرمە باعالاردىڭ ءوسۋى ءبىر كۇنتىزبەلىك جىل ىشىندە 15%-دان اسپاۋعا ءتيىس.
قۇجات "گاز جانە گازبەن جابدىقتاۋ تۋرالى" قازاقستان رەسپۋبليكاسى زاڭى 20-بابىنىڭ 3-تارماعىنا سايكەس 15 مامىردان كەشىكتىرىلمەي بەكىتىلەدى.
"ادىرنا" ۇلتتىق پورتالى
