Reseı munaı óńdeý zaýyttaryna jasalǵan shabýyl saldarynan tapshylyq týyndaǵan jaǵdaıda Qazaqstannan 100 myń tonna benzın jetkizýge daıyn turýyn surady, dep habarlaıdy “Adyrna” ulttyq portaly Reuters agenttigine siltep.
Reuters agenttigi bul týraly 8 sáýirde óziniń aty-jónin ataǵysy kelmegen derekkózderine silteme jasap, eksklıýzıvti aqparat jarııalaǵan.
QAZAQSTANDA «RASTALMAI» QALǴAN AQPARAT
Reuters agenttigi derekkózderiniń biri qazirdiń ózinde bul týraly kelisilgenin habarlady. Al Qazaqstan Respýblıkasynyń Energetıka mınıstriniń keńesshisi Shyńǵys Ilııasov Energetıka mınıstrligine reseılik áriptesinen mundaı suranys túspegenin aıtty.
«Qazirgi ýaqytta Reseı Federaııasynyń Energetıka mınıstrliginen mundaı suranys túsken joq, sondyqtan aqparat rastalmady», - degen Energetıka mınıstriniń keńesshisi Shyńǵys Ilııasov.
Al Reseı energetıka mınıstrligi túsinikteme berý týraly suraqqa ázirge jaýap bermegen. Úndemegeni “ıá” degeni me?
BENZIN JETKIZÝDIŃ ShARTY
Reuters agenttiginiń habarlaýynsha, Reseı bul týraly Belarýstan da ótingen. Belarýs qazirdiń ózinde Reseıge benzın jetkizýge kómektesýge kelisken.
Osy málimet jarııa bolǵannan keıin Reseı Memlekettik Dýmasynyń energetıka jónindegi komıtetiniń basshysy Pavel Zavalnyı «Jetkizilimder týraly shynymen de kelisilgen, biraq kútpegen jerden tapshylyq bolǵan jaǵdaıda ǵana», - dep onyń shartyn ataǵan syńaı tanytqan.
Naýryz aıynyń aıaǵyndaǵy jaǵdaı boıynsha Reseı munaı óńdeý zaýyttaryna (MÓZ) Ýkraına drondary shabýyly munaıdy bastapqy óńdeý qýattylyǵynyń shamamen 14 paıyzyn joıǵan. Ázirge Reseı bıligi ishki janarmaı naryǵyndaǵy jaǵdaı turaqty jáne qor jetkilikti dep otyr.
«100 MYŃ TONNALYQ TÓTENShE REZERV»
Reseı ádette janarmaıdyń netto – eksporteri (ıaǵnı, eksport kólemi ımportynan artyq) jáne halyqaralyq naryqtarǵa jetkizýshi bolyp tabylady. Biraq munaı óńdeý zaýytarynyń drondar shabýylyna ushyraýy Reseı munaı kompanııalaryn ımport jasaýǵa májbúr etken sııaqty.
Derekkózdiń aıtýynsha, Máskeý Qazaqstannan Reseıge jetkizýge ázir turatyn 100 myń tonna benzınniń tótenshe rezervin qurýdy suraǵan.
Sondaı-aq, Máskeý 1 naýryzdan bastap janarmaı tapshylyǵynyń aldyn alý úshin alty aıǵa benzın eksportyna tyıym salǵan. Degenmen bul Máskeý basqaratyn Eýrazııalyq ekonomıkalyq odaqqa, onyń ishinde Qazaqstanǵa, sondaı-aq Mońǵolııa sııaqty keıbir elderge qatysy joq.
Al treıderler Reseıdegi jaǵdaı ýshyǵyp ketse, tyıymdy keńeıtý múmkin ekenin aıtady.
QAZAQSTANDAǴY QAZIRGI QOR
Ótken aptada Oraldaǵy Orsk munaı óńdeý zaýyty jappaı sý tasqyny saldarynan jumysyn toqtatty, bul Qazaqstanǵa da áser etti.
Álemdegi teńizge shyǵa almaıtyn eń úlken memleket Qazaqstan da gýmanıtarlyq maqsattan bólek, jyl sońyna deıin janarmaı eksportyna shekteý qoıdy.
Reuters agenttiginiń málimetinshe, Qazaqstanda 5 sáýirdegi jaǵdaı boıynsha AI-92 benzıniniń qory – 307,7 myń tonna, AI-95 benzıni 58 myń tonna deńgeıinde boldy. Qazaqstanda qazir 435,3 myń tonna dızel otyny, 101 myń tonna avıakerosın qory bar.
Aıta keteıik, «QazMunaıGaz» kompanııasynyń baspasóz qyzmetiniń málimetinshe, Qazaqstanda naýryz aıynda úsh munaı óńdeý zaýyty toqtaýsyz jumys istegen. Sonyń nátıjesinde elde benzın men dızel otynynyń rekordtyq qory jınaqtalǵan.
«Dızel otyny men benzın qory eldiń 1,5 aılyq tutyný kólemine teń, bul – shamamen 1,2 mln tonna. Qazir 670 myń tonna dızel otyny, 530 myń tonna benzın qory bar», - dep habarlaǵan kompanııanyń baspasóz qyzmeti.
Dana Nurmuhanbet
«Adyrna» ulttyq portaly
