قازاقستان رەسپۋبليكاسى پارلامەنتى سەناتىنىڭ تۇڭعىش توراعاسى بولعان، بەلگىلى مەملەكەت جانە قوعام قايراتكەرى بايگەلدى ومىربەك دۇنيەدەن وزدى، دەپ حابارلايدى "ادىرنا" ۇلتتىق پورتالى.
سەناتتىڭ رەسمي Telegram-كانالىندا حابارلانعانداي، بۇگىن، 3 ساۋىردە استانادا بايگەلدى ومىربەك قايتىس بولدى. بيىل 15 ساۋىردە ول 85 جاسقا تولار ەدى.
بايگەلدى ومىربەك قازاقستان رەسپۋبليكاسى پارلامەنتى سەناتىنىڭ تۇڭعىش توراعاسى بولدى. ول بۇل قىزمەتتى 1996-1999 جىلدار ارالىعىندا اتقارعان.
بايگەلدى ومىربەك 1939 جىلى جامبىل وبلىسى (قازكسر) قىزىل وكتيابر اۋىلىندا دۇنيەگە كەلگەن. ەڭبەك جولىن جامبىل وبلىسى، جامبىل اۋدانى، «قىزىل وكتيابر» كولحوزىندا جۇمىسشى بولىپ باستاعان.
1990 جىلدارى جامبىل وبلىستىق اتقارۋ كوميتەتىنىڭ توراعاسى، جامبىل وبلىستىق اكىمشىلىگىنىڭ باسشىسى، قازاقستان پرەزيدەنتىنىڭ كەڭەسشىسى بولدى.
پارلامەنت سەناتىنىڭ ءبىرىنشى، ەكىنشى، ءۇشىنشى جانە ءتورتىنشى شاقىرىلىمدارىنىڭ دەپۋتاتى بولدى. جالپى، ول پارلامەنت سەناتىندا 16 جىلدان استام قىزمەت ەتتى.
"قايراتكەردىڭ قازاسىنا بايلانىستى ونىڭ وتباسى مەن جاقىندارىنا قايعىلارىنا ورتاقتاسىپ، كوڭىل ايتامىز. قوشتاسۋ ءراسىمى تۋرالى اقپارات قوسىمشا حابارلانادى", - دەلىنگەن سەنات حابارلاماسىندا.
ومىربەك بايگەلدىنىڭ ساياساتتان تىس، قىتاي اقىنى لي بونىڭ دا جوقشىسى بولىپ، ونى "ەلىباي" اتاپ ماقالالار جازىپ، كىتابىن شىعارعانى بەلگىلى. ول تۋرالى «تابىلماي كەلگەن قازىنا» اتتى دەرەكتى فيلم دە شىعارىلعان.
