نورۆەگيا كورولى V حارالد 89 جاسىندا ومىردەن ءوتتى. بۇل تۋرالى BBC كورولدىك ءباسپاسوز قىزمەتىنە سىلتەمە جاساپ جازدى، دەپ حابارلايدى "ادىرنا".
مونارح جۇما كۇنى تاڭەرتەڭ وسلو ۋنيۆەرسيتەتىنىڭ اۋرۋحاناسىندا كوز جۇمعان. ول ەكى اپتا بۇرىن گەموليتيكالىق انەميا دياگنوزىمەن اۋىر جاعدايدا اۋرۋحاناعا تۇسكەن. بۇل دەرت كەزىندە ەريتروتسيتتەر قالىپتىدان جىلدامىراق بۇزىلادى.
V حارالد سوڭعى جىلدارى دەنساۋلىعىنا بايلانىستى بىرنەشە رەت ەم قابىلداعان. 2003 جىلى وعان قۋىقتاعى قاتەرلى ىسىكتى الىپ تاستاۋ ءۇشىن وپەراتسيا جاسالسا، 2024 جىلى جۇرەك قىزمەتىن قالىپقا كەلتىرۋ ءۇشىن كارديوستيمۋلياتور ورناتىلعان.
دەنساۋلىعىنا قاتىستى قيىندىقتارعا قاراماستان، كورول تاقتان كەتۋدى جوسپارلاماعان. ول نورۆەگيا پارلامەنتىنە ەلگە ءومىر بويى ادال قىزمەت ەتۋگە انت بەرگەنىن ايتىپ، مونارح مىندەتىن جالعاستىراتىنىن بىرنەشە رەت مالىمدەگەن.
V حارالد نورۆەگيا تاريحىنداعى ماڭىزدى تۇلعالاردىڭ ءبىرى سانالادى. ول XIV عاسىردان بەرى نورۆەگيا اۋماعىندا دۇنيەگە كەلگەن العاشقى نورۆەگيالىق كورول بولدى.
حارالد 1991 جىلى اكەسى V ولاۆ قايتىس بولعاننان كەيىن تاققا وتىردى. وسى ۋاقىت ىشىندە ول ەلدەگى ەڭ تانىمال قوعامدىق تۇلعالاردىڭ بىرىنە اينالىپ، نورۆەگيا حالقى اراسىندا كەڭ قولداۋعا يە بولدى.
