Qazaqstan Respýblıkasy Parlamenti Senatynyń tuńǵysh tóraǵasy bolǵan, belgili memleket jáne qoǵam qaıratkeri Baıgeldi Ómirbek dúnıeden ozdy, dep habarlaıdy "Adyrna" ulttyq portaly.
Senattyń resmı Telegram-kanalynda habarlanǵandaı, búgin, 3 sáýirde Astanada Baıgeldi Ómirbek qaıtys boldy. Bıyl 15 sáýirde ol 85 jasqa tolar edi.
Baıgeldi Ómirbek Qazaqstan Respýblıkasy Parlamenti Senatynyń tuńǵysh tóraǵasy boldy. Ol bul qyzmetti 1996-1999 jyldar aralyǵynda atqarǵan.
Baıgeldi Ómirbek 1939 jyly Jambyl oblysy (QazKSR) Qyzyl Oktıabr aýylynda dúnıege kelgen. Eńbek jolyn Jambyl oblysy, Jambyl aýdany, «Qyzyl Oktıabr» kolhozynda jumysshy bolyp bastaǵan.
1990 jyldary Jambyl oblystyq atqarý komıtetiniń tóraǵasy, Jambyl oblystyq ákimshiliginiń basshysy, Qazaqstan Prezıdentiniń keńesshisi boldy.
Parlament Senatynyń birinshi, ekinshi, úshinshi jáne tórtinshi shaqyrylymdarynyń depýtaty boldy. Jalpy, ol Parlament Senatynda 16 jyldan astam qyzmet etti.
"Qaıratkerdiń qazasyna baılanysty onyń otbasy men jaqyndaryna qaıǵylaryna ortaqtasyp, kóńil aıtamyz. Qoshtasý rásimi týraly aqparat qosymsha habarlanady", - delingen Senat habarlamasynda.
Ómirbek Baıgeldiniń saıasattan tys, qytaı aqyny Lı Bonyń da joqshysy bolyp, ony "Elibaı" atap maqalalar jazyp, kitabyn shyǵarǵany belgili. Ol týraly «Tabylmaı kelgen qazyna» atty derekti fılm de shyǵarylǵan.
