1930 جىلى 25 ناۋرىز كۇنى بالقاش كولىنە ىرگەلەس، قازىرگى بالقاش اۋدانىنا قاراستى باقالى جەرىندە بارىباەۆ شارۋالار كوتەرىلىسى بولدى.
كەڭەس وكىمەتىنىڭ ۇجىمداستىرۋ، جاپپاي قۋعىن-سۇرگىن ساياساتى مەن اشارشىلىق قاۋپىنە شىداماعان جەرگىلىكتى شارۋالار ۇيىمداسقان قارسىلىققا شىقتى.
باقالى اۋىل تۇرعىندارى قۇسمادي احمەتجانوۆ، قۇرامىس يبراگيموۆ، جاقىپباي ساۋقىمباەۆ 100-دەن استام ادامدى ۇيىمداستىرىپ، كورشى اۋىلدارعا ۇگىتشىلەر جىبەردى. كوتەرىلىسشىلەر وتريادقا بىرىگىپ، باقالى كوممۋناسىن باسىپ الدى، اۋىلدىق كەڭەستى تاراتىپ جىبەردى.
ەلدەن كۇشپەن جينالعان 100 پۇت استىقتى، 100 باس جىلقىنى، باسقا دا مال مەن مۇلىكتى جۇرتقا تاراتىپ بەردى. الماتى مەن سەمەيدەن اسكەر كۇشىن شاقىرتپاۋ ءۇشىن كوتەرىلىسشىلەردىڭ ارنايى توبى بالقاش جاعىنداعى تەلەفون بايلانىسىنىڭ سىمدارىن ءۇزىپ، تەمىر جول تابانىنىڭ التى بۋىنىن بوساتىپ، الىپ تاستادى. مىڭقۇم دەگەن جەردەگى 10-اۋىلدى باسىپ الدى. كوتەرىلىس باسشىسى ق. احمەتجانوۆ قىتاي شەكاراسىنان ءوتىپ كەتكەن بوسقىندارمەن، اقسۋ كوتەرىلىسشىلەرىمەن بايلانىس جاساپ، بىرلەسە قيمىلداۋعا تىرىستى.
بىراق اسكەر كۇشتەرى الدىن-الا شەكارانى نىعايتىپ، وعان جول بەرمەدى. شەكاراشىلار قىتاي جاعىنان كومەككە كەلمەك بولعان قازاق وتريادىن قولعا ءتۇسىردى. بارىباەۆ اۋدانىنداعى كوتەرىلىس 1930 جىلى ءساۋىردىڭ باس كەزىندە وگپۋ-ءدىڭ 50 ادامدىق قارۋلى جەدەل اسكەري وتريادىنىڭ كۇشىمەن باسىلدى. اۋدانعا ارنايى ۇكىمەت كوميسسياسى بارىپ، جاعدايدى قالپىنا كەلتىرۋ شارالارىن قاراستىردى. كوتەرىلىس باسشىلارى ق. احمەتجانوۆ، ج. ساۋقىمباەۆ از توپپەن قىتايعا ءوتىپ كەتۋگە ارەكەت جاساپ، بىراق قولعا ءتۇستى. بارىباەۆ اۋدانىنداعى كوتەرىلىسىنە بەلسەندى قاتىناسقان 29 ادام جاۋاپقا تارتىلىپ، ونىڭ 12-ءسى وگپۋ “ۇشتىگىنىڭ” 1930 جىلى 12 جەلتوقسانداعى ۇكىمىمەن اتىلىپ، 16 ادام 3 جىلدان 10 جىلعا دەيىن سوتتالدى، 1 ادام 3 جىلعا سىبىرگە جەر اۋدارىلدى.
