قازاقستان فرانتسيا ماماندارىمەن بىرلەسىپ بالقاش كولى باسسەينىنە زەرتتەۋ جۇرگىزدى. بۇل تۋرالى بۇگىن، 23 ماۋسىمدا سۋ رەسۋرستارى جانە يرريگاتسيا مينيسترلىگى ايتتى، دەپ حابارلايدى «ادىرنا» ءتىلشىسى.
ەكسپەديتسيا ماقساتى – بالقاش كولى باسسەينىندەگى سۋ رەسۋرستارىنىڭ جاي-كۇيىن كەشەندى زەرتتەۋ، ونىڭ ىشىندە جەرۇستى جانە جەراستى سۋلارىنىڭ مونيتورينگى، سۋارمالى اۋىل شارۋاشىلىعى القاپتارىن تالداۋ، ءوڭىردىڭ سۋ بالانسىن مودەلدەۋ ءۇشىن دالالىق دەرەكتەردى جيناۋ جانە تەكسەرۋ.
ونىڭ قۇرامىنا فرانتسۋز عىلىمي كونسورتسيۋمىنىڭ ساراپشىلارى، سۋ رەسۋرستارى جانە يرريگاتسيا مينيسترلىگى، بالقاش-الاكول باسسەيندىك ينسپەكتسياسى، «قازگيدروگەولوگيا» ۇلتتىق گيدروگەولوگيا قىزمەتى، ۋ.احمەدسافين اتىنداعى گيدروگەولوگيا جانە گەوەكولوگيا ينستيتۋتى جانە «قازاقمىس كورپوراتسياسى» جشس وكىلدەرى ەندى.
ماماندار بوياۋلى، بەرەكە، باقاناس، باقباقتى جانە بىرلىك اۋىلدىق وكرۋگتەرىندەگى سۋارۋ جۇيەلەرىن ارالاپ كوردى. تەكسەرۋ بارىسىندا اۋىل شارۋاشىلىعى القاپتارىن سۋمەن قامتۋ، كانالداردىڭ تەحنيكالىق جاي-كۇيى، ينفراقۇرىلىمدى جاڭارتۋ قاجەتتىلىگى جانە سۋ ۇنەمدەۋ تەحنولوگيالارىن ەنگىزۋ ماسەلەلەرى تالقىلاندى. سونداي-اق سۋدى قايتا پايدالانۋ، مەليوراتسيالىق جۇيەلەردىڭ جاي-كۇيى جانە جەراستى سۋلارىنىڭ دەڭگەيى تۋرالى دا ايتىلدى.
ەكسپەديتسيا قاتىسۋشىلارى الماتى وبلىسىنىڭ نەگىزگى سۋ ايدىندارىن، ونىڭ ىشىندە قاپشاعاي سۋ قويماسىن، ىلە وزەنىنىڭ ساعاسىن، مەليوراتسيالىق جانە ارتەزيان ۇڭعىمالارىن جانە سوربۇلاق كولىن ارالادى. سونداي-اق الماتىداعى جەتەكشى عىلىمي-زەرتتەۋ ينستيتۋتتارىندا كەزدەسۋلەر ۇيىمداستىرىلدى.
«زەرتتەۋ قورىتىندىسى بويىنشا مەملەكەتتىك ورگاندار مەن مۇددەلى تاراپتارعا ۇسىنىستار قامتىلعان تالدامالىق ەسەپ دايىندالادى. فرانتسۋز ساراپشىلارىمەن بىرلەسىپ ىسكە اسىرىلىپ جاتقان بۇل جوبا 2040 جىلعا دەيىنگى بولجاممەن بالقاش كولىن ساقتاۋ بويىنشا ماستەر-جوسپار ازىرلەۋگە باعىتتالعان. جۇرگىزىلىپ جاتقان زەرتتەۋلەر قازاقستان مەن فرانتسيا اراسىنداعى ەكولوگيا، سۋ پايدالانۋ جانە عىلىمي الماسۋ سالاسىنداعى ستراتەگيالىق ارىپتەستىكتى نىعايتۋعا باعىتتالعان ماڭىزدى قادام»، – دەدى سۋ رەسۋرستارى جانە يرريگاتسيا مينيسترلىگىنىڭ سۋ ساياساتى دەپارتامەنتى ديرەكتورىنىڭ ورىنباسارى مارات يماناليەۆ.
ەسكە سالايىق، بىلتىر جەلتوقسان ايىندا سۋ رەسۋرستارى جانە يرريگاتسيا مينيسترلىگى، فرانتسيانىڭ دامۋ اگەنتتىگى (AFD) جانە فرانتسيانىڭ گەولوگيالىق جانە تاۋ-كەن زەرتتەۋ بيۋروسى (BRGM) اراسىندا بالقاش كولى باسسەينىن بىرلەسىپ زەرتتەۋ جانە كولدى ساقتاۋ بويىنشا ماستەر-جوسپار ازىرلەۋگە گرانت ءبولۋ قاراستىرىلعان ۇشجاقتى كەلىسىمگە قول قويىلعان بولاتىن.
