ۇكىمەت استاناداعى ۇلتتىق پانتەونعا جەرلەۋ قاعيدالارىن وزگەرتتى. جەرلەۋگە قۇقىعى بار تۇلعالار تىزىمىنە ۆيتسە-پرەزيدەنت، قۇرىلتاي توراعاسى جانە قازاقستان حالىق كەڭەسىنىڭ توراعاسى سياقتى جاڭا مەملەكەتتىك لاۋازىمدار ەنگىزىلدى، دەپ حابارلايدى «ادىرنا» ءتىلشىسى.
2026 جىلعى 4 قاراشاداعى №981 ۇكىمەت قاۋلىسىمەن ۇلتتىق پانتەون تۋرالى ەرەجەگە وزگەرىستەر ەنگىزىلگەن.
جاڭا ەرەجەگە سايكەس، ۇلتتىق پانتەونعا مىنا تۇلعالار جەرلەنەدى:
قازاقستاننىڭ ۆيتسە-پرەزيدەنتتەرى، پرەمەر-مينيسترلەرى جانە ولاردىڭ ورىنباسارلارى;
قۇرىلتاي توراعالارى جانە ولاردىڭ ورىنباسارلارى;
قازاقستان حالىق كەڭەسىنىڭ توراعالارى جانە ولاردىڭ ورىنباسارلارى;
پارلامەنتى پالاتالارىنىڭ توراعالارى مەن ولاردىڭ ورىنباسارلارى;
مەملەكەتتىك حاتشىلار، مەملەكەتتىك كەڭەسشىلەر;
پرەزيدەنتى اكىمشىلىگىنىڭ باسشىلارى;
كونستيتۋتسيالىق كەڭەستىڭ، كونستيتۋتسيالىق سوتتىڭ، جوعارعى سوتتىڭ جانە ۇلتتىق بانكتىڭ توراعالارى;
قاۋىپسىزدىك كەڭەسى توراعاسىنىڭ ورىنباسارلارى;
مينيسترلەر، پرەزيدەنتكە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ باسشىلارى;
ەلوردانىڭ، وبلىستاردىڭ جانە رەسپۋبليكالىق ماڭىزى بار قالالاردىڭ اكىمدەرى;
پرەزيدەنتتىڭ ارنايى شەشىمى بويىنشا باسقا دا قازاقستاننىڭ ازاماتتارى.
مەملەكەتتىك قىزمەتكەرلەردەن بولەك، قولدانىستاعى ەرەجەگە سايكەس، ۇلتتىق پانتەونعا قازاقستان پرەزيدەنتتەرى مەن ولاردىڭ وتباسى مۇشەلەرى، «حالىق قاھارمانى»، «قازاقستاننىڭ ەڭبەك ەرى» اتاقتارىنىڭ يەگەرلەرى، كەڭەس وداعىنىڭ باتىرلارى جانە سوتسياليستىك ەڭبەك ەرلەرى جەرلەنۋى مۇمكىن.
سونداي-اق تىزىمگە جەكەلەگەن مەملەكەتتىك وردەندەردىڭ يەگەرلەرى مەن «قازاقستاننىڭ عارىشكەر-ۇشقىشى» قۇرمەتتى اتاعىن العان ازاماتتار كىرەدى.
نەگىزگى وزگەرىس ۇلتتىق پانتەونعا جەرلەنۋگە قۇقىعى بار مەملەكەتتىك لاۋازىمدار ءتىزىمىنىڭ كەڭەيۋىنە بايلانىستى بولعان. بۇعان دەيىنگى ەرەجەدە ۆيتسە-پرەزيدەنت، قۇرىلتاي توراعاسى، قازاقستان حالىق كەڭەسىنىڭ توراعاسى جانە قاۋىپسىزدىك كەڭەسى توراعاسىنىڭ ورىنباسارى لاۋازىمدارى كورسەتىلمەگەن بولاتىن.
