قاراعاندى وبلىسىنىڭ بالقاش قالاسى ءۇشىن مەتاللۋرگ كۇنى – ەڭ ماڭىزدى كاسىبي مەرەكەلەردىڭ ءبىرى.
بۇگىندە بۇل سالادا قالانىڭ التى مىڭنان استام تۇرعىنى ەڭبەك ەتەدى، ولاردىڭ كوپشىلىگى وتباسىلىق ەڭبەك ءداستۇرىن جالعاستىرىپ كەلەدى.
جىل باسىنان بەرى بالقاش مىس بالقىتۋ زاۋىتىندا شامامەن 100 مىڭ توننا كاتودتى مىس ءوندىرىلدى. كاسىبي مەرەكە قۇرمەتىنە مەتاللۋرگتەر سالتاناتتى جاعدايدا ۇلىقتالىپ، ۇزدىك قىزمەتكەرلەرگە سالالىق ماراپاتتار تابىستالدى.
– مەملەكەت باسشىسى قاسىم-جومارت توقاەۆ «ەڭبەك ادامى قوعامدا ەرەكشە قۇرمەتكە يە بولۋى ءتيىس» ەكەنىن بىرنەشە مارتە اتاپ ءوتتى. بۇل سوزدەر ەڭ الدىمەن سىزدەرگە ارنالعان. سىزدەردىڭ قاجىرلى ەڭبەكتەرىڭىزدىڭ ارقاسىندا قاراعاندى وبلىسىنىڭ مەتاللۋرگياسى قازاقستان ەكونوميكاسىنىڭ باستى تىرەكتەرىنىڭ ءبىرى بولىپ قالا بەرۋدە. وتكەن جىلى ءوڭىردىڭ ونەركاسىپتىك ءوندىرىس كولەمى 5,3 تريلليون تەڭگەدەن استى. ونىڭ ىشىندە شامامەن 3,8 تريلليون تەڭگەسى وڭدەۋ ونەركاسىبىنە تيەسىلى، – دەپ مەتاللۋرگتەردى كاسىبي مەرەكەسىمەن وبلىس اكىمى ەرماعانبەت بولەكپاەۆ قۇتتىقتادى. – بۇگىندە سالا كاسىپورىندارى بولاشاققا نىق سەنىممەن قادام باسىپ كەلەدى. زاماناۋي تەحنولوگيالار ەنگىزىلىپ، ەكولوگيالىق ستاندارتتار جەتىلدىرىلۋدە، جاڭا وندىرىستىك جوبالار جۇزەگە اسىرىلىپ جاتىر. دەگەنمەن ەڭ باستى قۇندىلىق – بۇرىنعىداي ادام. العا جىلجۋعا مۇمكىندىك بەرەتىن دە – سىزدەردىڭ بىلىمدەرىڭىز، كاسىبيلىكتەرىڭىز بەن جاۋاپكەرشىلىكتەرىڭىز.
ءوڭىر باسشىسى مەتاللۋرگيا سالاسىنداعى جيىنتىق ەڭبەك ءوتىلى ءجۇز جىلدان اسقان اقبەرگەنوۆتەر اۋلەتىن ۇلگى رەتىندە اتاپ ءوتتى.
ەرماعانبەت بولەكپاەۆ ۇزدىك مەتاللۋرگتەرگە «ەڭبەك داڭقى»، «قۇرمەتتى مەتاللۋرگ» توسبەلگىلەرى مەن «ەڭبەك ارداگەرى» مەدالىن تابىستادى.
كورپوراتسيا باسقارماسىنىڭ توراعاسى رۋسلان وسكەنالي 2026 جىل كومپانيادا قاۋىپسىزدىك جىلى دەپ جاريالانعانىن ايتتى.
– جىلدىڭ العاشقى التى ايىندا بالقاش مىس بالقىتۋ زاۋىتى 96 مىڭ توننادان استام كاتودتى مىس ءوندىردى. بۇل كورسەتكىشتىڭ ارتىندا سىزدەردىڭ كۇندەلىكتى ەڭبەكتەرىڭىز بەن جوعارى كاسىبيلىكتەرىڭىز تۇر. ءبىز وندىرىستىك ينفراقۇرىلىمدى كەزەڭ-كەزەڭىمەن جاڭارتىپ، جابدىقتاردى جاڭعىرتىپ، ەڭبەك جاعدايلارىن جاقسارتىپ، مەديتسينالىق جانە الەۋمەتتىك باعدارلامالاردى دامىتىپ كەلەمىز. بيىل بالقاش مىس بالقىتۋ زاۋىتىندا اۋقىمدى كۇردەلى جوندەۋ باعدارلاماسى جۇزەگە اسىرىلۋدا. پۆ-1 جانە پۆ-2 بالقىتۋ اگرەگاتتارىنا كۇردەلى جوندەۋ جۇرگىزىلىپ، عيماراتتاردىڭ شاتىرلارى جاڭارتىلىپ، نوسەرلى كارىز جۇيەسى اۋىستىرىلۋدا. بۇل وندىرىستىك نىسانداردىڭ سەنىمدىلىگىن ارتتىرىپ، ولاردىڭ قاۋىپسىز پايدالانىلۋىن قامتاماسىز ەتەدى، – دەدى ول.
سالتاناتتى راسىمگە «قازاقمىس» كومپانياسى ديرەكتورلار كەڭەسىنىڭ توراعاسى نۇرمۇحامبەت ابدىبەكوۆ تە قاتىستى. ول كومپانيا ءوندىرىستى جاڭعىرتۋعا عانا ەمەس، ءوزى جۇمىس ىستەيتىن قالالارداعى تۇرعىنداردىڭ ءومىر ساپاسىن جاقسارتۋعا دا قوماقتى قارجى سالىپ وتىرعانىن اتاپ ءوتتى.
– كومپانيانىڭ الەۋمەتتىك جانە ينفراقۇرىلىمدىق جوبالار پورتفەلى شامامەن 45 ميلليارد تەڭگەنى قۇرايدى. بۇل قاراجات ءبىلىم بەرۋ، دەنساۋلىق ساقتاۋ، سپورت، مادەنيەت جانە قالالىق ينفراقۇرىلىمدى دامىتۋعا باعىتتالعان. بالقاشتا جاڭا الەۋمەتتىك جوبالاردى ىسكە اسىرۋ باستالادى. الداعى جىلدارى زاماناۋي بالاباقشا مەن سپورتپەن شۇعىلدانۋعا، بەلسەندى دەمالىسقا جانە تۋريستىك الەۋەتتى دامىتۋعا ارنالعان سپورتتىق-تۋريستىك بازا سالىنادى. بۇل – قىزمەتكەرلەرىمىز بەن ولاردىڭ وتباسىلارىنىڭ ءومىر ساپاسىنا سالىنعان ينۆەستيتسيا ءارى قالانىڭ بولاشاعىنا قوسىلعان ۇلەس، – دەدى نۇرمۇحامبەت ابدىبەكوۆ.
مەرەكەدە ءوندىرىس ارداگەرلەرىنە دە ەرەكشە قۇرمەت كورسەتىلدى. قابدىراحمان ەسەمبەكوۆ مەتاللۋرگيا سالاسىنا 40 جىلدان استام ءومىرىن ارناعان. ونىڭ اكەسى دە مەتاللۋرگ بولعان، بۇگىندە بۇل ەڭبەك جولىن بالالارى جالعاستىرىپ كەلەدى.
– مەن بالقىتۋشى بولىپ ەڭبەك ەتتىم. اففيناج جانە مىرىش زاۋىتتارى سياقتى ءىرى وندىرىستىك جوبالاردىڭ ىسكە قوسىلۋىنا قاتىستىم. مەتاللۋرگيانىڭ قارقىندى دامىپ، زاماناۋي تەحنولوگيالاردىڭ ەنگىزىلىپ، كوپتەگەن ۇدەرىستەردىڭ اۆتوماتتاندىرىلىپ جاتقانى قۋانتادى. بارشا مەتاللۋرگتەردى كاسىبي مەرەكەمەن قۇتتىقتاپ، زور دەنساۋلىق پەن باق-بەرەكە تىلەيمىن! – دەدى ءوندىرىس ارداگەرى.
40 جىلدىق ەڭبەك ءوتىلى بار مەتاللۋرگ دۇيسەنعالي بايعۋاتوۆ قاراپايىم جۇمىسشىدان باسشىلىق قىزمەتكە دەيىنگى جولدان ءوتتى. ول ۇزاق جىلدار بويى بالقاش مىس بالقىتۋ زاۋىتىن باسقارعان.
– مەتاللۋرگيا – جىگەرلى ءارى قايسار جانداردىڭ ماماندىعى. ءار توننا مىستىڭ ارتىندا مىڭداعان جۇمىسشىنىڭ تاجىريبەسى، جاۋاپكەرشىلىگى مەن كۇندەلىكتى قاجىرلى ەڭبەگى جاتىر. سوندىقتان مەتاللۋرگ كۇنى بالقاش ءۇشىن ءاردايىم ايرىقشا مەرەكە بولىپ قالا بەرەدى، – دەدى دۇيسەنعالي بايعۋاتوۆ.
بالقاشتا مەتاللۋرگ كۇنى كەڭ كولەمدە اتالىپ وتەدى.
كاسىبي مەرەكەگە وراي وتباسىلىق ويىن-ساۋىق باعدارلامالارى، سپورتتىق جارىستار جانە تانىمال ونەرپازداردىڭ قاتىسۋىمەن كونتسەرت ۇيىمداستىرىلادى.
مەرەكەلىك شارا سوڭىندا وتشاشۋ بولادى.
