جەتىسۋ وبلىسىندا بالقاش جاعالاۋىنداعى ءتۋريزمدى دامىتۋ باعىتىندا اۋىلدىق ينفراقۇرىلىمدى جەتىلدىرۋ بويىنشا كەشەندى شارالار قابىلدانۋدا. اتاپ ايتقاندا، لەپسى اۋىلىندا جاڭا تەمىرجول ۆوكزالىنىڭ قۇرىلىسى ءجۇرىپ جاتىر، پوليتسيا پۋنكتىنىڭ عيماراتى قايتا جاڭعىرتىلىپ، اۋرۋحانا عيماراتىنا كۇردەلى جوندەۋ جۇمىستارى جاسالۋدا. قۇرىلىس جۇمىستارىنىڭ بارىسىمەن جانە اتقارىلعان جۇمىستاردىڭ ناتيجەلەرىمەن وبلىس اكىمى بەيبىت يساباەۆ سارقان اۋدانىنا جاساعان جۇمىس ساپارى بارىسىندا تانىستى، – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
ەڭ الدىمەن بەيبىت يساباەۆ جاڭا تەمىرجول ۆوكزالى سالىنىپ جاتقان قۇرىلىس الاڭىنا باردى. نىساندى پايدالانۋعا بەرۋ وسى جىلدىڭ تامىز ايىنا جوسپارلانعان. اتالعان نىسان ىسكە قوسىلعاننان كەيىن جولاۋشىلارعا قاۋىپسىز ءارى ساپالى قىزمەت كورسەتۋگە، ءوڭىردىڭ كولىك ينفراقۇرىلىمىنىڭ دامۋىنا وڭ اسەرىن تيگىزەدى.
نىساندى سالىپ جاتقان مەردىگەر ۇيىم ديرەكتورىنىڭ ءبىرىنشى ورىنباسارى مەدەت ومارحانوۆتىڭ ايتۋىنشا، قازىرگى تاڭدا قۇرىلىس جۇمىستارىنىڭ 45%-ى اياقتالعان. ىرگەتاستىڭ ءمونوليتتى-بەتون جۇمىستارى تولىق اياقتالدى. قازىر عيماراتتىڭ قابىرعالارى قالانۋدا، ال جۋىق ارادا ارلەۋ جۇمىستارى باستالادى.
- قۇرىلىس نىسانىنىڭ جالپى اۋماعى 617 شارشى مەتردى قۇرايدى. ۆوكزال عيماراتى بارلىق زاماناۋي تالاپتارعا ساي بولادى. جوبادا تامبۋر، ۆەستيبيۋل، كۇتۋ زالى، ساۋدا الاڭى، بالالى جولاۋشىلارعا ارنالعان بولمە، دەمالىس بولمەسى، سانيتارلىق توراپ، سونداي-اق بىرقاتار اكىمشىلىك جانە تەحنيكالىق بولمەلەر قاراستىرىلعان، – دەدى م. ومارحانوۆ.
وبلىس اكىمى ءوز كەزەگىندە نىساندى بەلگىلەنگەن مەرزىمدە اياقتاۋ ءۇشىن قۇرىلىس قارقىنىن جەدەلدەتۋ قاجەتتىگىن ايتتى.
مۇنداعى پوليتسيا پۋنكتىنىڭ عيماراتى اعىمداعى جوندەۋ جۇمىستارىنان كەيىن تولىقتاي تالاپقا ساي كەلتىرىلگەن. عيمارات جوندەۋدەن وتكىزىلىپ قانا قويماي، قىزمەتكەرلەرگە قولايلى بولۋ ءۇشىن مۇندا اسحانا مەن دەمالىس بولمەسى اشىلدى، ال ەكىنشى قاباتتا كازارمالىق ۇلگىدەگى جاتاقحانا بولمەلەرى جابدىقتالدى. پوليتسيا پۋنكتىندە تۇراقتى نەگىزدە 5 قىزمەتكەر جۇمىس ىستەيدى. ال تۋريستىك ماۋسىم كەزىندە قاۋىپسىزدىك پەن قوعامدىق ءتارتىپتى قامتاماسىز ەتۋ ءۇشىن جەكە قۇرام سانى 25 ادامعا دەيىن ۇلعايتىلادى. سونىمەن قاتار لەپسى اۋىلىندا سۋداعى قاۋىپسىزدىكتى قامتاماسىز ەتۋ ماقساتىندا تاۋلىك بويى پاترۋلدىك قىزمەت اتقاراتىن قۇتقارۋ بولىمشەسىنىڭ 12 قىزمەتكەرى جۇمىس ىستەيدى.
سونداي-اق 30 ورىندىق لەپسى اۋىلدىق اۋرۋحاناسىنا كۇردەلى جوندەۋ جۇمىستارى جالعاسۋدا. بيىلعى جىلدىڭ ءساۋىر ايىندا باستالعان جۇمىستاردىڭ قازىرگى تاڭدا 30%-ى ورىندالعان. جوندەۋ جۇمىستارىن جىل سوڭىنا دەيىن اياقتاۋ جوسپارلانىپ وتىر.
– ءبىزدىڭ اۋىلدىق اۋرۋحاناعا سوڭعى رەت جوندەۋ جۇمىستارى 2010 جىلى جۇرگىزىلگەن. سوندىقتان عيماراتتى زاماناۋي تالاپتارعا ساي جاڭارتۋ قاجەتتىلىگى تۋىنداعان بولاتىن. بۇل مەديتسينالىق قىزمەت ساپاسىن ارتتىرۋ ءۇشىن وتە كەرەك، ويتكەنى پاتسيەنتتەر سانى جىل سايىن ارتىپ كەلەدى. اسىرەسە تۋريستىك ماۋسىمدا لەپسىگە كەلەتىن قوناقتار مەن دەمالۋشىلار قاتارى كوبەيەدى. ماسەلەن، وتكەن جىلدىڭ وزىندە عانا بىزگە 800 ادام مەديتسينالىق كومەككە جۇگىندى. وسىعان بايلانىستى تۋريستىك ماۋسىم كەزىندە اۋداندىق اۋرۋحانادان ارنايى مامانداردى قوسىمشا جىبەرىپ وتىرامىز. جاقىن ۋاقىتتا تاعى ءۇش دارىگەر كەلەدى، – دەدى اۋداندىق ورتالىق اۋرۋحانانىڭ ديرەكتورى التاي شۇلعاۋباەۆ.
بەلگىلى بولعانداي، اۋداندىق اۋرۋحانا عيماراتىنا كۇردەلى جوندەۋ جۇرگىزىلىپ جاتقان كەزدە ناۋقاستاردى جەرگىلىكتى ەمحانا قابىلداۋدا.
بەيبىت يساباەۆ كەلەسى جىلى وسى ەمحانا عيماراتىنا اعىمداعى جوندەۋ جۇمىستارىن جۇرگىزۋدى تاپسىردى. وسىلايشا، اۋىلداعى دەنساۋلىق ساقتاۋ سالاسىنىڭ ەكى ءىرى نىسانى دا زامان تالابىنا سايكەستەندىرىلىپ، جەرگىلىكتى تۇرعىندار مەن تۋريستەر ءۇشىن ساپالى مەديتسينالىق قىزمەتتەردىڭ قولجەتىمدىلىگى ارتا تۇسپەك.
