XX عاسىردىڭ ءبىرىنشى جارتىسىنداعى قازاق تاريحىنا تەرەڭ ءىز قالدىرعان كورنەكتى تاريحي تۇلعالاردىڭ ءبىرى، مەملەكەت قايراتكەرى وراز جاندوسوۆتىڭ دۇنيەگە كەلگەنىنە بيىل - 125 جىل، دەپ حابارلايدى "ادىرنا" ۇلتتىق پورتالى.
ول 1899 جىلى 20 اقپاندا قاسكەلەڭ قالاسى، قازىرگى جاندوسوۆ اۋىلىندا دۇنيەگە كەلگەن. 1918 جىلى ۆەرنىي ەرلەر گيمنازياسىن ءبىتىرىپ، رەۆوليۋتسيالىق جۇمىسقا قاتىستى. جەتىسۋ سوۆدەپىنىڭ نۇسقاۋشىسى بولىپ، جەرگىلىكتى جەردە كەڭەس ۇكىمەتىن نىعايتۋعا اتسالىسادى.
جەتىسۋ وبلىسى رەۆوليۋتسيالىق-اسكەري كوميتەتىن جانە وبلىستىق «قوسشى» وداعىن باسقاردى. 1921-1923 جىلى تۇركىستان كپ وك-ءىنىڭ ۇگىت-ناسيحات ءبولىمىنىڭ ەكىنشى حاتشىسى بولدى.
1928-1937 جىلى قازاق اكسر اعارتۋ حالكومى، قازاق اۋىل شارۋاشىلىعى ينستيتۋتىنىڭ ديرەكتورلىعىمەن قاتار رەسپۋبليكالىق كىتاپحانانىڭ ديرەكتورى بولدى.
ۇلتارالىق قاتىناستى رەتتەۋگە كوپ ەڭبەك ءسىڭىردى. بكپ (ب)-نىڭ ءحىى جانە ءحىV, كسرو كەڭەستەرىنىڭ ەكىنشى، جەتىنشى، سەگىزىنشى سەزدىنىڭ دەلەگاتى بولدى.
1937 جىلى تامىزدا پارتيا قاتارىنان شىعارىلدى دا، جالعان ساياسي ايىپپەن تۇتقىندالدى. 1938 جىلى ناۋرىزدا اتۋ جازاسىنا كەسىلدى. 1957 جىلى سەگىزىنشى ماۋسىمدا اقتالدى. قازاق اقىنى كەنەن ازىرباەۆ جاندوسقا ارناپ ءوزىنىڭ «ورازجان» ءانىن شىعارعان. رەسپۋبليكامىزدا ونىڭ ەسىمى كوپتەگەن ەلدى مەكەندەرگە بەرىلىپ، الماتى قالاسىندا ءبىر كوشە جاندوسوۆتىڭ اتىمەن اتالىپ، ەسكەرتكىش قويىلعان.
ورازجان
ورازجان، سەركەسى ەدىڭ جەتىسۋدىڭ،
جاسىڭنان تالاپتانىپ وقۋ قۋدىڭ.
قوش-امان بول، ورازجان.
ەر اعاڭ الدىڭداعى توقاش ەلىڭ.
ەكەۋىڭ جۇبانىشپەن ەگىز تۋدىڭ.
قوش-امان بول، ورازجان.
بيىكتەپ سامولەتپەن اسپانعا ۇشتىڭ،
مىنە، ەندى اربامەنەن تاشكەن كوشتىڭ.
قوش-امان بول، ورازجان.
قوردايدىڭ اسۋىنان اسىرىپ ساپ،
الپىستاي داستارىڭمەن قوش ايتىستىم.
قوش-امان بول، ورازجان.
1922
