وراز جاندوسوۆ باعدات ءمۋسيننىڭ شتاتتان تىس كەڭەسشىسى بولىپ تاعايىندالدى

"ماعان كەز كەلگەن ساتتە كەڭەس بەرەتىن اسا تاجىريبەلى، ءوزىم ارقا سۇيەيتىن كىسىلەردىڭ ءبىرى - وراز ءاليۇلى جاندوسوۆ. ونىمەن قازپوشتادا جۇمىس ىستەگەندە تانىسقان بولاتىنمىن، ول كەزدە تاۋەلسىز ديرەكتور بولاتىن جانە ديرەكتورلار كەڭەسىنىڭ ءتورايىمى ەلەنا لەونيدوۆنا باحمۋتوۆامەن بىرگە ماعان تاجىريبەلىك تۇرعىدا كوپ قولداۋ كورسەتىپ، باعىت-باعدار جاساعان ەدى. سوندىقتان مەن ەكونوميكا سالاسىنىڭ بىلىكتى مامانى وراز جاندوسوۆقا شتاتتان تىس كەڭەسشى بولۋعا ۇسىنىس جاسادىم", - دەلىنگەن جازبادا.

قازاقستاندىق ەكونوميست، توپ-مەنەدجەر جانە مەملەكەت قايراتكەرى وراز جاندوسوۆ 1961 جىلى 26 قازاندا دۇنيەگە كەلگەن. 1983 جىلى ماسكەۋ مەملەكەتتىك ۋنيۆەرسيتەتىنىڭ ەكونوميكا فاكۋلتەتىن ۇزدىك بىتىرگەن (ەكونوميست-كيبەرنەتيك).

بۇعان دەيىن قازاقستان ۇكىمەتىنىڭ قارجى ماسەلەلەرى جونىندەگى ۆيتسە-پرەمەرى، KEGOC ۇلتتىق كومپانياسىنىڭ باسشىسى، ۇلتتىق بانكتىڭ توراعاسى، قارجى ءمينيسترى قىزمەتتەرىن اتقارعان.

«ادىرنا» ۇلتتىق پورتالى