جاڭا پرەمەر-مينيستر ولجاس بەكتەنوۆتىڭ تاپسىرماسىمەن قارجى مينيسترلىگى 10 كۇندە رەسپۋبليكالىق بيۋدجەتكە رەۆيزيا جۇرگىزەتىن بولدى، دەپ حابارلايدى “ادىرنا” ۇلتتىق پورتالى ۇكىمەتتىڭ ءباسپاسوز قىزمەتىنە سىلتەمە جاساپ.
بۇل تۋرالى پرەمەر-مينيستر ۇكىمەتتىڭ جۇماداعى كەڭەيتىلگەن وتىرىسىندا ايتتى.
«قارجى مينيسترلىگى 10 كۇن ىشىندە رەسپۋبليكالىق بيۋدجەتكە جانە ءبىر اي ىشىندە جەرگىلىكتى بيۋدجەتتەردىڭ بارلىعىنا رەۆيزيا جۇرگىزىپ، اسا ماڭىزى جوق شىعىستاردى ايتارلىقتاي قىسقارتۋى ءتيىس. ەشكىم دە اقشانى ورىنسىز شاشپاۋى كەرەك»، – دەدى پرەمەر.
سونداي-وق ول پرەزيدەنت بەرگەن تاپسىرمالاردى ىسكە اسىرۋ تۋرالى ماسەلەلەردى پىسىقتادى.
بەكتەنوۆ بيۋدجەت شىعىستارى تولىعىمەن ەكونوميكالىق تابىس اكەلۋگە باعىتتالىپ، ءونىمسىز شىعىستار تولىعىمەن جويىلۋى كەرەك ەكەنىن ناقتىلادى.
“ادىرنا” ۇلتتىق پورتالى
