پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا پرەزيدەنت قاسىم-جومارت توقاەۆتىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى حالىققا جولداۋىن جۇزەگە اسىرۋ شارالارى قارالدى. بۇل تۋرالى بۇگىن، 29 قازاندا ۇكىمەتتىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«مەملەكەت باسشىسى قاسىم-جومارت كەمەلۇلى توقاەۆ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى حالىققا جولداۋىندا ادىلەتتى، كۇشتى، تازا، وزىق قازاقستاندى قۇرۋدى باستى ماقسات رەتىندە ايقىندادى. وعان قول جەتكىزۋ ءۇشىن ەلىمىزدىڭ مول الەۋەتى مەن قازىرگى زاماناۋي يننوۆاتسيالىق جاعدايلاردا بەرىلىپ وتىرعان وراسان زور مۇمكىندىكتەردى بارىنشا ءتيىمدى پايدالانۋىمىز قاجەت.
پرەزيدەنت جاريالاعان اۋقىمدى «حالىقتىق قۇرىلىس» باعدارلاماسى ەكونوميكانىڭ بارلىق سالاسىنداعى تۇبەگەيلى ينفراقۇرىلىمدىق وزگەرىستەر مەن رەفورمالارعا جول اشادى. جالپىحالىقتىق جوبا جۇمىسپەن قامتۋ دەڭگەيىن ارتتىرىپ، ازاماتتاردىڭ ءال-اۋقاتىن جاقسارتۋعا ۇلكەن سەرپىن بەرەدى.
بۇل جولداۋ – الداعى كەزەڭگە ارنالعان مازمۇندىق تۇرعىدان ەڭ اۋقىمدى باعدارلامالىق قۇجات. ونى جۇزەگە اسىرۋ ءۇشىن ناقتى ءىس-قيمىل جوسپارىن ازىرلەۋىمىز كەرەك»، — دەپ اتاپ ءوتتى ولجاس بەكتەنوۆ.
ەلىمىزدىڭ الەۋمەتتىك-ەكونوميكالىق دامۋىنىڭ باسىم باعىتتارى بويىنشا مەملەكەتتىك ورگاندار باسشىلارى بايانداما جاسادى.
