ادىرنا ۇلتتىق پورتالىندا «ءبارى دە جاياۋلار ءۇشىن. 11 وتكەلدى جارىقتاندىرۋعا 17 ملن تەڭگە ءبولىندى. بۇل كوپ پە، از با?» دەگەن ماتەريال جاريالانعان ەدى. سول ماقالاعا "اقتوبە قالاسىنىڭ تۇرعىن ءۇي كوممۋنالدىق شارۋاشىلىعى، جولاۋشىلار كولىگى جانە اۆتوموبيل جولدارى ءبولىمى" جاۋاپ بەردى، - دەپ حابارلايدى ادىرنا ۇلتتىق پورتالى.
اتالعان ماتەريالدا ءتىلشىمىز 17 ملن تەڭگە بولىنگەن تەندەر قۇجاتتارىنداعى بىرقاتار كەمشىلىكتەردى سىناعان بولاتىن. ماسەلەن، تەندەردىڭ تەحنيكالىق سيپاتتاماسىندا كەرەكتى قۇرال-جابدىق ساتىپ الۋ تۋرالى ەشتەڭە كورسەتىلمەگەنى ايتىلدى. سونداي-اق، تەحنيكالىق سيپاتتامادا "قۇرىلىسقا بايلانىستى ەمەس، ساتىپ الىناتىن جۇمىستاردىڭ تەحنيكالىق ەرەكشەلىگى" دەگەن سويلەمنەن جەڭىمپاز كومپانيا ساتىپ الىنىپ قويعان دايىن ماتەريالداردى ورناتىپ شىعۋ جۇمىسىنا عانا مىندەتتەلىپ وتىرعانىن جازعانبىز. ياعني، تاپسىرىس ورىنداۋشى 17 ملن 244 مىڭ 591 تەڭگەگە بار بولعانى 11 جاياۋ جۇرگىنشىلەر وتكەلىنە ەلەكتر باعانالارىن ورناتىپ، جارىق جالعاپ بەرەدى دەگەن ءسوز. كورسەتىلگەن سومانى 11-گە بولسەك، ءبىر عانا جاياۋ جۇرگىنشىلەر جولىنا ەلەكتر باعاندارىن ورناتۋ جۇمىسىنا 1 ملن 567 مىڭ 690 تەڭگە قارجى جۇمسالادى ەكەن.
پورتال ءتىلشىسى وسىنداي ماسەلەلەردى ايتا كەلىپ: ءتيىستى مەكەمەگە ەكى ساۋال جولداعان:
1. جاياۋ جۇرگىنشىلەر جولىن جاساۋ، جارىقتاندىرۋ قالا تۇرعىندارىنىڭ قاۋىپسىزدىگى ءۇشىن وتە قاجەت. بىراق، اقتوبە قالاسىنداعى جاياۋ جۇرگىنشىلەردىڭ 11 وتكەلىنىڭ ۇستىنە جارىقتاندىرۋعا ارنالعان باعانداردى ورناتۋ ءۇشىن بيۋدجەتتەن 17 ملن 244 مىڭ 591 تەڭگە اقشا ءبولۋ كوپ ەمەس پە؟
2. تەحنيكالىق سيپاتتامادا جۇمىسشىلاردىڭ الاتىن جالاقىسى عانا كورسەتىلگەن. سول جالاقى 251 مىڭ 197 تەڭگە دەپ بەلگىلەنىپتى. ياعني، 17 ملن 244 مىڭ 591 تەڭگەنى يگەرىپ، 11 وتكەلدى جارىقتاندىرۋ ءۇشىن كەمى الپىسقا جۋىق مامان جۇمىسقا تارتىلۋى كەرەك دەگەن ءسوز. سوندا اقتوبەلىكتەر 11 دانا جاياۋ جۇرگىنشى جولىن جارىقتاندىرۋ ءۇشىن الپىس مامان تارتا ما؟
بۇل سۇراقتارعا «اقتوبە قالالىق تۇرعىن ءۇي كوممۋنالدىق شارۋاشىلىق، جولاۋشىلار كولىگى جانە اۆتوموبيل جولدارى ءبولىمى» مم-ءسى باسشىسى بولات سەرىكوۆ بىلاي دەپ قىسقا جاۋاپ قاتىپتى.
«حاتىڭىزدا كورسەتىلگەن 11 جاياۋ جۇرگىنشى وتكەلىنە 22 دانا جارىقتاندىرۋدى سمەتالىق قۇجاتتاما ارقىلى جۇمىستار جۇرگىزىلىپ، قوندىرىلعاندىعىن حابارلايدى. جاۋاپپەن كەلىسپەگەن جاعدايدا، 2020 جىلعى 29 ماۋسىمداعى №350-VI قر "قازاقستان رەسپۋبليكاسىنىڭ اكىمشىلىك راسىمدىك پروتسەستىك كودەكسى" كودەكسىنىڭ 91-بابىنا سايكەس، ءسىز جوعارى تۇرعان ورگانعا شاعىمدانۋعا قۇقىعىڭىز بار».
ءباسپاسوز وكىلىنىڭ ەكى سۇراعىنا «حاتىڭىزدا كورسەتىلگەن 11 جاياۋ جۇرگىنشى وتكەلىنە 22 دانا جارىقتاندىرۋدى سمەتالىق قۇجاتتاما ارقىلى جۇمىستار جۇرگىزىلىپ، قوندىرىلعاندىعىن حابارلايدى» دەگەن ءبىر سويلەمدىك جاۋاپ بەرۋ اقتوبە قالاسى شەنەۋنىكتەرىنىڭ سالعىرتتىعى ما؟ جوق، الدە «بيۋدجەت اقشاسىن قالاي جۇمساساق تا ءوزىمىز بىلەمىز. جاۋاپ تا بەرمەيمىز» دەگەن ەمەۋرىنى مە؟ بۇل اراسىن تۇسىنە المادىق. تۇسىنگەنىمىز اقتوبەلىك مەملەكەتتىك مەكەمە ون سۇراققا دا ءبىر سويلەممەن جاۋاپ بەرۋگە قابىلەتتى ەكەن. اقوردا ءجيى ايتاتىن «ەستيتىن ۇكىمەت» دەگەن وسى بولسا كەرەك. ەستيدى، بىراق جاۋاپ بەرگىسى كەلمەيدى...
قانات بىرلىكۇلى
«ادىرنا» ۇلتتىق پورتالى
