Adyrna ulttyq portalynda «Bári de jaıaýlar úshin. 11 ótkeldi jaryqtandyrýǵa 17 mln teńge bólindi. Bul kóp pe, az ba?» degen materıal jarııalanǵan edi. Sol maqalaǵa "Aqtóbe qalasynyń turǵyn úı kommýnaldyq sharýashylyǵy, jolaýshylar kóligi jáne avtomobıl joldary bólimi" jaýap berdi, - dep habarlaıdy Adyrna ulttyq portaly.
Atalǵan materıalda tilshimiz 17 mln teńge bólingen tender qujattaryndaǵy birqatar kemshilikterdi synaǵan bolatyn. Máselen, tenderdiń tehnıkalyq sıpattamasynda kerekti qural-jabdyq satyp alý týraly eshteńe kórsetilmegeni aıtyldy. Sondaı-aq, tehnıkalyq sıpattamada "Qurylysqa baılanysty emes, satyp alynatyn jumystardyń tehnıkalyq ereksheligi" degen sóılemnen jeńimpaz kompanııa satyp alynyp qoıǵan daıyn materıaldardy ornatyp shyǵý jumysyna ǵana mindettelip otyrǵanyn jazǵanbyz. Iaǵnı, tapsyrys oryndaýshy 17 mln 244 myń 591 teńgege bar bolǵany 11 jaıaý júrginshiler ótkeline elektr baǵanalaryn ornatyp, jaryq jalǵap beredi degen sóz. Kórsetilgen somany 11-ge bólsek, bir ǵana jaıaý júrginshiler jolyna elektr baǵandaryn ornatý jumysyna 1 mln 567 myń 690 teńge qarjy jumsalady eken.
Portal tilshisi osyndaı máselelerdi aıta kelip: tıisti mekemege eki saýal joldaǵan:
1. Jaıaý júrginshiler jolyn jasaý, jaryqtandyrý qala turǵyndarynyń qaýipsizdigi úshin óte qajet. Biraq, Aqtóbe qalasyndaǵy jaıaý júrginshilerdiń 11 ótkeliniń ústine jaryqtandyrýǵa arnalǵan baǵandardy ornatý úshin bıýdjetten 17 mln 244 myń 591 teńge aqsha bólý kóp emes pe?
2. Tehnıkalyq sıpattamada jumysshylardyń alatyn jalaqysy ǵana kórsetilgen. Sol jalaqy 251 myń 197 teńge dep belgilenipti. Iaǵnı, 17 mln 244 myń 591 teńgeni ıgerip, 11 ótkeldi jaryqtandyrý úshin kemi alpysqa jýyq maman jumysqa tartylýy kerek degen sóz. Sonda aqtóbelikter 11 dana jaıaý júrginshi jolyn jaryqtandyrý úshin alpys maman tarta ma?
Bul suraqtarǵa «Aqtóbe qalalyq turǵyn úı kommýnaldyq sharýashylyq, jolaýshylar kóligi jáne avtomobıl joldary bólimi» MM-si basshysy Bolat Serikov bylaı dep qysqa jaýap qatypty.
«Hatyńyzda kórsetilgen 11 jaıaý júrginshi ótkeline 22 dana jaryqtandyrýdy smetalyq qujattama arqyly jumystar júrgizilip, qondyrylǵandyǵyn habarlaıdy. Jaýappen kelispegen jaǵdaıda, 2020 jylǵy 29 maýsymdaǵy №350-VI QR "Qazaqstan Respýblıkasynyń Ákimshilik rásimdik proestik kodeksi" Kodeksiniń 91-babyna sáıkes, siz joǵary turǵan organǵa shaǵymdanýǵa quqyǵyńyz bar».
Baspasóz ókiliniń eki suraǵyna «Hatyńyzda kórsetilgen 11 jaıaý júrginshi ótkeline 22 dana jaryqtandyrýdy smetalyq qujattama arqyly jumystar júrgizilip, qondyrylǵandyǵyn habarlaıdy» degen bir sóılemdik jaýap berý Aqtóbe qalasy sheneýnikteriniń salǵyrttyǵy ma? Joq, álde «Bıýdjet aqshasyn qalaı jumsasaq ta ózimiz bilemiz. Jaýap ta bermeımiz» degen emeýrini me? Bul arasyn túsine almadyq. Túsingenimiz Aqtóbelik memlekettik mekeme on suraqqa da bir sóılemmen jaýap berýge qabiletti eken. Aqorda jıi aıtatyn «Estıtin úkimet» degen osy bolsa kerek. Estıdi, biraq jaýap bergisi kelmeıdi...
Qanat Birlikuly
«Adyrna» ulttyq portaly
