قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى يزرايل مەملەكەتىنىڭ سىرتقى ىستەر مينيسترىمەن تەلەفون ارقىلى سويلەستى، دەپ "ادىرنا" ۇلتتىق پورتالى قازاقستاننىڭ سىرتقى ىستەر مينيسترلىگىنە سىلتەمە جاساپ حابارلايدى.
قوس تاراپ ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ەكىجاقتى قارىم-قاتىناستاردىڭ ۇدەمەلى سيپاتىنا توقتالدى. يزرايل سىرتقى ىستەر ءمينيسترى تاياۋ شىعىستاعى يزرايل مەن پالەستينالىق حاماس قوزعالىسى اراسىنداعى قاقتىعىس اياسىنداعى قازىرگى جاعدايمەن تانىستىردى. سىرتقى ىستەر ءمينيسترى نۇرتىلەۋ قاقتىعىستىڭ شيەلەنىسۋىنە جانە اسكەري ءىس-قيمىل ايماعىنداعى جاعدايدىڭ ورشۋىنە الاڭداۋشىلىق ءبىلدىردى.
قر ءسىم باسشىسى قاقتىعىسۋشى تاراپتاردى تاياۋ شىعىستا بەيبىتشىلىك پەن تۇراقتىلىقتىڭ جولدارىن ىزدەۋگە شاقىردى. وسى ساتتە قازاقستاندىق ديپلومات قر پرەزيدەنتى قاسىم-جومارت توقاەۆتىڭ تمد سامميتىندەگى مالىمدەمەسىن اتاپ ءوتىپ، جاعدايدىڭ شيەلەنىسۋى تەك تاياۋ شىعىستا عانا ەمەس، جالپى الەمدە اۋىر زارداپتارعا اكەلۋى مۇمكىن ەكەنىن باسا ايتتى.
قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ يزرايلدىك ارىپتەسىنە گازا سەكتورىنداعى قازاقستان ازاماتتارىن ەۆاكۋاتسيالاۋعا جاردەمدەسۋ تۋرالى سەنىمدى ءوتىنىش ءبىلدىرىپ، بۇل مىندەتتىڭ ەلىمىز ءۇشىن ماڭىزدى ەكەنىن جەتكىزدى.