Human Rights Watch قۇقىق قورعاۋ ۇيىمى ءيزرايلدى اسكەري قىلمىستار، ەتنيكالىق تازارتۋ جانە ادامزاتقا قارسى قىلمىستار جاساعان دەپ ايىپتادى، دەپ حابارلايدى "ادىرنا" ۇلتتىق پورتالى.
ۇيىمنىڭ دەرەگىنشە، قاڭتار-اقپان ايلارىندا جۇرگىزىلگەن «تەمىر قابىرعا» وپەراتسياسى كەزىندە يوردان وزەنىنىڭ باتىس جاعالاۋىنداعى دجەنين، تۋلكارم جانە نۋر-شامس پالەستينالىق لاگەرلەرىنىڭ شامامەن 32 مىڭ تۇرعىنى كۇشتەپ ۇيلەرىنەن شىعارىلعان. ارادا ون اي وتكەنىنە قاراماستان، ولاردىڭ ەشقايسىسى تۋعان ۇيلەرىنە ورالا الماعان. ال جۇزدەگەن عيمارات قيراعان كۇيىندە قالعان.
105 بەتتەن تۇراتىن ەسەپتە يزرايل اسكەري بولىمشەلەرىنىڭ ۇيلەردى ءتىنتىپ، تۇرعىندارعا قونىستارىنان كەتۋدى دروندار ارقىلى حابارلاعان. كوشىرىلگەن تۇرعىندار تۋىستارىنىڭ ۇيلەرىنە، مەشىتتەر مەن مەكتەپتەرگە باس ساۋعالاۋعا ءماجبۇر بولعان.
Human Rights Watch زەرتتەۋشىسى ميلەنا ءانساريدىڭ ايتۋىنشا، بىردە-ءبىر وتباسى تۋعان ۇيىنە قايتا كىرە الماعان. يزرايل اسكەرى ينفراقۇرىلىم «قارۋلى توپتار قولدانباس ءۇشىن» قيراتىلعانىن ايتقانىمەن، تۇرعىنداردىڭ قاشان قايتا ورالا الاتىنى تۋرالى مالىمەت بەرمەگەن.
ۇيىم سپۋتنيكتىك سۋرەتتەردى، بۇيرىقتاردى جانە ۆيدەوجازبالاردى تالداۋ ارقىلى 850-دەن استام نىساننىڭ جويىلعانىن انىقتاعان. ال بۇۇ باعالاۋى بويىنشا بۇل كورسەتكىش 1460 عيماراتقا جەتەدى.
Human Rights Watch يزرايلدىك شەنەۋنىكتەردىڭ وپەراتسيانى «تەرروريستىك ەلەمەنتتەرگە قارسى» دەپ تۇسىندىرگەنىن، بىراق جاپپاي كوشىرۋ مەن تۇرعىنداردىڭ قايتا ورالۋىنا تىيىم سالۋدىڭ ناقتى سەبەبىن كورسەتپەگەنىن اتاپ ءوتتى.
