30 قازان كۇنى اقتوبە وبلىسىنىڭ حالىق شىعارماشىلىعى ورتالىعى «ايتىس - 2023» شاراسىنا قاتىسۋشىلاردى قوناق ءۇي جانە تاماقپەن قامتاماسسىز ەتۋ ماقساتىندا تەندەر جاريالادى، دەپ حابارلايدى ادىرنا ۇلتتىق پورتالى goszakup.gov.kz سايتىنا سىلتەمە.
«ايتىس - 2023 شاراسى اقتوبە قالاسىندا 17-19 قاراشا ارالىعىندا وتپەك. تەندەر قۇجاتتارىنا قاراعاندا شاراعا ەلىمىزدىڭ ءار وڭىرىنەن قازىلار القاسىنىڭ 6 مۇشەسى، 8 ايتىسكەر اقىن كەلمەك. ياعني، بار بولعانى 14 ادامنىڭ ءۇش كۇندىك قوناق ءۇيى مەن تاماعى ءۇشىن وبلىس بيۋدجەتىنەن 2 ملن 122 مىڭ تەڭگە بولىنگەن.
ادىلەتتىڭ اق داستارحانى ما؟
قازىلار القاسىنىڭ 6 مۇشەسى ءار كۇنى 23 مىڭ تەڭگە تۇراتىن "ليۋكس" بولمەلەردى، ال 8 ايتىسكەر ءار كۇنى 17 مىڭ تەڭگە تۇراتىن "ستاندارت" بولمەلەردى جالعا الادى. بولمەلەردە ەكى كىسىلىك توسەك بولۋى مىندەتتى. سونداي-اق قوناق ءۇي قالانىڭ ىشىندە بولۋى، ايتىسكەرلەردىڭ تاڭعى اسىن بەرۋى ءتيىس.
ايتىستى ۇيىمداستىرۋشىلار قازىلار القاسىنىڭ 6 مۇشەسىنىڭ 3 كۇندىك تۇسكى اسى ءۇشىن ادام باسىنا – 10 مىڭ، كەشكى اسىنا 15 مىڭ تەڭگەدەن قارجى جۇمساماق. دەمەك، قازىلار القاسى، بار بولعانى 6 ادام ءار كۇن سايىن تۇستە 60 مىڭ، كەشكە 90 مىڭ تەڭگەگە تاماق
ال، سەگىز ايتىسكەردىڭ تۇسكى جانە كەشكى اسىنا دەپ كۇنىنە – 120 مىڭ، ياعني ءۇش كۇنگە 360 مىڭ تەڭگە بولگەن.
وزەكجاردى سۇراقتار
مۇنىڭ سىرتىندا 18 قاراشا كۇنگە ارنالعان فۋرشەت – 30 ادامعا، ادام باسىنا 5 مىڭ تەڭگەدەن (150 مىڭ) جانە سالتاناتتى كەشتىڭ اسىنا – 30 ادامعا، ادام باسىنا 20 مىڭ تەڭگەدەن (600 مىڭ) جۇمسالماق.
تەندەردىڭ تەحنيكالىق سيپاتتاماسىنا قاراساڭىز، اقتوبەگە قازىلار القاسى مەن ايتىسكەرلەر ايتىس وتكىزۋگە ەمەس، تاماق ىشۋگە جينالاتىنداي اسەر قالدىرادى ەكەن. سالتاناتتى شارادا 30 ادام ارقايسىسى 20 مىڭنىڭ تاماعىن ءىشىپ العان سوڭ، قازىلار ءۇش كۇنگە دەپ بولىنگەن – 15 مىڭ، ايتىسكەرلەر 10 مىڭ تەڭگەنىڭ تاماعىنا جانە جۇگىرە مە؟
جوق، الدە سالتاناتتى شارانىڭ اس ءمازىرى قازىلار القاسى مەن ايتىسكەر اقىندارعا ارنالماعان با؟
بۇل سۇراقتى اقتوبە وبلىستىق مادەنيەت باسقارماسىنا جولدادىق. الداعى ۋاقىتتا ول جاقتان جاۋابىن دا جاريالايتىن بولامىز.
قانات بىرلىكۇلى
«ادىرنا» ۇلتتىق پورتالى
