30 qazan kúni Aqtóbe oblysynyń Halyq shyǵarmashylyǵy ortalyǵy «Aıtys - 2023» sharasyna qatysýshylardy qonaq úı jáne tamaqpen qamtamassyz etý maqsatynda tender jarııalady, dep habarlaıdy Adyrna ulttyq portaly goszakup.gov.kz saıtyna silteme.
«Aıtys - 2023 sharasy Aqtóbe qalasynda 17-19 qarasha aralyǵynda ótpek. Tender qujattaryna qaraǵanda sharaǵa elimizdiń ár óńirinen qazylar alqasynyń 6 múshesi, 8 aıtysker aqyn kelmek. Iaǵnı, bar bolǵany 14 adamnyń úsh kúndik qonaq úıi men tamaǵy úshin oblys bıýdjetinen 2 mln 122 myń teńge bólingen.
ÁDILETTIŃ AQ DASTARHANY MA?
Qazylar alqasynyń 6 múshesi ár kúni 23 myń teńge turatyn "lıýks" bólmelerdi, al 8 aıtysker ár kúni 17 myń teńge turatyn "standart" bólmelerdi jalǵa alady. Bólmelerde eki kisilik tósek bolýy mindetti. Sondaı-aq qonaq úı qalanyń ishinde bolýy, aıtyskerlerdiń tańǵy asyn berýi tıis.
Aıtysty uıymdastyrýshylar qazylar alqasynyń 6 múshesiniń 3 kúndik túski asy úshin adam basyna – 10 myń, keshki asyna 15 myń teńgeden qarjy jumsamaq. Demek, qazylar alqasy, bar bolǵany 6 adam ár kún saıyn túste 60 myń, keshke 90 myń teńgege tamaq ishedi degen sóz. Aqtóbelik shendiler 6 qazyny eki ýaqyt tamaqtandyrý úshin halyqtyń salyǵynan jınalǵan qarjydan – 150 myń, úsh kúnde 450 000 teńge jumsaıdy.
Al, segiz aıtyskerdiń túski jáne keshki asyna dep kúnine – 120 myń, ıaǵnı úsh kúnge 360 myń teńge bólgen.
ÓZEKJARDY SURAQTAR
Munyń syrtynda 18 qarasha kúnge arnalǵan fýrshet – 30 adamǵa, adam basyna 5 myń teńgeden (150 myń) jáne saltanatty keshtiń asyna – 30 adamǵa, adam basyna 20 myń teńgeden (600 myń) jumsalmaq.
Tenderdiń tehnıkalyq sıpattamasyna qarasańyz, Aqtóbege qazylar alqasy men aıtyskerler aıtys ótkizýge emes, tamaq ishýge jınalatyndaı áser qaldyrady eken. Saltanatty sharada 30 adam árqaısysy 20 myńnyń tamaǵyn iship alǵan soń, qazylar úsh kúnge dep bólingen – 15 myń, aıtyskerler 10 myń teńgeniń tamaǵyna jáne júgire me?
Joq, álde saltanatty sharanyń as máziri qazylar alqasy men aıtysker aqyndarǵa arnalmaǵan ba?
Bul suraqty Aqtóbe oblystyq Mádenıet basqarmasyna joldadyq. Aldaǵy ýaqytta ol jaqtan jaýabyn da jarııalaıtyn bolamyz.
Qanat Birlikuly
«Adyrna» ulttyq portaly
