اقتوبە وبلىسىندا سوت جۇبانوۆ اتىنداعى اۋىلدىق وكرۋگتىڭ اكىمى ءلاززات بەردىباەۆاعا قاتىستى ءىستى ۋاقىتشا توقتاتتى. بۇل تۋرالى قازاقپارات اگەنتتىگى جاريالادى، دەپ حابارلايدى “ادىرنا”.
ايتا كەتسەك، ءلاززات بەردىباەۆانىڭ دالادا گۇل ۇستاعان سۋرەتى قوعامدا ۇلكەن رەزونانس تۋدىرعان بولاتىن.
سوتتىڭ ايتۋىنشا، بەردىباەۆا ۇستاعان قىزعالداقتىڭ ناقتى ءتۇرىن انىقتاۋ قاجەت. سول سەبەپتى ارنايى ساراپتاما تاعايىندالعان.
سۋديانىڭ ايتۋىنشا، ءلاززات بەردىباەۆاعا مۇعالجار اۋدانىنىڭ اكىمىنەن جاعىمدى مىنەزدەمە كەلىپ تۇسكەن. وندا بەردىباەۆانىڭ ەشقانداي تارتىپتىك جازا الماعانى، جۇمىسىن جاقسى اتقاراتىنى جانە حالىقپەن سىپايى قارىم-قاتىناستا ەكەنى ايتىلعان.
"اكىمشىلىك ءىستى قاراۋ بارىسىندا سوت كەلەسىدەي شەشىمگە كەلدى: ءلاززات بەردىباەۆاعا قاتىستى تولتىرىلعان حاتتامادا كورسەتىلگەن نەگىزدەردى جان-جاقتى ءارى وبەكتيۆتى تۇردە زەرتتەۋ ءۇشىن، اكىمشىلىك قۇقىق بۇزۋشىلىق تۋرالى كودەكستىڭ 757, 777, 824 جانە 829-باپتارىنا سايكەس، سوت ءوز باستاماسىمەن قىزعالداقتىڭ ءتۇرىن انىقتاۋ ماقساتىندا ارنايى ساراپتاما تاعايىنداۋ تۋرالى قاۋلى شىعاردى. وسىعان بايلانىستى اكىمشىلىك ءىستى قاراۋ ساراپتاما اياقتالعانعا دەيىن توقتاتىلادى", – دەدى سۋديا.
الدىڭعى وتىرىستا ءلاززات بەردىباەۆا گۇلدەر جۇلىنعان جەردە تىيىم سالىنعان بەلگىلەر بولماعانىن، ال اۋماقتىڭ جايىلىمدىق جەر ەكەنىن ايتتى. سونىمەن قاتار، ءىستىڭ ماتەريالدارىندا ەشقانداي ساراپتامالىق قورىتىندى مەن گۇلدەردىڭ سيرەك نەمەسە قورعالاتىن ءتۇر ەكەنىن دالەلدەيتىن ايعاق جوق ەكەنىن جەتكىزدى. اۋىل اكىمى گۇلدەردى جۇلماۋ تۋرالى قىزدارىن الدىن الا ەسكەرتكەنىن دە اتاپ ءوتتى.
اقتوبە وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باس مامانى ارتۋر كانتارباەۆتىڭ ايتۋىنشا، قىزعالداقتىڭ ناقتى ءتۇرىن تەك عىلىمي-زەرتتەۋ ينستيتۋتى انىقتاي الادى. ونىڭ مالىمەتىنشە، بۇل وڭىردە ءۇش ءتۇرلى قىزعالداق وسەدى، سونىڭ ىشىندە شرەنك قىزعالداعى دا بار.
بۇعان دەيىن پوليتسيا ءلاززات بەردىباەۆاعا قاتىستى كامەلەتكە تولماعان بالانى تاربيەلەۋ جانە باعىپ-قاعۋ مىندەتتەرىن ورىنداماعانى ءۇشىن اكىمشىلىك حاتتاما تولتىرىلعانىن حابارلاعان.
