ءال-فارابي اتىنداعى قازاق ۇلتتىق ۋنيۆەرسيتەتى، جۋرناليستيكا فاكۋلتەتىنىڭ وقىتۋشىسى قاستاي داستان قۋاندىقۇلى ۋنيۆەرسيتەت باسشىلىعىنىڭ ەشبىر سەبەپسىز جۇمىستان شىعارىپ جىبەرگەنىنە قاتىستى نارازىلىعىن ءبىلدىردى. بۇل تۋرالى فەيسبۋك پاراقشاسىندا جازدى، دەپ حابارلايدى «ادىرنا» ۇلتتىق پورتالى.
داستان قاستايدىڭ سوزىنشە، بۇل وقيعاعا سەبەپ – «كەمەل توقاەۆ» اتىنداعى اۋديتوريانىڭ اشىلۋى. تاۋەلسىز باق-تىڭ «توقاەۆ اتىنداعى اۋديتورياعا قاتىستى» اقپاراتىنان كەيىن جۋرناليستيكا فاكۋلتەتىنىڭ وقىتۋشىلارى قاتتى قىسىمعا ۇشىراعان. ال ۋنيۆەرسيتەت تاراپى مۇنداي قادامعا بارعانىنا قاتىستى تۇسىنىك بەرۋدەن باس تارتقان.
وقيعادان كەيىن داستان قاستاي قر پرەزيدەنتى قاسىم-جومارت توقاەۆقا، قر عىلىم جانە جوعارى ءبىلىم ءمينيسترى ساياسات نۇربەككە، قر مادەنيەت جانە اقپارات ءمينيسترى ايدا بالاەۆاعا اشىق حات جولداعان.
«مەن، قر ازاماتى، ءال-فارابي اتىنداعى قازاق ۇلتتىق ۋنيۆەرسيتەتى، جۋرناليستيكا فاكۋلتەتىنىڭ وقىتۋشىسى قاستاي داستان قۋاندىقۇلى اكادەميالىق ادىلدىكتى تالاپ ەتەمىن! وقىتۋشىلىق جۇمىسىمنىڭ التىنشى اپتاسى باستالعاندا ەشبىر «ويعا قونىمدى» سەبەپسىز ءال-فارابي اتىنداعى قازاق ۇلتتىق ۋنيۆەرسيتەتىندەگى جۇمىستان شىعارىلدىم. ۋنيۆەرسيتەت تاراپى نەلىكتەن مۇنداي قادامعا بارعانىنا قاتىستى تۇسىنىك بەرۋدەن باس تارتتى. قۇرمەتتى مەملەكەت باسشىسى، مينيسترلەر، كوز الدىمدا مەنىڭ ازاماتتىق قۇقىم تاپتالىپ، وقىتۋشىلىق بولمىسىما، كاسىبي قىزمەتىمە نۇقسان كەلىپ جاتىر. قازۇۋ باسشىلىعىنا، ءامىرشىل-اكىمشىل جۇيەنى شەبەرلىكپەن جۇزە اسىراتىن جاندارعا «تاۋەلسىزدىك ۇرپاعىنىڭ» ۇستانىمى، ساناسى اشىق ازاماتتىق وقىتۋشىلىق امبيتسياسى ۇناماسا كەرەك. مەنىمەن ايقاس جازۋشى-جۋرناليست «كەمەل توقاەۆ اۋديتورياسى» اشىلعاننان كەيىن باستالدى» - دەپ جازعان داستان قاستاي.
سونداي-اق داستاننىڭ جۇمىستان شىعىپ قالعانىن ەستىگەن كەيبىر ستۋدەنتتەردىڭ ايتۋىنشا، جاتاقحانادا ۇلكەن جينالىس بولعان. «توقاەۆ اۋديتورياسى» اشىلعاننان كەيىن ۋنيۆەرسيتەت باسشىلىعى تاۋەلسىز بۇقارالىق اقپارات قۇرالدارىنا ەشقانداي دا سۇحبات بەرمەۋدى تالاپ ەتكەن. ستۋدەنتتەردىڭ باسىم بولىگى ۋنيۆەرسيتەت اكىمشىلىگىنىڭ شەشىمىنە كەلىسپەي، اكادەميالىق تالاپ-شاعىمىن جولداعان.
سونىمەن قاتار داستان قاستاي ۋنيۆەرسيتەت باسشىلىعىنىڭ جازالانۋىن بيلىك وكىلدەرىنەن تالاپ ەتكەن.
«ميپازدىق داۋرەنى ءوتتى. جاڭا كۇن شىعىپ كەلەدى. ازاماتتىق قوعامعا جاڭا قۇندىلىق، ءجوندى جەتەكشى قاجەت. مەنى ەش سەبەپسىز جۇمىستان شىعارعان جانە ار-نامىسىما نۇقسان كەلتىرگەن ۋنيۆەرسيتەت باسشىلىعىنىڭ جازالانۋىن جانە قازۇۋ-داعى ءبىلىم ساياساتىنىڭ وزگەرتىلۋىن تالاپ ەتەمىن!»، - دەيدى داستان.
داستان جولداعان اشىق حاتقا قر عىلىم جانە جوعارى ءبىلىم ءمينيسترى ساياسات نۇربەك جاۋاپ قاتتى.
«قۇرمەتتى داستان قۋاندىقۇلى، قازىرگى ۋاقىتتا الماتى قالاسىندا ءىس-ساپاردامىن. ءسىزدىڭ ماسەلەڭىزدى باقىلاۋىما الدىم. بۇگىن ۋنيۆەرسيتەت باسشىلىعىمەن كەزدەسۋ وتكىزەمىن جانە ماسەلەنىڭ وڭ شەشىلۋى ءۇشىن ات سالىسامىن. ءبىزدىڭ مينيسترلىكتىڭ جانە مەنىڭ باستى ماقساتىم ءار ۇستاز بەن ستۋدەنتتىڭ قۇقىعىن قورعاپ، قولداۋ. ماعان جەكەمە تەلەفون نومەرىڭىزدى قالدىرۋدى سۇرايمىن»، - دەپ جازعان مينيستر.
«ادىرنا» ۇلتتىق پورتالى
