قازاق ۇلتتىق قىزدار پەداگوگيكالىق ۋنيۆەرسيتەتىنە مەملەكەت تاراپىنان جاڭا عيمارات زاڭدى تۇردە پايدالانۋعا بەرىلدى. بۇل تۋرالى ۋنيۆەرسيتەت رەكتورىنىڭ مىندەتىن اتقارۋشى ەركىن ءدۇسىپوۆ باق وكىلدەرىمەن كەزدەسۋدە ايتتى.
2024 جىلدىڭ 18 قىركۇيەگىندە قازاق ۇلتتىق قىزدار پەداگوگيكالىق ۋنيۆەرسيتەتىندە باق وكىلدەرىنە ارنالعان ءباسپاسوز تۋرى ءوتتى. جۋرناليستەرگە جوعارى وقۋ ورنىنىڭ عيماراتىندا تۋر وتكىزىلىپ، زەرتحانالار، مۇراجاي، ارت گالەرەيا تانىستىرىلدى. باس كورپۋستان كەيىن ۋنيۆەرسيتەتتىڭ جاڭا كورپۋسىنا تۋر جاسالدى. 80 جىلدىق تاريحى بار قازاق ۇلتتىق قىزدار پەداگوگيكالىق ۋنيۆەرسيتەتىنىڭ 1986 جىلدان بەرى العاش رەت الماتى قالاسىنىڭ ورتالىعىندا وقۋ عيماراتىنا يە بولدى. مەملەكەتتەن بەرىلگەن وقۋ عيماراتىنىڭ اۋدانى 12 000 شارشى مەتردەن اسادى.
ءباسپاسوز تۋرى بارىسىندا جۋرناليستەرگە QyzPU رەكتورىنىڭ مىندەتىن اتقارۋشى ەركىن ءدۇسىپوۆ وقۋ ورنىنىڭ جەتىستىكتەرى مەن دامۋ پرەسپەكتيۆالارى تۋرالى اقپارات بەردى. پرورەكتور قوناقتاردى زاماناۋي ءبىلىم بەرۋ الاڭدارىمەن، سونداي-اق ۋنيۆەرسيتەتتە ءبىلىم بەرۋ پروتسەسىنە ەنگىزىلىپ جاتقان زاماناۋي ادىستەرمەن تانىستىرىپ، العا قويعان جوسپارلارمەن ءبولىستى.
«80 جىلدىق مەرەيتوي قارساڭىندا قازاق ۇلتتىق قىزدار پەداگوگيكالىق ۋنيۆەرسيتەتىنە جاڭا وقۋ كورپۋسىنىڭ بەرىلۋى QyzPU ۇجىمى ءۇشىن تاريحي وقيعا بولدى. جاڭا عيمارات ۋنيۆەرسيتەتكە شىلدە ايىنان باستاپ زاڭدى تۇردە پايدالانۋعا بەرىلدى. قازىرگى تاڭدا ءۇشىنشى، ءتورتىنشى، التىنشى قاباتتاردا حورەوگرافيا، پەداگوگيكا، پسيحولوگيا، تاريح، قازاق ءتىلى مەن ادەبيەتى ماماندىقتارى بويىنشا وقۋ ءجۇرىپ جاتىر. بولاشاقتا ماگيسترانتتار مەن دوكتورناتتاردى دا وسى عيماراتتا وقىتۋدى جوسپارلاپ وتىرمىز. ءبىلىم ورداسىندا جالپى سانى 12005 ستۋدەنت بار. بيىل 1 كۋرسقا 5000-عا جۋىق ستۋدەنتتى قابىلدادىق. ءبىلىم الۋشىلارعا جاعداي جاساۋ – ءبىزدىڭ مىندەتىمىز»، – دەدى پرورەكتور.
ونىڭ ايتۋىنشا، الداعى ۋاقىتتا جاڭا عيماراتقا تاعى دا زاماناۋي قۇرال-جابدىقتار الىنادى.
