بۇگىن، 19 ماۋسىم كۇنى الماتىدا، ءال-فارابي اتىنداعى قازاق ۇلتتىق ۋنيۆەرسيتەتىنىڭ الدىندا بيىلعى مەكتەپ تۇلەكتەرىنىڭ ءبىرى سۋبۇرقاققا ءتۇسىپ، قازا تاپتى.
كۋاگەرلەردىڭ سوزىنشە، وقيعا 16:00 شاماسىندا بولعان. الماتى قالاسىنداعى جالعىز ۇبت تاپسىرۋ ورتالىعى بولىپ سانالاتىن قازاق ۇلتتىق ۋنيۆەرسيتەتى اۋماعىنداعى عيماراتتان سىناق تاپسىرىپ شىققان تۇلەكتەر سۋبۇرقاقتا سۋ شاشىپ ويناعان كورىنەدى. ويىن بارىسىندا بالانىڭ اياعى تايىپ قۇلاعان.
بەيرەسمي مالىمەتتەردە، سۋبۇرقاق ىشىندەگى ەلەكتر توعى قاتتى سوعىپ بالانىڭ جۇرەگى توقتاپ قالعانى ايتىلادى. مارقۇمنىڭ جانىنداعى ەكى دوسى كومەك كورسەتۋگە تىرىسقان. الايدا قايتىس بولعان ادامنىڭ دەنەسى اۋىر بولعاندىقتان سۋدان الىپ شىعۋ وڭايعا سوقپاعان.
وقيعادان سوڭ شامامەن 1 ساعاتتا جەدەل-جاردەم مەن ءتارتىپ ساقتاۋ قىزمەتكەرلەرى كەلىپ جەتكەن. ءمايىتتىڭ ءۇستىن جاۋىپ، تەكسەرىستەن وتكىزگەن سوڭ ۋنيۆەرسيتەت اۋماعىنان الىپ كەتتى. مارقۇمنىڭ اعاسى دا وقيعا ورنىنا جەتىپ، ءوز كوزىمەن كوردى.
كوز جۇمعان بالانىڭ ۋنيۆەرسيتەت ستۋدەنتى ەمەستىگى ايتىلدى. قايعىلى وقيعاعا قاتىستى قالالىق پوليتسيا دەپارتامەنتى «بۇل فاكتى بويىنشا تەرگەۋ باستالدى. سوت-مەديتسينالىق ساراپتاما تاعايىندالدى»، - دەپ جاۋاپ بەردى.
فاريزا نۇربولاتقىزى
