شەشە!
كىشكەنتايىمىزدان باستاپ انامىز ومىردەن وتكەنشە شەشە دەپ وتتىك. ءبىز ءۇشىن كوكە، شەشە دەگەن ۇعىمدار ەڭ قاسيەتتى ۇعىمدار ەدى. كۇللى قازاق ءۇشىن دە سولاي.
كەيىن شەشەدەن باستاپ بوقتاۋدى كادىمگى ادەتتەگى كوپ بوقتىقتىڭ ءبىرى رەتىندە قولدانعاندى كورگەندە جۇرەگىم اۋىراتىن. شەشە ءسوزىن سول بوقتىق ءۇشىن دە اۋىز ەكى تىلدە ايتپايتىن ۇرپاق قالىپتاسىپ كەتتى. شەشەم دەپ ايتۋدان ءبىر ءتۇرلى بولادى. ءوزىمىز دە ورنىنا انا، اناشىم دەپ ادەبي تەرميندە جازاتىن، بالالارىمىز دا سولاي اتايتىن بولدى.
بىردە وسى شەشە دەگەن ءسوز قازاقتا قولدانىستان بىرتە بىرتە شىعىپ كەتەدى-اۋ دەپ ويلايتىنمىن. سەبەبى، بۇگىندە تۇتاس قوعام مەكتەپتەگى اكە-شەشەنىڭ جينالىسىن اتا-انالار جينالىسى دەپ وزگەرتتىك. ايتپەسە اتا باسقا، اكە باسقا ەكەنىن كۇللى قازاق جاقسى بىلەدى. اتا-اپا، اتا-اجە جينالىسى بولسا ءبىر ءسارى ايتپەسە اكە-شەشە، اكە-انا جينالىسى بولۋى كەرەك ەدى عوي... مۇمكىن ۇيقاس قۋعان قاۋىم جازا سالعان شىعار اتا-انالار دەپ...
ءجا، ايتپاعىم سول شەشە دەگەن ءسوزدى دۇمشە مولدا ءدىن بۇزار دەگەندەي ءبىر دۇمشە مولدا تاعى قورلاپتى. شەشەنسىنىپ كەتكەندە شەشە دەگەندى قازاق ۇعىمىنداعى كوكەك انانىڭ اتى دەگەنگە اپارىپتى.
جامان ءيتتىڭ اتىن ءبورباسار دەيدى دەگەندەي كەيبىر ادامدار ونى ۇستاز دەپ جاتىر. اينالايىن قازاقتىڭ قاسيەتتى ۇعىمدارىمەن وينايتىن ول قانداي ۇستاز؟ ۇستاز ەمەس نادان عوي.
شەشە!
مەنىڭ شەشەم دەپ جازعان قازاقتىڭ بايىرعى اقىن-جازۋشىلارى، كۇي شىعارعان كۇيشىلەرى اقىماق ەكەن دا سوندا، ءسوزدىڭ پارقىن بىلمەيتىن!
اكە-شەشە قازاقتا ەگىز ۇعىم، قاسيەتتى ۇعىمدار!
وسى قازاقتىڭ قاسيەتتى ۇعىمدارىنا بىرتىندەپ شابۋىلدايتىن قاۋىم نە دەگەن كوبەيىپ كەتتى...
بىرەسە مادەنيەتى مەن اسپابىنا (دومبىرا), بىرەسە داستۇرىنە، بىرەسە تىلىنە، سوزىنە...
بۇندايلارعا تيىم سالماسا، قازاق تانىمىن قۇردىمعا جىبەرەدى!
P.S.
شەشە،
سەن باقىتتىسىڭ!
جىلاماعىن.
جاي ءتۇسىپ جاتقاندا دا قۇلامادىڭ.
تاڭىرىڭنەن مەن ەدىم عوي سۇراعانىڭ،
سوندىقتان جىلاماعىن، جىلاماعىن!
مۇقاعالي ماقاتاەۆ.
