بۇگىن قالا كۇنى قارساڭىندا وبلىس اكىمى نۇرلىبەك نالىباەۆتىڭ قاتىسۋىمەن «جايلى مەكتەپ» ۇلتتىق جوباسى اياسىندا قىزىلوردانىڭ سول جاعالاۋىنا سالىنعان 900 ورىندىق ءبىلىم وشاعىنىڭ سالتاناتتى اشىلۋ ءراسىمى ءوتتى. بۇل تۋرالى قىزىلوردا وبلىسى اكىمىنىڭ ءباسپاسوز قىزمەتى حابارلادى.
ءىس-شاراعا جاۋاپتى سالالاردىڭ، قۇقىق قورعاۋ ورگاندارىنىڭ باسشىلارى، حالىقارالىق قارتتار كۇنى قارساڭىندا ايماق باسشىسىنىڭ ارنايى شاقىرتۋىمەن بارلىق اۋداننان كەلگەن ارداگەرلەر، زيالى قاۋىم وكىلدەرى قاتىستى.
ايماق باسشىسى قالا تۇرعىندارىن جاڭا مەكتەپتىڭ اشىلۋىمەن قۇتتىقتاپ، جينالعان جۇرتشىلىققا ىزگى تىلەگىن ايتتى.
«جاس ۇرپاقتىڭ ءبىلىمى مەن وقۋ-اعارتۋ ىسىنە بارىنشا كوڭىل ءبولۋ – مەملەكەتىمىزدىڭ ەڭ ماڭىزدى مىندەتى. بيىل ءوڭىردىڭ ءبىلىم سالاسىنا بولىنگەن قارجى 262 ملرد 100 ملن تەڭگەگە جەتىپ، وبلىس بيۋدجەتىنىڭ 35,2 پايىزىن قۇرادى.
مەملەكەت باسشىسىنىڭ باستاماسىمەن «جايلى مەكتەپ» ۇلتتىق جوباسى ەلىمىزدىڭ بارلىق ايماعىندا جۇزەگە اسىرىلۋدا. ۇلتتىق جوبا اياسىندا 740 مىڭ وقۋشىعا ارنالعان 369 مەكتەپ سالىنادى.
وسى جوبامەن وڭىرىمىزدە 12 300 ورىنعا لايىقتالعان 21 مەكتەپ سالۋ جوسپارلانعان، ونىڭ 10-نىڭ قۇرىلىسى جۇرگىزىلۋدە. «جايلى مەكتەپ» جوباسىن ىسكە اسىرۋ ارقىلى ايماعىمىزداعى 4 اپاتتى جانە 3 بەيىمدەلگەن مەكتەپتىڭ ماسەلەسى تۇبەگەيلى شەشىمىن تابادى.
بۇگىن رەسپۋبليكالىق بيۋدجەتتىڭ تىكەلەي قارجىلاندىرۋىمەن، «سامۇرىق-قازىنا» اكتسيونەرلىك قوعامىنىڭ ۇيلەستىرۋىمەن، 6 ملرد 851 ملن تەڭگەگە سالىنعان وبلىستاعى العاشقى 900 ورىندىق «جايلى مەكتەپ» ەل يگىلىگىنە بەرىلۋدە. بۇل عيمارات قىزىلوردا قالاسىنىڭ سول جاعالاۋى تۇرعىندارىنىڭ مەملەكەتتىك مەكتەپكە دەگەن سۇرانىسىنا تولىق جاۋاپ بەرەدى.
ءبىلىم ورداسىندا شاكىرتتەردىڭ بارلىق ءپاندى وقىپ ۇيرەنۋىنە، ۇستازداردىڭ شىعارماشىلىقپەن ەڭبەك ەتۋىنە تولىق مۇمكىندىك جاسالعان. وسكەلەڭ ۇرپاقتىڭ يگىلىگى ءۇشىن جاڭاقورعان، شيەلى اۋداندارىندا 200 ورىندىق وقۋشىلار ءۇيى مەن 50 ورىندىق ونەر مەكتەبى، «ساۋتسويل» كومپانياسىنىڭ دەمەۋشىلىگىمەن مۋزىكالىق كوللەدجدىڭ جاڭا عيماراتى، شىعارماشىلىق-يننوۆاتسيالىق ورتالىق، «ءبىلىمدى قولداۋ قورى» ەسەبىنەن فيزيكا-ماتەماتيكا مەكتەپ-ينتەرناتى سالىنۋدا. مەكتەپ-ينتەرنات ەكىنشى توقساندا پايدالانۋعا بەرىلەدى.
جاڭا مەكتەپ سالۋ، اپاتتى مەكتەپتەر مەن ءۇش اۋىسىمدىق وقىتۋدى جويۋ – ءبىلىم سالاسىنداعى باسىم باعىتتىڭ ەڭ ماڭىزدىسى. وسى ءبىلىم وشاعىندا ۇستاز بەن شاكىرت، مەكتەپ پەن اتا-انا بايلانىسى ارتىپ، الدىڭعى بۋىننىڭ ىزگى جولىن جالعاعان ءبىلىمدى دە تالانتتى، ساناسى سەرگەك، ويى ۇشقىر، باسەكەگە قابىلەتتى جاس ۇرپاق تاربيەلەنىپ شىعارىنا سەنىمىمىز مول.
جاڭا وقۋ جىلىندا بيىك تابىستارعا قول جەتكىزىپ، العا قويعان ماقساتتارىڭىز ورىندالسىن! ەل مۇددەسى جولىنداعى يگى ىستەردى بىرگە اتقارايىق، جەتىستىككە بىرگە جەتەيىك! ەگەمەن ەلىمىزدىڭ ەرتەڭى ەڭسەلى، تاۋەلسىزدىگىمىز تۇعىرلى بولعاي!»، – دەدى نۇرلىبەك نالىباەۆ.
جيىندا «سامۇرىق-قازىنا كونستراكشن» اكتسيونەرلىك قوعامىنىڭ باسقارما توراعاسى ماۋلەن ايمانبەتوۆ قالا تۇرعىندارىن جاڭا مەكتەپتىڭ اشىلۋىمەن قۇتتىقتاپ، قاتىسۋشىلارعا يگى تىلەگىن جەتكىزدى.
جىل سوڭىنا دەيىن 12 جاڭا مەكتەپ جانە 4 مەكتەپ جانىنداعى قوسىمشا قۇرىلىس اياقتالىپ، پايدالانۋعا بەرىلەدى. وتكەن جىلى وبلىس ورتالىعىنداعى 4 مەكتەپكە 1 850 وقۋشىعا ارنالعان قوسىمشا عيمارات سالىندى. بيۋدجەتكە سالماق تۇسىرمەي، قارجىنى ۇنەمدەۋ ارقىلى ورىن تاپشىلىعى، ءۇش اۋىسىمدى وقىتۋعا كوشۋى مۇمكىن مەكتەپتەر ماسەلەسى شەشىمىن تاپتى.
بىلتىر 1 170 ورىندىق 4 مەكتەپ، وسى جىلدىڭ باسىندا
550 ورىندىق 2 مەكتەپ قولدانىسقا بەرىلدى. بيىلعى جاڭا وقۋ جىلى قارساڭىندا شيەلى اۋدانىندا «ءبىلىم بەرۋ ينفراقۇرىلىمىن قولداۋ» قورىنىڭ قارجىلاندىرۋىمەن 100 ورىندىق، جاڭاقورعان اۋدانىندا جەرگىلىكتى بيۋدجەت ەسەبىنەن 150 ورىندىق مەكتەپتەر ەل يگىلىگىنە تابىستالدى.
سالتاناتتى ءىس-شارادا زاماناۋي ءبىلىم ورداسىنىڭ قۇرىلىسىن جۇرگىزگەن مەردىگەر مەكەمەنىڭ قىزمەتكەرلەرى وبلىس اكىمىنىڭ العىس حاتىمەن ماراپاتتالدى.
