"مادەنيەتتى انا - مادەنيەتتى ۇلت" جوباسى قولعا الىنباقشى - ەلميرا سايلاۋقىزى

8797
Adyrna.kz Telegram

قاراعاندى وبلىسى قحا جانىنداعى انالار كەڭەسى جاستارمەن «اتا-انا مەيىرىمى»، «اكەنىڭ وتباسىنداعى ءرولى» تاقىرىبىندا كەزدەسۋ ۇيىمداستىردى، دەپ حابارلايدى «ادىرنا» ۇلتتىق پورتالىنىڭ ءتىلشىسى.

كەزدەسۋ بارىسىندا اتا-انا مەن بالا اراسىنداعى ءوزارا قارىم-قاتىناس، وتباسىنداعى كيكىلجىڭ مەن كەلىسپەۋشىلىك تۋدىراتىن جاعدايلاردىڭ الدىن-الۋ جولدارى، اتا-انانىڭ بالاعا دەگەن مەيىرىمى، سەزىمى، ماحابباتى قانشالىقتى ماڭىزدى ەكەنى، سونداي-اق بالا تاربيەسىندەگى اكە ءرولى سىندى بىرقاتار الەۋمەتتىك ماسەلەلەر تالقىعا ءتۇستى.

- انالار كەڭەسىنىڭ جۇمىسى وبلىس كولەمىندە قارقىندى اتقارىلىپ جاتىر. بيىل مادەني ءىس-شارالاردان بولەك 600-دەن اسا قايىرىمدىلىق جاسالدى. بۇگىنگى كەزدەسۋ اتا-انا مەن بالانىڭ اراسىنداعى قارىم-قاتىناستىڭ ءار الۋان بولاتىن ەرەكشەلىكتەرىن ۇعىندىرىپ، اراداعى وتباسىلىق بايلانىستى جاقسارتىپ، جاڭا ساپالىق دەڭگەيگە كوتەرۋگە باعىتتالعان، - دەدى قحا انالار كەڭەسى ءتورايىمىنىڭ ورىنباسارى، بەلگىلى اقىن، مادەنيەتتانۋشى ەلميرا سايلاۋقىزى.

كوپبالالى انانىڭ ايتۋىنشا، بيىل انالار كەڭەسىنىڭ ءتورايىمى ءلاززات تايمىرقىزى باستاعان انالار قارقارالى، جەزقازعان قالالارىندا انالارمەن كەزدەسىپ وتباسىلىق قۇندىلىقتاردى دارىپتەۋ، جاس جانۇياعا قوعام الدىنداعى جاۋاپكەرشىلىكتى سەزىنۋ سياقتى تاقىرىپتاردا تۇراقتى تۇردە كەزدەسۋلەر ۇيىمداستىرىپ كەلەدى.

- الداعى ۋاقىتتا "مادەنيەتتى انا-مادەنيەتتى ۇلت" جوباسى، "قىز وسسە ەلدىڭ كوركى" اتتى كەزدەسۋلەر، "ونەرلىنىڭ قولى التىن" اتتى شەبەرلىك ساباقتارى 2022 جىلدىڭ جوسپارىنا ەنگىزىلىپ باستى نازارعا الىنىپ وتىر. سونىمەن قاتار انالار كەڭەسىنىڭ قۇرامىن تولىقتىرۋ جوسپارلانۋدا، - دەپ قورىتىندىلادى ءسوزىن ەلميرا ورىنباەۆا.

ايتا كەتەتىن جايت، 2021 جىلى كوپ بالالى انالاردى قولداۋ بويىنشا قاراعاندى وبلىسى قحا جانىنداعى انالار كەڭەسى 800-گە جۋىق ءىس-شارا وتكىزدى. ايماق بويىنشا ونىڭ 1111-نان استام مۇشەسى بار. جالپى وبلىس بويىنشا 189 انالار كەڭەسى جۇمىس اتقارۋدا.

"ادىرنا" ۇلتتىق پورتالى

پىكىرلەر