بەلگىلى ساياساتكەر عالىمجان جاقيانوۆ بۇرىنعى دوسى، ءارى ارىپتەسى تولەن توقتاسىنوۆ ەكەۋىنىڭ اراسىنداعى سوت بارىسى جانە ونىڭ جاڭعىرىعى تۋرالى مالىمدەمە جاسادى.
ول بۇل تۋرالى Facebook جەلىسىندەگى پاراقشاسىندا جاريالاعان. جاقيانوۆ قاڭتار وقيعاسىنان كەيىن بيلىك باسشىلارىن سىناعانىن، وعان تىكەلەي جاۋاپ بولماعانىن، بىراق قازىر وسى سىنعا بيلىك باسقاشا جاۋاپ بەرىپ وتىرعانىن ايتقان. ونىڭ ويىنشا، “بيلىككە تاۋەلدى كەيبىر اقپارات قۇرالدارى” وسى جايتتى پايدالانىپ، “لاقاپ” تاراتىپ جاتىر ەكەن.
ماسەلە "ادىرنا" ۇلتتىق پورتالىنا قاتىستى ايتىلعاندىقتان، پورتال ارقانداي “لاقاپ”، نەمەسە داقپىرت مالىمەت تاراتۋعا جانە بەلگىلى ءبىر تاراپتى جاقتاپ، باسقالاردى داتتاۋعا مۇددەلى ەمەس ەكەنىن تاعى دا ەسكە سالادى.
جاقيانوۆقا پورتالدىڭ يۋتۋب ارناسىنىڭ مىنبەرىن پايدالانۋدى ۇسىنىپ وتىرۋىمىز — سونىڭ ايعاعى. ءبىز ءسوز بوستاندىعى زاڭدىلىقتارىنا سايكەس ەكى تاراپقا دا تەڭ مىنبەر بەرۋ قاعيداتىن ەسكەرە وتىرىپ، عالىمجان جاقيانوۆتىڭ اتالعان مالىمدەمەسىنىڭ ءبىر ءارىپىن دە وزگەرتپەي نازارلارىڭىزعا ۇسىنامىز.
"ادىرنا" ۇلتتىق پورتالى
عالىمجان جاقيانوۆتىڭ مالىمدەمەسى
قۇرمەتتى دوستار مەن جۋرناليستەر قاۋىمى!
وزدەرىڭىزگە ءمالىم، بىلتىرعى قاڭتار وقيعاسىنان بەرى باق پەن Facebook-تا مەنىڭ سۇحباتتارىم مەن ماقالالارىم شىعىپ ءجۇر. وندا مەن جۋرناليستتەردىڭ سۇراقتارىنا جاۋاپ بەرىپ، قوعامىمىزدى الاڭداتاتىن كەيبىر ماسەلەلەردى كوتەرگەنمىن. سونىڭ ىشىندە بۇرىنعى جانە بۇگىنگى بيلىك باسشىلارىنا بايلانىستى سىني پىكىرىم دە بار. بيلىك تاراپىنان ايتقانىمدى جوققا شىعاراتىن نە تىكەلەي جاۋاپ بولمادى، نە قانداي دا ءبىر ءۇن قايتارا المادى. الايدا، ولاردىڭ جاۋابى باسقاشا بولدى.
بيلىككە تاۋەلدى كەيبىر اقپارات قۇرالدارى مەن ادامدار مەنىڭ جەكە باسىما بايلانىستى لاقاپ تاراتا باستادى. بۇل ناۋقاندا بۇرىنعى دوسىم تولەن توقتاسىنوۆ جانە ونىڭ جاقىندارى بايقالدى. ول ورتامىزداعى داۋدى ءوزارا كەلىسىم نەمەسە زاڭ جولىمەن شەشۋدىڭ ورنىنا بۇقارا نازارىنا جۇگىندى. نازار اۋداراتىن ماڭىزدى جايت– بۇل داۋ مەملەكەت نەمەسە قوعام شارۋالارىنا جاتپايدى. مەن ەكەۋىمىزدىڭ ىسكەرلىك قارىم-قاتىناسىمىز قوعامدىق تالقىلاۋدىڭ تاقىرىبىنا اينالعانىنا وكىنىشىمدى بيىلعى قاڭتارداعى مالىمدەمەمدە ايتقان ەدىم (قۇجاتقا سىلتەمە: https://abai.kz/post/163107). ال، ت. توقتاسىنوۆ پەن م. وسپانوۆ اراسىنداعى سوت تۋرالى اقپاراتتى مىنا سىلتەمەدە تابا الاسىزدار: (https://ratel.kz/.../byvshij_deputat_tolen_tohtasynov...). ول سوتتا توقتاسىنوۆ جەڭىلىپ، قارىزدى بوپ تابىلدى.
سونىمەن قاتار، مەن ار-نامىسىما نۇقسان كەلتىرىپ جالا جاپقانى ءۇشىن تولەن توقتاسىنوۆتى جاۋاپقا تارتۋىن الماتى قالاسىنىڭ اكىمشىلىك سوتىنا ءوتىنىش ءبىلدىردىم. 3-4 ايعا سوزىلعان سوت ونى كىنəلى دەپ تاۋىپ، 13 ماۋسىمدا ءوز شەشىمىن شىعاردى (سىلتەمە: https://t.me/GZhakiya/18).
دەگەنمەن، ت. توحتاسىنوۆتىڭ تارابى سوت جاۋاپكەردىڭ قاتىسۋىنسىز شەشىم شىعاردى دەگەن ءۋاج ايتتى. بىراق ونىڭ سوتقا قاتىسۋدان باس تارتىپ جۇرگەنىن ايتپادى. شىن مانىندە، سوت وتىرىسى بىرنەشە مارتە بولدى. سوت قاشقالاقتاپ جۇرگەن ت. توحتاسىنوۆتى ءماجبۇرلى تۇردە سوتقا قاتىستىرۋ ءۇشىن پوليتسيانى ارالاستىرۋ جايلى ۇيعارىم شىعاردى. پوليتسيا ونىڭ ۇيىنە 6 رەت بارىپ، كەزدەسە الماعان. جاۋاپكەردىڭ جۇبايى، ۇلى مەن قىزى پوليتسياعا ونىمەن بايلانىسى جوق دەگەن مالىمەت بەرگەن (سىلتەمە: https://t.me/GZhakiya/19)
سوت بارىسىندا ت. توحتاسىنوۆتىڭ كىناسىن دالەلدەيتىن ءتۇرلى فاكتىلەر كەلتىرىلىپ، فيلولوگيالىق ساراپتاما قاراستىرىلدى. ول ساراپتامادا «ADYRNA ULTTYQ PORTALY» YouTube-كانالىنا شىققان ينتەرۆيۋدە «شىندىققا سايكەس كەلمەگەن جاعدايدا ع. جاقيانوۆتىڭ ار-نامىسىنا، قادىر-قاسيەتىنە جانە ىسكەرلىك بەدەلىنە زيان كەلتىرەتىن مالىمەتتەر بار» دەگەن قورىتىندى جاسالدى (سىلتەمە: https://t.me/GZhakiya/20 )
بۇگىن ت. توقتاسىنوۆتىڭ شاعىمى بويىنشا اپپەلياتسيالىق سوتتىڭ وتىرىسى ءوتتى. شاعىم يەسى ءوزى قاتىسۋدان تاعى دا باس تارتىپ، ورنىنا ادۆوكاتىن جىبەرىپتى. ول بولعاندا، توقتاسىنوۆتىڭ مەكەن-جايى قازاقستاندا ەمەس موڭعوليادا، سوت وتىرىستارى تۋرالى حابارسىز دەگەن سياقتى اڭگىمەلەرىن قايتالادى. ءبىز ءوز كەزەگىمىزدە، بۇل سوزدەرى شىندىققا سايكەس كەلمەيتىنىن جانە توقتاسىنوۆتىڭ كىناسىن دالەلدەيتىن باسقا دا قۇجاتتاردى سوتتىڭ الدىنا تارتتىق (سىلتەمە: https://t.me/GZhakiya/21).
ناتيجەسىندە، الدىڭعى سوت شەشىمى كۇشىندە قالدى.
الدىندا اتالمىش سوتتىڭ شەشىمى «ادىرنا» باسشىلىعىنا جىبەرىلگەن بولاتىن. الايدا رەداكتسيا سوتتىڭ شەشىمىنە نازار اۋدارماي، ت. توحتاسىنوۆتىڭ سۇحباتىن الىپ تاستاۋدان باس تارتتى. سول سەبەپتەن، سايت ادرەسىنە سوتقا دەيىنگى شاعىم جولداندى. ەسەسىنە، سايتپەن ونىڭ باس رەداكتورى مەنى جۋرناليستكە قىسىم جاسادى دەپ ايىپتاپ، نەگىزسىز بىرنەشە ماقالا جاريالاپ وتىر. قايتالاپ ايتايىن، مەن «ادىرناعا» جالعان اقپارات تاراتپاڭىزدار دەگەن عانا تالاپ قويىپ وتىرمىن.
سونداي اق، جالعان اقپارات قازاقستانمەن شەكتەلمەي موڭعوليانىڭ دا كەيبىر باق-تا شىعىپتى. بۇلاردىڭ ءبارى «زاكازبەن» جاسالعانىنا كۇمانىم جوق. وسىعان بايلانىستى ماسەلە ۇلان-باتىر قالاسىنىڭ ءۇش سوتشىنىڭ قاتىسۋىمەن قارالىپ، ارتىنان اپپەلياتسيالىق سوت ءوتتى. ناتيجەسىندە، موڭعوليانىڭ دا سوت ورىندارى تاراتىلعان اقپاراتتىڭ ءبارى جالعان دەپ تاپتى جانە مەنىڭ ار-نامىسىمدى قورعاۋ تۋرالى قورىتىندى شەشىم شىعاردى (سىلتەمە: https://t.me/GZhakiya/22 ).
قازىرگى الەۋمەتتىك جەلىلەردە وتىرىكتى شىنداي كورسەتۋ، ادامنىڭ ار-نامىسىنا تيۋ، بەدەلىنە داق ءتۇسىرۋ وڭاي دۇنيەگە اينالدى. كەيىنگى كەزدە وزىمە قاتىستى سونداي ءىس-ارەكەتتىڭ كۋاسى بولعاندىقتان وسى پوستتى جازىپ وتىرمىن.
