دەپۋتات ەرمۇرات ءباپي الەۋمەتتىك جەلىدەگى پاراقشاسىندا جۋىردا قىزىلوردا وبلىستىق تۇزەتۋ مەكەمەسىندە جاتقان جۋرناليست دۋمان مۇحامەدكارىممەن جولىققانىن جازدى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، كەزدەسۋ ەكى ساعاتقا سوزىلعان.
«قىزىلورداعا بارىپ، اباقتىدا وتىرعان دۋمان مۇحامەدكارىممەن كەزدەسىپ قايتتىم. وبلىستاعى ازاماتتار دايىنداپ بەرگەن كۇزدىك سوعىمنان سىباعا اپاردىم. كولونيا اكىمشىلىگى سالەم-ساۋقاتتى ەش كەدەرگىسىز وتكىزۋگە مۇمكىندىك بەردى. دۋمان سول باياعى قالپىندا: بىربەتكەي، تىكمىنەز، تۋراشىل. سوت ۇكىمىمەن تاڭىلعان جازانى مويىندامايدى»، – دەدى دەپۋتات.
ەرمۇرات ءباپيدىڭ جازۋىنشا، جۋرناليست قازىرگى جاعدايدا دەنساۋلىعىنا بايلانىستى قيىندىقتار كورىپ وتىر. تالدىقورعانداعى سيزو-دا كەزدەسكەن كەزەڭنەن بەرى دۋماننىڭ جۇدەپ قالعانى بايقالعان. ول جاقىندا جاريالاعان اشتىقتان جاڭا عانا شىققانىن ايتقان.
«بۇدان ءبىر جارىم جىل بۇرىن تالدىقورعان "سيزو"-سىندا كەزدەسكەن كەزگە قاراعاندا، ءبىراز جۇدەۋ تارتقان. مەن كەلەردەن ءبىر كۇن بۇرىن (20.11.25) كەزەكتى اشتىقتان شىعىپتى. "قۇرعاق اشتىق پا؟" دەسەم: "جوع-ءا، سۇيىق ىشپەسەڭ، ءۇش-ءتورت كۇننەن كەيىن كرىشاڭ كەتىپ قالادى" دەپ كۇلەدى. بوستاندىقتا جۇرگەن كەزىندەي، ازىلدەن كەندە ەمەس.
ءور مىنەزىنەن اينىماعان. ۇنجىرعاسى تۇسپەگەن. باستى ايناداي عىپ، ۇستارامەن قىرىپ تاستاعان. "نەگە قىردىڭ؟" دەسەم، "گيگيەنا، كيچادا دۋش جوق قوي..." دەپ تاعى دا ازىلدەيدى.
كيچاسى - كارتسەر، قىزىلورداعا ەتاپپەن كەلگەننەن بەرگى جالعىز ادامدىق مەكەنى. كولونيا تارتىبىنە باعىنباعاندىقتان، رەجيمنىڭ تالابى بويىنشا وسىنداي ىشكى جازاعا كەسىلگەن. سەبەبى - مەكەمەنىڭ جالپىعا ورتاق كيىمىن كيۋدەن باس تارتقان.
"كيىمىن كيە سالمادىڭ با؟" دەيمىن.
"ەگەر جازىقسىز سوتتالىپ، ۇكىمدى مويىنداماسام، نەگە تۇرمەنىڭ كيىمىن كيۋىم كەرەك؟!" دەپ، وزىمە قارسى سۇراق قويادى.
"قايدام؟ قاپاستا وتىرسىڭ، ءجيى-ءجيى اشتىق جاريالايسىڭ، دەنساۋلىعىڭدى قۇرتىپ المايسىڭ با؟" دەگەنىم-داعى.
انىعىندا دەنساۋلىعى ءبىراز سىر بەرگەنى راس ەكەن. "ەتتىڭ قاشۋىنان ەكى بۇيرەگىم تومەن ءتۇسىپ كەتتى. بەلىم ول سىرقىرايدى. اسقازانىم دا اۋىرادى..." دەيدى دۋمان.
"دۋيس-تەگىلەر بارىنە ءوزى كىنالى، اشتىققا بارماسا، بۇلاي بولماس ەدى دەپ وتىر عوي..." دەيمىن مەن دۋمانعا.
"مەندە نارازىلىق ءبىلدىرۋدىڭ باسقا قانداي امالى بار؟ ءوزىمنىڭ قارسىلىعىمدى وسىلاي اشتىق جاريالاۋمەن عانا بىلدىرە الام" دەيدى دۋمان.
"بىزگە سوت ۇكىمىمەن مۇندا قامالعانداردىڭ ءبارى بىردەي. جەكە مۇحامەدكارىمگە جەڭىلدىك جاساپ، "بىزگە نەگە سپورتتىق كيىممەن جۇرۋگە رۇقسات ەتىلمەيدى؟" دەيتىن باسقا سوتتالعانداردىڭ نارازىلىعىن تۋدىرۋعا بولمايدى.
ءتارتىپ بارىنە بىردەي" دەيدى مەكەمە اكىمشىلىگىنىڭ جەتەكشىسى»، – دەلىنگەن دەپۋتات جازباسىندا.
جۋرناليست الماتى نەمەسە تالدىقورعان ماڭىنداعى تۇزەتۋ مەكەمەسىنە اۋىستىرۋدى سۇراعان. الايدا دۋيس وكىلدەرى ونىڭ «13 رەت ءتارتىپ بۇزعانى» مۇنداي ءوتىنىشتى قاناعاتتاندىرۋعا مۇمكىندىك بەرمەيتىنىن ايتتى.
سونىمەن بىرگە، دەپۋتات مۇحامەدكارىم وتىرعان كامەراعا «جارىلعىش زات لاقتىرىلدى» دەگەن ادۆوكات مالىمدەمەسىنە قاتىستى دا پىكىر سۇراعان. تۇرمە باسشىلىعى بۇل اقپاراتتىڭ تەكسەرىلىپ جاتقانىن، الايدا ونى «قوعامدىق رەزونانس تۋدىرۋعا باعىتتالعان سىرتقى ارانداتۋشىلىق بولۋى مۇمكىن» دەپ باعالايتىنىن جەتكىزگەن.
"سوتتالعان ادام وتىرعان كامەرانىڭ ەسىكتەگى تەسىگىنەن الدەبىر بەلگىسىز جارىلعىش زات لاقتىرىلدى دەگەن ادۆوكاتتىڭ مالىمدەمەسىنە بايلانىستى نە ايتاسىز؟" دەگەن ساۋالىما تۇرمە باسشىسى: "بۇل جاعداي تەكسەرىلۋدە. بىراق مۇنداي قارابايىر ارەكەتتى مۇحامەدكارىمگە قاتىستى قاستاندىق جاسالعان دەپ باعالاۋعا بولمايدى. ەگەر شىنىندا دا تۇرمەدە وتىرعان الدەكىمگە (دۋمانعا عانا ەمەس) قاستاندىق ۇيىمداستىرىلاتىن بولسا، ادەتتە ونداي ءىس داڭعازا دابىرامەن جاسالمايدى عوي. سوندىقتان بۇل دۋماننىڭ توڭىرەگىندەگى قوعامدىق ۋ-شۋدى قوزدىرۋدىڭ الدەكىمدەر سىرتتان ۇيىمداستىرعان پروۆاكاتسيالىق ارەكەتى" دەپ جاۋاپ بەردى.
باسقالار نە دەرىن قايدام، ال مەن بۇل جاۋاپقا يلاندىم. شىنىندا دا، "ساياسي تۇتقىن" سانالاتىن، تۇرمەدە قاۋحارسىز وتىرعان ادامعا جارىلعىش زاتپەن قاستىق جاساۋ قيسىنعا سىيمايتىن قىلىق بولماق. دۋماننىڭ ءوزى دە بۇعان اڭ-تاڭ.
قىسقاسى، دۋمانمەن كەزدەسۋدەن كەيىن، بۇل مەنىڭ قوعامعا ايتار قىسقا-نۇسقا حابارىم. ال كۇنى-ءتۇنى جالعىز ۇلىن ۋايىمداعان اناسى مەن بالاسىنىڭ دەنساۋلىعى دىمكاس دەگەن حابار ەستىگەننەن بەرى قان قىسىمى باسىنا شاۋىپ جۇرگەن اكەسىنە مەن ايتار جاعداياتتىڭ ءجونى قوعامشىلدارعا قاتىستى بولماسا كەرەك", - دەپ جازبا اياقتالعان.
ەسكە سالا كەتەيىك، جۋرناليست دۋمان مۇحامەدكارىم 2024 جىلى «ەكسترەميزمدى قارجىلاندىرۋ» جانە «تىيىم سالىنعان ۇيىمنىڭ جۇمىسىنا ارالاسۋ» باپتارى بويىنشا كىنالى دەپ تانىلىپ، جەتى جىلعا باس بوستاندىعىنان ايىرىلعان. سونىمەن قاتار، وعان ءۇش جىل قوعامدىق-ساياسي قىزمەتپەن اينالىسۋعا تىيىم سالىندى.
