بۇگىن، 1 جەلتوقساندا Orda.kz باسىلىمى رەداكتسياسىندا جانە ونىڭ باس رەداكتورى گۇلنارا باجكەنوۆانىڭ پاتەرىندە ءتىنتۋ جۇرگىزىلدى. بۇل تۋرالى الماتى قالالىق پوليتسيا دەپارتامەنتى ايتتى، دەپ حابارلايدى «ادىرنا» ءتىلشىسى zakon.kz-كە سىلتەمە جاساپ.
باجكەنوۆاعا قاتىستى قىلمىستىق ىستەر "قاتە جانە ادەيى جالعان اقپارات تاراتۋ" فاكتىلەرى بويىنشا بىرنەشە ارىز تۇسۋىنە بايلانىستى قوزعالعان. تەرگەۋ دەرەكتەرىنە سۇيەنسەك، ارىزدانۋشىلاردىڭ ۋاجدەرى قازىر جان-جاقتى قارالىپ جاتىر.
«الدىن الا مالىمەتتەر بويىنشا، 2024 جىلى جاريالانعان ماتەريالداردىڭ بىرىندە قۇقىق قورعاۋ ورگانى قىزمەتكەرىنىڭ پارا العان كەزدە ۇستالدى دەگەن شىندىققا جاناسپايتىن اقپارات تاراتىلعان. تەرگەۋ بارىسىندا مۇنداي فاكتىنىڭ بولماعانى ناقتىلاندى. وسىلايشا، ازاماتشا ب.-نىڭ ارەكەتتەرى جاريالانىمدا كورسەتىلگەن قىزمەتكەردىڭ كاسىبي بەدەلىنە نۇقسان كەلتىرىپ، قوعامدا جالعان پىكىر قالىپتاستىرعان»،-دەلىنگەن حابارلامادا.
بۇدان بولەك، وتكەن جىلدارى جاريالانعان وزگە ماتەريالدارعا قاتىستى دا جابىرلەنۋشىلەردىڭ ارىزدارى بويىنشا تەكسەرىستەر جۇرگىزىلۋدە. اتالعان جاريالانىمداردا دا جالعان نە قوعامدى اداستىراتىن مالىمەتتەر بولۋى مۇمكىندىگى قاراستىرىلىپ وتىر.
باجكەنوۆانىڭ تۇرعىلىقتى جەرى مەن جۇمىس ورنىندا تەرگەۋ ءىس-شارالارى جۇرگىزىلۋدە. جالعان اقپاراتتى دايىنداۋ جانە جاريالاۋ جاعدايلارىن انىقتاۋ، سونداي-اق ونىڭ قايدان الىنعانىن تەكسەرۋ ماقساتىندا ەلەكتروندىق قۇرىلعىلار مەن ماتەريالدار تاركىلەنۋدە.
تەرگەۋ جالعاسۋدا. بارلىق ءمان-جايلار قولدانىستاعى زاڭناماعا سايكەس تولىق كولەمدە انىقتالاتىن بولادى.
