مادەنيەت جانە اقپارات ءمينيسترى ۇقك باسشىسى مەن ءسىم ۇستالعانى تۋرالى اقپاراتقا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
مينيستر Facebook پاراقشاسىندا پوست جاريالاپ، باق وكىلدەرىنە ەسكەرتۋ جاسادى.
"كەيبىر رەسمي باق پەن ءانونيمدى تەلەگرام-ارنالاردا مەملەكەتتىك قىزمەتشىلەردىڭ ۇستالۋىنا قاتىستى راستالماعان اقپارات تارالۋدا.
اقپارات تاراتقاندا ونىڭ شىنايىلىعىن تەكسەرۋ مىندەتتى. كىناسىزدىك پرەزۋمپتسياسى قاعيداسى جانە جۋرناليستىك ەتيكا بار ەكەنىن ەستەن شىعارماۋ قاجەت.
كوبىنە راستالماعان «حايپ قۋعان» دەرەكتەرگە ەرەمىن دەپ، جۋرناليستەر مۇنداي مالىمەت ازاماتتارعا جانە ولاردىڭ جاقىن تۋىستارىنا زيان تيگىزۋى، ار-نامىسى مەن قادىر-قاسيەتىنە نۇقسان كەلتىرۋى، جالا بولىپ شىعۋى مۇمكىن ەكەنىن ەستە ۇستاۋى ءتيىس.
ارىپتەستەردى كاسىبي باق پەن جۋرناليستەر ساقتاۋعا ءتيىس مىندەتتەمەلەردى ورىنداۋعا شاقىرامىن. سونداي-اق، جالعان اقپارات تاراتقانى ءۇشىن اكىمشىلىك ءارى قىلمىستىق جاۋاپكەرشىلىك قاراستىرىلعانىن ەسكە سالامىن", - دەلىنگەن مينيستر بالاەۆانىڭ حابارلاماسىندا.
ايتا كەتەيىك، ۇقك باسشىسى مەن سىرتقى ىستەر ءمينيسترىنىڭ ۇستالعانى تۋرالى جالعان اقپارات باق بەتتەرىندە تاراعان ەدى.
ۇقساس جاڭالىقتار
