الماتىدا ەكى ەسىرتكى زەرتحاناسى مەن حيميالىق زاڭسىز پرەپپاراتتار ساقتالعان ءىرى قويما انىقتالدى، دەپ حابارلايدى "ادىرنا" ۇلتتىق پورتالى. بۇل تۋرادى ۇلتتىق قاۋىپسىزدىك كوميتەتىنىڭ (ۇقك) ءباسپاسوز قىزمەتى مالىمدەدى.
«12 جانە 14 شىلدەدە الماتىدا قر ۇلتتىق قاۋىپسىزدىك كوميتەتى تەكسەرۋ ءىس-شارالارىن وتكىزدى، ناتيجەسىندە ەكى ەسىرتكى زەرتحاناسى مەن حيميالىق پرەكۋرسورلارى بار ءىرى قويما جويىلدى. 10 كەلىدەن استام سينتەتيكالىق «مەفەدرون» ەسىرتكىسى، 15 تونناعا جۋىق پرەكۋرسورلار، سونداي-اق كەم دەگەندە ءتورت-بەس ەسىرتكى زەرتحاناسىنىڭ قىزمەتىن ۇيىمداستىرۋعا مۇمكىندىك بەرەتىن ارنايى قۇرال-جابدىقتار تابىلىپ، تاركىلەندى. ەسىرتكى جاساۋ كەزىندە رەسپۋبليكانىڭ ءتورت ازاماتى ۇستالدى، ولارعا سوت شەشىمىمەن قاماۋعا الۋ تۇرىندەگى بۇلتارتپاۋ شاراسى قولدانىلدى»، - دەلىنگەن سارسەنبى كۇنى تاراتقان حابارلامادا.
اتالعان فاكتىلەر بويىنشا سوتقا دەيىنگى تەرگەۋ امالدارى جۇرگىزىلۋدە.
«ۇلتتىق قاۋىپسىزدىك كوميتەتى 2023 جىلدىڭ باسىنان بەرى 24 ەسىرتكى زەرتحاناسىن، 20 حالىقارالىق جانە 23 ايماقتىق ەسىرتكى ارناسىن جويىپ، 780 كەلى سينتەتيكالىق ەسىرتكى مەن 68 توننادان استام پرەكۋرسورلاردى تاركىلەدى. ەسىرتكى، پسيحوتروپتىق زاتتاردى جانە سول تەكتەستەردى زاڭعا سايكەس زاڭسىز اينالىمعا، وتكىزۋگە، ساقتاۋعا، دايىنداۋعا، وسىرۋگە، قايتا وڭدەۋگە، ساتىپ الۋعا بايلانىستى قىلمىستار ءۇش جىلدان 20 جىلعا دەيىن باس بوستاندىعىنان ايىرۋعا جازالانادى»، - دەپ تولىقتىردى ۇقك.
"ادىرنا" ۇلتتىق پورتالى
