قاراعاندى وبلىسىندا كەنشىلەردى بوپسالاعان قىلمىستىق توپ ۇستالدى، دەپ حابارلايدى "ادىرنا" پورتالى.
وبلىس پوليتسەيلەرى ۇلتتىق قاۋىپسىزدىك كوميتەتى دەپارتامەنتى قىزمەتكەرلەرىمەن بىرلەسە وتىرىپ، قازىرگى Qarmet اق-نىڭ جۇمىسكەرلەرىمەن اباي قالاسى تۇرعىندارىن بوپسالاعان قىلمىستىق توپتىڭ مۇشەلەرىن قۇرىقتاۋدىڭ ەكىنشى كەزەڭىن وتكىزدى.
تەرگەۋ بارىسىندا 55 ميلليون تەڭگەدەن استام وزگە دە بوپسالاۋ دەرەكتەرى انىقتالىپ، كۇدىكتىلەر قاماۋعا الىندى. ودان بولەك، ۇستالعانداردىڭ “قازاقستان تەمىر جولى” اق-نىڭ وبەكتىلەرىنەن تاۋار-ماتەريال ۇرلاۋ دەرەگىنە قاتىسى بارى انىقتالىپ وتىر.
13 اقپان كۇنى پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسىنىڭ جانە ۇلتتىق قاۋىپسىزدىك كوميتەتى دەپارتامەنتىنىڭ جەدەل ۋاكىلدەرى قىلمىسقا قاتىسى بار 8 ادامدى ۇستادى.
ەسكە سالا كەتەيىك، ىشكى ىستەر مينيسترلىگىنىڭ بەرگەن اقپاراتى بويىنشا وتكەن جىلدىڭ جەلتوقسان ايىندا Qarmet كەنشىلەرىن بوپسالاعان قىلمىستىق توپتىڭ 7 مۇشەسى قاماۋعا الىنعان بولاتىن.
