ەستونيا بيلىگى دروندار وندىرىلەتىن كاسىپورىندى ورتەۋگە جاسالعان ارەكەتكە بايلانىستى 1 جەلتوقساننان باستاپ رەسەيمەن شەكارانى تولىق جابۋدى جوسپارلاپ وتىر. ەستونيا قۇقىق قورعاۋ ورگاندارىنىڭ نۇسقاسى بويىنشا، بۇل ارەكەتتىڭ ارتىندا رەسەيدىڭ ارنايى قىزمەتتەرى تۇر. ال ماسكەۋ شەكارانى جابۋ جوسپارىن «رۋسوفوبيانىڭ» كورىنىسى دەپ اتادى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
15 قاراشادا ەستونيا پرەمەر-ءمينيسترى كريستەن ميحال رەسەيمەن شەكاراداعى بارلىق وتكىزۋ بەكەتىن جابۋ جوسپارىن جاريالادى. ول ۇكىمەتتى سەنبى كۇنى ەستوندىق Threod Systems كومپانياسىنىڭ عيماراتىن ورتەۋگە جاسالعان ارەكەتكە بايلانىستى «بارلىق قاجەتتى شارانى قابىلداۋعا» شاقىردى. اتالعان كومپانيا سوققى بەرەتىن جانە بارلاۋ جۇرگىزەتىن ۇشقىشسىز ۇشۋ اپپاراتتارىن وندىرەدى.
ميحال بۇل وقيعانى «رەسەي ارنايى قىزمەتتەرىنىڭ كەزەكتى ديۆەرسيالىق ارەكەتى» دەپ اتادى.
«ەگەر رەسەي ەستونيا اۋماعىندا گيبريدتى وپەراتسيالارىن جالعاستىرسا جانە رەسەيلىك ارنايى قىزمەتتەردىڭ ادامدارعا ىقپال ەتۋ ءۇشىن شەكارالىق وتكىزۋ بەكەتتەرىن پايدالانىپ جاتقانىن بىلسەك، ءبىز وزىمىزگە تونەتىن قاۋىپ-قاتەردى ازايتۋعا دايىن بولۋىمىز كەرەك. شەكارانى جابۋ ەستونيا تۇرعىندارىنا تونەتىن قاۋىپتى ازايتىپ، قورعانىس ونەركاسىبى مەن ەلدىڭ قورعانىس الەۋەتىنە جاسالعان شابۋىلدارعا جول بەرىلمەيتىنىن ايقىن كورسەتەدى»، – دەلىنگەن ەستونيا پرەمەر-ءمينيسترىنىڭ رەسمي مالىمدەمەسىندە.
كوپ ۇزاماي ەستونيانىڭ سىرتقى ىستەر ءمينيسترى مارگۋس تساحكنا ەستونيا مەن رەسەي شەكاراسىنداعى ءۇش وتكىزۋ بەكەتىنىڭ بارلىعى 1 جەلتوقساننان باستاپ جۇمىسىن توقتاتاتىنىن مالىمدەدى. شەكارانى جابۋ تۋرالى رەسمي شەشىم وسى اپتادا قابىلدانادى. ونىڭ قانشا ۋاقىتقا جابىلاتىنى ازىرگە بەلگىسىز.
«رەسەي ەستونياعا قارسى باعىتتالعان دۇشپاندىق ارەكەتتەرىنىڭ سالدارى بولاتىنىن ءتۇسىنۋى كەرەك. ءبىزدىڭ ەلدى قورقىتۋعا، تۇراقسىزداندىرۋعا نەمەسە قاۋىپسىزدىگىمىزگە نۇقسان كەلتىرۋگە باعىتتالعان ارەكەتتەر جاۋاپسىز قالمايدى»، – دەدى تساحكنا.
ونىڭ پىكىرىنشە، شەكارالىق وتكىزۋ بەكەتتەرىن جابۋ «رەسەيدىڭ ەستونيا اۋماعىندا دۇشپاندىق ارەكەتتەر جۇرگىزۋ مۇمكىندىگىن شەكتەيدى».
«ەستونيا رەسەيگە جانە رەسەيدەن قاتىنايتىن كولىك قوزعالىسىن شەكارالىق وتكىزۋ بەكەتتەرىندە ايتارلىقتاي شەكتەپ، جاعداي ودان ءارى ۋشىققان جاعدايدا قاتىناس تولىق توقتاتىلۋى مۇمكىن ەكەنىن ءار جولى ەسكەرتىپ كەلدى. ەندى سول ءسات تۋدى»، – دەپ ءتۇسىندىردى شەشىمدى ەلدىڭ ىشكى ىستەر ءمينيسترى يگور تارو.
قازىر رەسەي اۋماعىندا جۇرگەن ەستونيا ازاماتتارىنا ەلگە ورالۋ ءۇشىن ەكى اپتا ۋاقىت بەرىلەدى. ودان كەيىن «ۇيگە قايتۋ جولى الدەقايدا ۇزارادى»، – دەپ ەسكەرتتى تارو.
ەستونيانىڭ باس پروكۋرورى استريد ءاسيدىڭ ايتۋىنشا، وقيعا 14 قاراشا، سەنبى كۇنى تۇنگى ساعات 3 شاماسىندا بولعان. بىرنەشە ادام ءتالليننىڭ سولتۇستىگىندەگى ۆيمسي ەلدى مەكەنىندە ورنالاسقان Threod Systems كومپانياسىنىڭ اۋماعىنا ءورت قويۋ ماقساتىندا زاڭسىز كىرۋگە ارەكەتتەنگەن.
ەستونيا ىشكى قاۋىپسىزدىك قىزمەتىنىڭ (KaPo) باسشىسى مارگو پاللوسوننىڭ مالىمەتىنشە، شابۋىل جاساۋشىلار عيماراتتىڭ تەرەزەلەرىن سىندىرىپ، ىشىنە جانعىش سۇيىقتىق قۇيىپ، ءورت شىعارۋعا جانە جارىلىس جاساۋعا تىرىسقان. الايدا كومپانيانىڭ كۇزەت قىزمەتى ءورتتى دەر كەزىندە سوندىرگەن. زارداپ شەككەندەر جوق. ءوندىرىس ورنى مەن ونىمدەرىنە دە زاقىم كەلمەگەن.
وقيعاعا بايلانىستى سەگىز ادام ۇستالعان. تەرگەۋ بەس ادامدى قاماۋعا الۋدى سۇراپ وتىر.
رەسەيلىك ديقاندار قازىر ارزانعا بولسا دا استىقتارىن ساتۋعا جانتالاسۋدا. بۇل ءبىزدىڭ ديقاندار ءۇشىن جاقسى ەمەس-اۋ...
